ខេត្តព្រះសីហនុ៖ មន្ត្រីឃ្លាំមើលផែនការអភិវឌ្ឍសង្គម និងប្រជាពលរដ្ឋរងគ្រោះលើវិវាទដីធ្លី ដែលកើតមាននៅតំបន់ពយម៉ាចូវ ស្ថិតក្នុងភូមិគគី ឃុំបិតត្រាង ស្រុកព្រៃនប់ បានអះអាងថា ជម្លោះនេះ នៅមិនទាន់បញ្ចប់នៅឡើយទេ ដោយមានប្រជាពលរដ្ឋមួយចំនួន បានប្រមូលផ្តុំគ្នាតវ៉ា ដើម្បីទាមទារសិទ្ធិរស់នៅកាប់រានព្រៃ និងធ្លាប់សង់ផ្ទះរស់នៅជាច្រើនឆ្នាំមកហើយនោះ។
ផ្តើមពីបញ្ហានេះ ទាំងក្រុមអ្នកឃ្លាំមើលផែនការអភិវឌ្ឍសង្គម និងប្រជាពលរដ្ឋមានជម្លោះដីធ្លីមួយចំនួន ដែលផ្ទះសម្បែង និងខ្ទមតូចៗ របស់ពួកគាត់ត្រូវកម្លាំងចម្រុះ ចុះអនុវត្តសាលក្រមតុលាការកំពូល ជូនភាគីម្ចាស់ទៀត ដោយបានប្រើគ្រៀងចក្រឈូសបំផ្លាញផ្ទះពួកគាត់ចោលកាលពីថ្ងៃទី២៤ ខែមករា ឆ្នាំ ២០១៩ នៅបន្តស្វែងរកយុត្តិធ៌មពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាឲ្យជួយអន្តរាគមន៍រកយុត្តិធ៌មជូនពួកគាត់ ឲ្យមានដីសង់លំនៅឋានឡើងវិញ។
យ៉ាងនេះក្តី កាលពីព្រឹកថ្ងៃចន្ទ ទី២៤ ខែមករា លោក ផៃ ប៊ុនវណ្ណៈ អភិបាលរងខេត្តព្រះសីហនុ អមដំណើរដោយកម្លាំងសមត្ថកិច្ចចម្រុះរាប់សិបនាក់ កាលពីព្រឹកថ្ងៃចន្ទ ទី២៨ ខែមករា ឆ្នាំ២០១៩នេះ បានចុះទៅកាន់តំបន់មានជម្លោះដីធ្លី កាលពីថ្ងៃទី២៤ ខែមករា នៅចំណុចក្បែរវត្តអូរត្រេះ មានទីតាំងនៅភូមិគគីរ ឃុំបិតត្រាង ស្រុកព្រៃនប់ ខេត្តព្រះសីហនុ ដើម្បីធ្វើការសម្របសម្រួលជាមួយប្រជាពលដ្ឋ និងបង្ហាញផ្លូវដល់ពួកគាត់ ឲ្យបន្តស្វែងរកដំណោះស្រាយលើវិវាទដីធ្លីខាងលើនេះ តាមប្រព័ន្ធតុលាការដោយសន្តិវិធី។
ប្រជាពលរដ្ឋរងគ្រោះដីធ្លីបានឲ្យដឹងថា ពួកគាត់មួយចំនួនបន្ទាប់ពីកម្លាំងចម្រុះនៃរដ្ឋបាលខេត្តព្រះសីហនុ បានចុះបង្ក្រាប់ដោយហឹង្សា និងប្រើអាវុធវែងខ្លីបាញ់រះបណ្តាលឲ្យបួសធ្ងន់ពលរដ្ឋម្នាក់ កាលពីថ្ងៃទី២៤ ខែមករារួចមក។ ប៉ុន្តែពេលនេះ ប្រជាពលរដ្ឋពួកគាត់មួយចំនួន បាននាំគ្នាទៅបោះតង់ស្នាក់នៅលើដីជិតកន្លែងកើតហេតុ ដោយពួកគាត់មិនព្រមចាកចេញពីទីតាំង ដែលពលរដ្ឋខ្លះអះអាងថា ជាដីដែលពួកគាត់បានចូលមករស់នៅ និងកាប់រានព្រៃជាយូរមកហើយនោះ។ ជាក់ស្តែងនៅព្រឹកថ្ងៃទី២៨ ខែមករា ក៏មានប្រជាពលរដ្ឋ មកប្រមូលផ្តុំគ្នា និងផ្ទុះការតវ៉ាមួយប្រាវទៀត បន្ទាប់ពីកម្លាំងសមត្ថកិច្ចចុះទៅកាន់ទីតាំងនោះជាថ្មីទៀត កាលពីព្រឹកថ្ងៃចន្ទនេះ ប៉ុន្តែមិនកើតមានអំពើហិង្សាអ្វីកើតឡើងទៀតទេ។
តាមការសង្កេត កម្លាំងចម្រុះដឹកនាំដោយលោក ផៃ ប៊ុនវណ្ណៈ អភិបាលរងខេត្តព្រះសីហនុ ដែលបានចុះទៅកាន់ទីតាំងដីទំនាស់ និងមានការផ្ទុះអាវុធបាញ់រះបណ្តាលឲ្យបុរសម្នាក់រងរបួសធ្ងន់ បានមួយសន្ទុះរួចមក គឺក្រោយពេលសមត្ថកិច្ច ស្រាប់តែឃើញកម្លាំងចម្រុះទាំងនោះ បានកដម្លាំងវិលត្រឡប់ទៅក្រោយវិញ បន្ទាប់មកឃើញ លោក ផៃ ប៊ុនវណ្ណៈ អភិបាលរងខេត្តព្រះសីហនុ បានព្យាយាមសម្របសម្រួល ពន្យល់ និងបង្ហាញផ្លូវដល់ប្រជាពលរដ្ឋទាំងនោះ ឱ្យរកច្រកតវ៉ាតាមផ្លូវច្បាប់ដោយសន្តិវិធី។
នាឱកាសនោះ លោក ផៃ ប៊ុនវណ្ណៈ ក៏បានស្នើដល់បងប្អូនប្រជាពលរដ្ឋ ត្រូវប្រមូលឯកសារពាកព័ន្ធដាក់ពាក្យប្ដឹងទៅកាន់តុលាការ ដើម្បីស្នើសុំជួយរកយុត្តិធម៌ជូនវិញ។ លោកបន្តថា រដ្ឋបាលខេត្ត គឺពុំអាចជួយអ្វីដល់បងប្អូនប្រជាពលរដ្ឋបានទេ ព្រោះវាជាអំណាច របស់តុលាការសាលាកំពូល ដែលបានចេញសាលក្រមហើយ ពុំមាននរណាហ៊ានជំទាស់ឡើយនោះទេ។ លោក ផៃ ប៊ុនវណ្ណៈ បានឲ្យដឹងដូច្នេះ រួចបញ្ជាក់ថា បើបងប្អូនប្រជាពលរដ្ឋ នៅតែព្យាយាមចូលទៅរស់នៅលើដី ដែលគេមានសាលក្រមស្ថាពរ ពីសាលាកំពូលរួចហើយនោះ គឺបងប្អូនអាចនឹងមានបញ្ហាមិនចេះចប់ទេ។
អភិបាលរងខេត្តរូបនេះបន្តថា បើទោះបងប្អូនប្រជាពលរដ្ឋ បានសំណូមពរសុំចូលទៅរស់នៅលើដីទំនាស់ជាបណ្តោះអាសន្នសិន ខណៈភាគីម្ខាងទៀតមានសាលក្រមឈ្នះក្ដីនៅសាលាកំពូលរួចទៅហើយ នោះ គឺរដ្ឋបាលខេត្តព្រះសីហនុ មិនមានសិទ្ធិ អាចជួយអ្វីដល់បងប្អូនបានដែរ។
តាមលោក ផៃ ប៊ុនវណ្ណៈ ជម្រើស របស់ប្រជាពលរដ្ឋនៅពេលនេះ គឺមានតែនាំគ្នារុះរើផ្ទះ ឬរោងតូចៗ របស់ខ្លួនចេញពីបរិវេណដី ដែលសាលក្រមតុលាការកំពូង បានសម្រេចតែប៉ុណ្ណោះ ហើយងាកមកនាំគ្នាតវ៉ាតាមផ្លូវច្បាប់ជំនួសវិញ ទើបជាការល្អសម្រាប់បងប្អូន។ប៉ុន្តែត្រូវប្រជាពលរដ្ឋប្រតិកម្មតចំអកតវិញថា ការរកដំណោះស្រាយតាមផ្លូវច្បាប់ជារឿងអត់ប្រយោជន៍ គឺប្រជាពលរដ្ឋក្រីក្រដូចពួកគាត់មិនដែលឈ្នះក្តី នៅប្រព័ន្ធតុលាការនោះទេ។
ក្រៅពីសំណូមពររស់នៅលើដីមានទំនាស់បណ្ដោះអាសន្នជាបន្តទៀត តំណាងប្រជាពលរដ្ឋរងគ្រោះដីធ្លី នៅភូមិគគី ឃុំបិតត្រាង ស្រុកព្រៃនប់ ក៏បានលើកជាចម្ងល់ថា ហេតុអ្វីបានជានៅក្នុងអំឡុងដែលពួកគាត់ បានចូលមកតាំងទីលំនៅ រស់នៅលើដីស្ថិតក្នុងភូមិសាស្ត្រខាងលើថ្មីៗ ហេតុម្ដេចមិនមាននរណាមកដេញឬហាមឃាត់? ជាងនេះទៀត ពួកគាត់ក័បាននាំគ្នាធ្វើផ្លូវតចរន្តអគ្គិសនី ដោយខ្លួនឯង ដើម្បីបម្រើដល់ការរស់នៅ ដោយមានសុខសុវត្ថិភាពនាពេលកន្លងមក។ ម្យ៉ាងទៀត មុនពេលអនុវត្តសាលដីកា ហេតុដូចម្ដេចបានជាអាជ្ញាធរ មិនជូនដំណឹងដល់ប្រជាពលរដ្ឋបានត្រៀម លក្ខណៈជាមុន។ ជាងនេះទៀត តើមូលហេតុអ្វីបានជាអាជ្ញាធរដាក់កម្លាំងចម្រុះប្រដាប់ដោយអាវុធយ៉ាងដូច្នេះ ធ្វើឱ្យពួកគាត់មានការភ័យខ្លាចយ៉ាងខ្លាំង?
ព្រមជាមួយគ្នានេះ ប្រជាពលរដ្ឋរងគ្រោះដីធ្លី ក៏បានលើកដៃសំពះស្នើសុំដល់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាកម្ពុជា ឲ្យជួយអន្តរាគមន៍ និងផ្តល់យុត្តិធ៌លើករណីវិវាទដីធ្លីជូនពួកគាត់ដោយអនុគ្រោះផងចុះ ត្បិតអីដីធ្លី និងផ្ទះសម្បែងដែលពួកគាត់កំពុងរស់នៅរាល់ថ្ងៃ និងមានសេចក្តីសុខសុវត្ថិភាពសុខៗ បែរជាត្រូវបានកម្លាំងសមត្ថកិច្ចចម្រុះ ដឹកនាំដោយមន្ត្រីសាលាដំបូងខេត្តព្រះសីហនុ ដឹកនាំគ្រឿងចក្រមកឈូស និងដុតបំផ្លាញចោលអស់គ្នាសល់កាលពីថ្ងៃទី២៤ ខែមករា ឆ្នាំ២០១៩។
ទាក់ទិនបញ្ហាខាងលើនេះ លោក ផៃ ប៊ុនវណ្ណៈ អភិបាលរងខេត្តព្រះសីហនុ ក៏បានឲ្យដឹងដែរថា បន្ទាប់ពីកើតមានការផ្ទុះអាវុធកាលពីថ្ងៃទី២៤ ខែមករា ឆ្នាំ២០១៩ អាជ្ញាធរមូលដ្ឋាន ក៏បានបន្តដឹកកម្លាំងចុះរុះរើ និងឈួសឆាយផ្ទះសម្បែង របស់ប្រជាពលជាបន្តបន្ទាប់ គឺចាប់ពីថ្ងៃទី២៤ បន្តមកដល់ថ្ងៃទី២៨ ខែមករា ឆ្នាំ២០១៩។ ក្នុងនោះបានឈួសឆាយបានផ្ទៃដីទំហំ ៤៧ហិចតា រុះរើផ្ទះថ្ម១ខ្នង ផ្ទះឈើ២ខ្នង និងខ្ទមតូច ឬរោងតូចចំនួន២២ខ្នង។ ចំណែកកាលពីថ្ងៃទី២៥ ខែមករា ឆ្នាំ២០១៩ ភាគីទំនាស់ម្ចាស់ដី ដែលអះអាងថា មានប្លង់កម្មសិទ្ធិ បានបន្តប្រើគ្រឿងចក្រ និងកម្មករ ធ្វើការឈួសឆាយដីបានជិត ១៥ហិចតាទៀត និងរុះរើខ្ទមចំនួន៦២ខ្នង៕ ដោយ ៖ ដែន សីមា
