ខេត្តស្វាយរៀង ៖ មនុស្សប្រុសស្រី៣នាក់ បានរងរបួសធ្ងន់និងស្រាលនៅក្នុងករណីគ្រោះថ្នាក់ចរាចរណ៍មួយ ដោយសារមានរថយន្តធុនធំចតលើទ្រូងផ្លូវស្របពេលនោះ ក៏មានម៉ូតូកង់បីមកក្រោយបានបុកម៉ូតូអាសង់មិនអស់ល្បឿន ក៏ជ្រុលទៅបុកគូថរថយន្តជាប់ម៉ូតូក្រោមរថយន្តតែម្តងក្នុងពេលនោះដែរ ក៏មានម៉ូតូរ៉ឺម៉កដឹកដែកជើងអន្ទាមកខំគេចពីករណីនៅខាងមុខធ្លាក់ដែកចូលតូបលក់បាយប៉ើងខ្ទេច ។
ករណីគ្រោះថ្នាក់នេះបានកើតឡើងកាលពីវេលាម៉ោង១០និង១០ព្រឹក ថ្ងៃទី២៧ ខែមករា ឆ្នាំ២០១៩ នៅចំណុចផ្លូវជាតិលេខ០១ ស្ថិតក្នុងភូមិ ប្រសូត្រ២ ឃុំ កណ្តៀងរាយ ស្រុក ស្វាយទាប ខេត្ត ស្វាយរៀង ។
បើយោងតាមប្រភពនៅកន្លែងកើតហេតុបានឲ្យដឹងថា ៖ នៅមុនពេលកើតហេតុមានម៉ូតូកង់បីម៉ាក ស៊ីរុស ពណ៌ខ្មៅ ស ស្លាកលេខ គ្មាន បើកបរដោយឈ្មោះ នាគ ថុល ភេទប្រុស អាយុ ៣៧ឆ្នាំ មុខរបរ កសិករ រស់នៅភូមិ បុស ឃុំមេសថ្ងក ស្រុកចន្ទ្រា ខេត្តស្វាយរៀង រងរបួសស្រាល (ពាក់មួកសុវត្ថិភាព) បានជិះម៉ូតូក្នុងទិសដៅពីលិចទៅកើត លុះមកដល់កន្លែងកើតហេតុខាងលើ បានមកបុកម៉ូតូម៉ាកហុងដាឌ្រីម សេ១២៥ ស៊េរីឆ្នាំ ២១០៣ ពណ៌ ខ្មៅ ពីក្រោយ បើកបរដោយឈ្មោះ វែន ផល្លា ភេទស្រី អាយុ ២៥ឆ្នាំ មុខរបរកសិករ រស់នៅភូមិលៀប ឃុំកណ្តៀងរាយ ស្រុកស្វាយទាប ខេត្តស្វាយរៀង រងរបួសធ្ងន់ (ពាក់មួក) អ្នករួមដំណើរម្នាក់ឈ្មោះ កឹម អិត ភេទស្រី អាយុ៤៣ឆ្នាំ មុខរបរកសិករ រស់នៅភូមិឃុំជាមួយគ្នា រងរបួសធ្ងន់ ក្នុងទិសដៅពីលិចទៅកើត ។
ប្រភពបានបន្តទៀតថា ៖ ម៉ូតូកង់បី ក៏ជ្រុលទៅបុកគូថរថយន្តម៉ាក ហ៊ីយ៉ាន់ដាយ ពណ៌ខៀវ ស្លាកលេខគ្មាន ដែលឈប់នៅលើទ្រូវផ្លូវ បើកបរដោយឈ្មោះ ប៉ា ភេទប្រុស អាយុ ៣៤ឆ្នាំ មុខរបរ បើកបរ រស់នៅភូមិ តាយន្ត ឃុំពងទឹក ស្រុករំដួល ខេត្តស្វាយរៀង (អ្នកបើកបររត់បាត់ពីកន្លែងកើតហេតុ) ភ្លាមនោះក៍មានម៉ូតូរឺម៉ក ម៉ាក ដាយមីត ពណ៌ខ្មៅ ស្លាកលេខ គ្មាន ក៏គេចពីគ្រោះថ្នាក់នេះហើយរបូតដែកដែលដឹកនៅលើរ៉ឺម៉កបានដែកទៅលើចង្ក្រានអ្នកលក់បាយ បើកបរដោយឈ្មោះ តូច ចាន់កុមារ ភេទប្រុស អាយុ៣៦ ឆ្នាំ មុខរបរកសិករ រស់នៅភូមិ សាលារៀន ឃុំ បាសាក់ ស្រុកស្វាយជ្រំ ខេត្តស្វាយរៀង គ្មានរបួសស្នាម (មិនពាក់មួក) ។
ករណីគ្រោះថ្នាក់នេះអ្នករងរបួសបានបញ្ចូនទៅព្យាបាលនៅមន្ទីរពេទ្យបង្អែកស្រុកស្វាយទាប ។ ចំពោះមធ្យោបាយទាំងអស់យកមករក្សាទុកនៅអធិការដ្ឋាននគរបាលស្រុកស្វាយទាបដើម្បីចាត់ការទៅតាមផ្លូវច្បាប់ ៕ ដោយ ៖ វ៉ៃគោ
