ការរអិលបាក់ដីបានវាយប្រហារលើសណ្ឋាគារមួយ ក្នុងកំឡុងពេលមានវិធីមង្គលការ ស្ថិតនៅភាគខាងត្បូងប្រទេសប៉េរូ បណ្តាលឲ្យភ្ញៀវចូលរួមចំនួន ១៥នាក់ស្លាប់បាត់បង់ជីវិត។
អភិបាលក្រុង Abancay បានបញ្ជាក់ប្រាប់វិទ្យុ RPP ថា “ល្បាប់ភក់បានបុកជញ្ជាំង និងបានទម្លុះចូលក្នុងសណ្ឋាគារតែម្តង”។
លោកអភិបាលឈ្មោះ Evaristo Ramos បាននិយាយទៀតថា មានភ្ញៀវចំនួន ១០០នាក់បានចូលរួមក្នុងពិធីមង្គលការកាលពីថ្ងៃសោរិ៍ ហើយហេតុការណ៍នោះបណ្តាលឲ្យភ្ញៀវចំនួន ១៥នាក់ស្លាប់ និង ៣៤នាក់រងរបួស ។
ក្រុមសង្គ្រោះ ប៉ូលីស ព្រមទាំងប្រជាជននៅតំបន់នោះ បានធ្វើកិច្ចការទាំងយប់ ដើម្បីស្វែងរក និងជួយសង្គ្រោះជនរងគ្រោះដែលជាប់នៅក្នុងគំនរបាក់បែក ល្បាប់ភក់ និងផ្ទាំងថ្ម ។ ក្នុងហេតុការណ៍នោះ កូនកម្លោះ និងកូនក្រមុំមិនមានគ្រោះថ្នាក់អ្វីនោះទេ។
អាជ្ញាធរបញ្ជាក់ថា សណ្ឋាគាររងគ្រោះ ត្រូវបានគេសាងសងនៅក្បែរភ្នំ ទើបធ្វើឲ្យវាទទួលការវាយប្រហារពីការបាក់ដី៕ សុភ័ក្ត្រ
ប្រភព៖ Channelnewsasia
