ខេត្តស្វាយរៀង ៖ មានករណីហឹង្សាដោយចេតនាមួយបានកើតឡើងបណ្តាលឱ្យបុរសម្នាក់ត្រូវជាប្អូនបង្កើតនិងគ្នាស្លាប់នៅក្នុងថ្លុកឈាមក្រោយពេលដែលបុរសជាជនសង្ស័យត្រូវជាបងប្រុសបង្កើតបានលើកកាំបិតខ្វែវកាប់ទៅលើប្អូនរបស់ខ្លួនត្រូវមួយកាំបិតចំបញ្ឆិតកញ្ចឹងក ។
ហេតុការណ៍ខាងលើនេះបានកើតឡើងកាលពីវេលាម៉ោង១៣និង១០នាទីរសៀល ថ្ងៃទី២៧ខែមករាឆ្នាំ២០១៩ ស្ថិតនៅផ្ទះម្តាយរបស់ជនរងគ្រោះនៅភូមិព្រៃរការ ឃុំដូនសរ ស្រុកស្វាយជ្រំ ខេត្តស្វាយរៀង ។
សមត្ថកិច្ចបានឱ្យដឹងថា ៖ ជនសង្ស័យឈ្មោះ លី សារ៉ត ភេទប្រុសអាយុ៣១ឆ្នាំ (មានសតិមិនល្អ) ត្រូវជាបង ដោយឡែកជនរងគ្រោះជាប្អូនវិញឈ្មោះលី សារឿន ភេទប្រុស អាយុ២៧ឆ្នាំ អ្នកទាំងពីររស់ភូមិកើតហេតុខាងលើមានឪពុក ឈ្មោះស៊ាង សារុននិងម្តាយឈ្មាះ ស៊ិន សាវន ។
ប្រភពដដែលបានឱ្យដឹងទៀតថា ៖ ជនរងគ្រោះសព្វថ្ងៃមានប្រពន្ធហើយមានកូនមួយទៅរកស៊ីនៅរាជធានីភ្នំពេញយូរៗ ក៏មកលេងផ្ទះម្តងហើយទាំង២នាក់ បងប្អូននេះក៏ពុំសូវត្រូវគ្នាទេ ដោយសារពេលជនរងគ្រោះមកលេងផ្ទះម្តងៗពុំដែលសល់លុយសល់កាក់ឱ្យអ្នកផ្ទះនោះឡើយ នៅពេលត្រឡប់ទៅវិញតែងតែសុំលុយម្តាយ ឪពុក ត្រឡប់ទៅវិញ។
សមត្ថកិច្ចបានបន្តឱ្យដឹងទៀតថា ៖ នៅថ្ងៃកើតហេតុជនសង្ស័យបានផឹកស្រាឡើងស្រវឹងហើយក៏ចាប់ផ្តើមមានទំនាស់ជាមួយជនរងគ្រោះដោយនិយាយថា ទៅរកស៊ីនៅភ្នំពេញយូរហើយមិនដែលឃើញសល់លុយសោះចឹងមិនត្រឹមតែប៉ុណ្ណឹងទេពេលមកលេងផ្ទះម្តងៗសុំលុយ២ម៉ឺនរៀលទៅវិញទៀត! ហើយអ្នកទាំង២ក៏មានជម្លោះកាន់តែខ្លាំងឡើង រហូតដល់ទ្រាំមិនបានជនសង្ស័យជាបងក៏បានទៅយកកាំបិតខ្វែវកាប់ទៅលើជនរងគ្រោះជាប្អូនបណ្តាលឱ្យស្លាប់ក្នុងថ្លុកឈាមតែម្តងទៅ។ ក្រោយពីកាប់ប្អូនស្លាប់ហើយជនសង្ស័យបានរត់គេចខ្លួនមកដល់ផ្លូវលេខ៣១៥ តែត្រូវបានកំលាំងសមត្ថកិច្ចនគរបាលរបស់អធិការដ្ឋាននគរបាលស្រុកស្វាយជ្រំធ្វើការឃាត់ខ្លួនជាបណ្តោះអាសន្នយកមកកាន់អធិការដ្ឋាននគរបាលស្រុកស្វាយជ្រំ ដើម្បីធ្វើការកសាងសំណុំរឿងចាត់ការបន្តទៅតាមផ្លូវច្បាប់រួមនិងវត្ថុតាងផងដែរ ៕ ដោយ ៖ វ៉ៃគោ
