ខេត្តស្វាយរៀង ៖ យុវជនម្នាក់ជានិស្សិតបានរងរបួសសន្លប់ស្តូកស្តឹងនិងបុរសម្នាក់ទៀតរងរបួសជើងងើបមិនរួចដោយតែយុវជនខាងលើបុកពីក្រោយម៉ូតូកង់បីលក់ប្រហិតទាំងកំរោល ។
ករណីខាងលើនេះបានកើតឡើងកាលពីវេលាម៉ោង១៣ និង១០ថ្ងៃទី២៨ ខែមករា ឆ្នាំ២០១៩ នៅលើផ្លូវជាតិលេខ១ស្ថិតក្នុងភូមិ លៀប ឃុំ កណ្តៀងរាយ ស្រុក ស្វាយទាប ខេត្តស្វាយរៀង ។
សមត្ថកិច្ចបានអោយដឹងថា៖ករណីគ្រោះថ្នាក់ចរាចរណ៍បង្កឡើងដោយម៉ូតូម៉ាក ស្កុបពី ពណ៌ ស ស្លាកលេខស្វាយរៀង 1D 7890 បើកបរដោយឈ្មោះ វ៉ាន់ ឌីណា ភេទប្រុស អាយុ ២៥ឆ្នាំ មុខរបរនិស្សិត រស់នៅភូមិ ដើមពោធិ៍ ឃុំ កណ្តៀងរាយ ស្រុកស្វាយទាប ខេត្តស្វាយរៀង បានធ្វើដំណើរពីទិសខាងលិចទៅកើត (មិនពាក់មួកសុវត្ថិភាពទេ)លុះមកដល់កន្លែងកើតហេតុខាងលើ ក៏ទៅនិងបុកម៉ូតូកង់បី ម៉ាកវវ៉វ ពណ៌ផ្កាឈូក គ្មានស្លាកលេខ ពីក្រោយពេញទំហឹងក្នុងទិសដៅស្របទិសគ្នា បើកបរដោយឈ្មោះ វង់ ធារ៉ា ភេទប្រុស អាយុ ៣៩ឆ្នាំ មុខរបរ កសិករ រស់នៅភូមិ ប្រសូត្រ២ ឃុំ កណ្តៀងរាយ ស្រុកស្វាយទាប ខេត្តស្វាយរៀង រងរបួសជើងដោយឡែកនិស្សិតវិញ បានសន្លប់ស្តូកស្តឹងនៅនិងកន្លែងកើតហេតុ ។ អ្នករងរបួសទាំងពីរត្រូវបានយកទៅព្យាបាលនៅមន្ទីរពេទ្យបង្អែកស្វាយទាប ។
ចំពោះមធ្យោបាយទាំងអស់យកមករក្សាទុកនៅអធិការដ្ឋាននគរបាលស្រុកស្វាយទាបដើម្បីរងចាំការដោះស្រាយគ្នាតាមផ្លូវច្បាប់ហើយមូលហេតុដែលនាំឱ្យកើតមាននូវគ្រោះថ្នាក់ចរាចរណ៍ខាងលើនេះគឺ អ្នកបើកបរម៉ូតូស្កុបពីប្រើប្រាស់ល្បឿនលឿន ៕ ដោយ ៖ វ៉ៃគោ