ខេត្តព្រះសីហនុ៖ មន្ត្រីព័ត៌មានប្រតិកម្មរហ័ស នៃរដ្ឋបាលសាលាក្រុងព្រះសីហនុ លោក លឹម ភត្រី បានឲ្យដឹងថា រូបលោកសូមបកស្រាយចំពោះបណ្តាញសង្គម និងគេហទំព័រមួយចំនួន ដែលបានចុះផ្សាយពីបញ្ហាអនាម័យសំរាម នៅក្រុងព្រះសីហនុ ដោយផ្សាយខុសពីការពិតជាក់ស្តែង អំពីបច្ចុប្បន្នភាព នៃអនាម័យបរិស្ថាន ជាពិសេសសំរាម ដែលអាជ្ញាធរបានយកចិត្តទុកដាក់ជាប្រចាំថ្ងៃនោះទេ ពោលគឺបរិស្ថានអនាម័យសំរាមឆ្នាំ២០១៩នេះ គឺខុសពីឆ្នាំ២០១៨កន្លងទៅ។
ត្រង់ចំណុចនេះ លោក លឹម ភត្រី បានបកស្រាយឆ្លើយតប ចំពោះព័ត៌មានចុះផ្សាយតាមបណ្តាញសង្គម និងគេហទំព័រមួយចំនួន ស្តីអំពីបញ្ហាអនាម័យសំរាម ដែលធ្លាប់កើតមាន នៅក្នុងក្រុងព្រះសីហនុកន្លងមក ហើយត្រូវបានបណ្តាញសង្គម និងគេហទំព័រមួយចំនួន លើកយកមកចុះផ្សាយថ្មីៗនេះថា មិនបានឆ្លុះបញ្ចាំងពីបច្ចុប្បន្នភាព នៃអនាម័យ បរិស្ថាន ជាពិសេសសំរាម ដែលរដ្ឋបាលក្រុង-ខេត្តព្រះសីហនុ បានយកផ្តោតការយកចិត្តទុកដាក់នោះទេ។
លោក លឹម ភត្រី បានចាត់ទុកព័ត៌មានចុះផ្សាយ នៅលើ Page: Mother Nature Cambodia ស្នើឲ្យត្រួតពិនិត្យ ឬជួយពិនិត្យមើលឡើងវិញ នូវការចុះផ្សាយ របស់ខ្លួនកាលពីយប់ថ្ងៃទី២៦ ខែមករា ឆ្នាំ២០១៩ថា មិនមែនជាការពិតនោះទេ។
មន្ត្រីព័ត៌មានប្រតិកម្មរហ័សសាលាក្រុងព្រះសីហនុ លោក លឹម ភត្រី បានពន្យល់ដូច្នេះ រួចបានលើកយករូបថតបួនប្រាំសន្លឹក ដែលរូបលោកបានថយកាលពីព្រឹកថ្ងៃទី២៧ ខែមករា ឆ្នាំ២០១៩ នៅតាមទីតាំងផ្លូវខាងក្រោយអតីតក្រុមហ៊ុនអារីស្តុន និងទីតាំងខាងក្រោយស្ពាន ផ្លូវខាងក្រោយទីបញ្ជាការដ្ឋានកងរាជអាវុធអាវុធហត្ថខេត្តព្រះសីហនុ ស្ថិតក្នុងសង្កាត់ លេខ៤ក្រុង-ខេត្តព្រះសីហនុ ដែលកន្លងមកធ្លាប់មានប្រជាពលរដ្ឋលួចដឹកកាកសំណល់សំរាមយកចាក់គរទុកចោល និងសំរាម ដែលត្រូវប្រជាពលរដ្ឋចាក់ចូលក្នុងអូរ ឬប្រឡាយបង្ហូរទឹក នាំឲ្យសំរាមកកកស្ទះក្នុងអូរ ឬប្រឡាយដ៏ច្រើនសន្ធឹកសន្ធាប់កាលពីឆ្នាំ២០១៨។
ចំណុចទីតាំងខាងលើនេះ លោក លឹម ភត្រី បញ្ជាក់ថា ពេលបច្ចុប្បន្ននេះ គឺមិនមានគំនរសំរាម ឬកាកសំណល់គរទុកចោលច្រើន ដូចការចុះផ្សាយ របស់ Page: Mother Nature Cambodia ដែលបានចុះផ្សាយកាលពីថ្ងៃទី២៦ ខែមករា ឆ្នាំ២០១៩ទៀតទេ ព្រោះទីតាំងខាងលើនេះ បន្ទាប់ពីត្រូវបានមន្ត្រីជំនាញស្ថាប័នពាក់ព័ន្ធ ជាពិសេសថ្នាក់ដឹកនាំរដ្ឋបាលក្រុង-ខេត្តព្រះសីហនុ បានជម្រុញ និងបង្កើតក្រុមការងារឲ្យចុះសហការគ្នា ប្រមូលនិងសំអាតអនាម័យសំរាមនេះជាបន្តបន្ទាប់មក គឺជាលទ្ធផលបង្ហាញថា កាកសំណល់ ឬសំរាម ដែលត្រូវប្រជាពលរដ្ឋនាំយកមកបោះចោលនៅទីតាំងខាងលើ គឺត្រូវបានសំអាតឲ្យអស់ពីទីតាំងទាំងនោះអស់ហើយកាលពីខែមុន ឬចុងឆ្នាំ២០១៨កន្លងទៅ។
ផ្តើមពីបញ្ហានេះ លោក លឹម ភត្រី តាងនាមឲ្យមន្ត្រីព័ត៌មានប្រតិកម្មរហ័សសាលាក្រុងព្រះសីះនុ ក៏បានស្នើដល់ Page: Mother Nature Cambodia ត្រូវចុះផ្សាយព័ត៌មាន លើបញ្ហាអនាម័យសំរាម ដែលកំពុងកើតមាននៅមូលដ្ឋានក្រុងព្រះសីហនុ ឲ្យឆ្លុះពីការពិតជាក់ស្តែង ជាពិសេសត្រូវគោរពក្រមសីលធម៌វិជ្ជាជីវៈ នៃការផ្សាយផង ពោលគឺត្រូវចុះផ្សាយព័ត៌មាន របស់ខ្លួន ត្រូវដាក់កាលបរិច្ឆេទ ដើម្បីបញ្ជាក់ពីទីតាំងនីមួយៗ ឲ្យបានច្បាស់លាស់ ឬឲ្យបានត្រឹមត្រូវ ដោយមិនត្រូវយករូបថត និងរូបវីឌីអូ ឃ្លីប ដែលបានថតទុកជាយូរខែឆ្នាំមកហើយនោះ យកមកចុះផ្សាយនៅពេលនេះទៀតទេ។
ទាក់ទិនបញ្ហាសំរាមនេះ កាលពីថ្ងៃទីសៅរ៍ ទី២៦ ខែមករា ឆ្នាំ២០១៩ តាមរយៈ Page: Mother Nature Cambodia បានចុះផ្សាយព័ត៌ជុំវិញបញ្ហាអនាម័យសំរាម ដែលបានកើតមាននៅក្នុងមូលដ្ឋានក្រុងព្រះសីហនុ ដោយមានខ្លឹមសារទាំងស្រុងដូចតទៅនេះ៖ «ក្រុងព្រះសីហនុ ជាទីស្រលាញ់របស់យើង ដែលរបបក្រុងភ្នំពេញ តែងតែចូលចិត្ដអួតសរសើរថា ជាតារារះនាទិសនិរតី កំពុងតែដើរឆ្ពោះទៅជាទីក្រុង ដែលសំបូរទៅដោយកាស៊ីណូច្រើនជាងគេ នៅលើពិភពលោក។ ស្របពេលជាមួយគ្នានេះ ក្រោមចក្ខុវិស័យនៃការអភិវឌ្ឍន៍ របស់របបក្រុងភ្នំពេញ ទីក្រុងមួយនេះ ក៏បានប្រែក្លាយជាទីក្រុងដែលពោរពេញទៅដោយគំនរសម្រាមដ៏ច្រើននៅគ្រប់ទីកន្លែងផងដែរ។ នៅក្នុងវីដេអូបន្ទាប់របស់យើង ដែលនឹងបង្ហោះនៅថ្ងៃសៅរ៍ ទី២៦ ខែមករា សកម្មជនបរិស្ថាន យុវជន ថុន រដ្ឋា នឹងបង្ហោះនៅថ្ងៃ សៅរ៍ ទី២៦ ខែមករា សកម្មជនបរិស្ថាន យុវជន ថុន រដ្ឋា នឹងបង្ហាញពីរូបភាពដ៏គួរឲ្យភ្ញាក់ផ្អើលបំផុត នៃគំនរសម្រាមធំៗ និងទាមទារចម្លើយពីអាជ្ញាធរពាក់ព័ន្ធ ទៅលើចំណូលដែលរដ្ឋទទួលបានមកពីវិស័យល្បែងនេះផងដែរ អរគុណ»។
ត្រង់ចំណុចនេះ លោក លឹម ភត្រី បានឆ្លើយតបការចុះផ្សាយព័ត៌មាននៅលើ Page: Mother Nature Cambodia ថារាល់ថ្ងៃនេះ ថ្នាក់ដឹកនាំរដ្ឋបាលក្រុង-ខេត្តព្រះសីហនុ ព្រមទាំងថ្នាក់ដឹកនាំមន្ទីរស្ថាប័នពាក់ព័ន្ធមួយចំនួនទៀត បានយកចិត្តទុកដាក់ជាប្រចាំទៅលើការងារសំអាត អនាម័យបរិស្ថាន ជាពិសេសកាកសំណល់សំរាមនេះជាប្រចាំថ្ងៃ ជាមួយបានប្រើប្រាស់គ្រឿងចក្រ និងប្រើប្រាស់កម្មកររាប់សិបនាក់ សម្រាប់បំរើដល់សកម្មភាពការងារសំអាតអនាម័យសំរាម ដែលបានកកស្ទះក្នុងអូរ ឬប្រឡាយ និងសំរាម ដែលត្រូវគេលួចយកមកចាក់ចោលនៅពេលយប់ នៅតាមទីតាំងមួយចំនួន ក្នុងក្រុងព្រះសីហនុជាប្រចាំថ្ងៃ៕ ដោយ៖ ដែន សីមា
