ខេត្តកោះកុង ៖ មន្ត្រីព័ត៌មាន នៃរដ្ឋបាលខេត្តកោះកុង បានឲ្យដឹងថា កាលពីថ្ងៃទី២៦-២៧ ខែមករា ឆ្នាំ២០១៩នេះ មន្ត្រីរដ្ឋបាលខេត្ត និងថ្នាក់ដឹកនាំមន្ទីរធម្មការ និងសាសនាខេត្តកោះកុង សហការជាមួយព្រះមេគណខេត្តនេះ បានរៀបចំពិធីប្រោសព្រំ និមន្តព្រះសង្ឃសូត្រមន្ត នៅតាមដងផ្លូវជាតិលេខ ៤៨ ដើម្បីបួងសួងសុំសេចក្តីសុខ ជូនដល់ប្រជាពលរដ្ឋ ឬអ្នកធ្វើដំណើរតាមមធ្យោបាយនានា ឲ្យមានសុខសុវត្ថិភាពជៀសផុត ពីគ្រោះចង្រៃ នៃឧបទ្ទវហេតុគ្រោះថ្នាក់ចរាចរណ៍ដែលអាចនឹងកើតមានឡើងទាំងអស់គ្នា។
មន្ត្រីដដែលបានបញ្ជាក់ថា ពីធីសូត្រមន្តខាងលើនេះ បានធ្វើឡើងបន្ទាប់ពីមន្ត្រីជំនាញស្ថាប័នទាំងនោះ សង្កេតឃើញថា ជាបន្តបន្ទាប់មកនេះ មូលដ្ឋានខេត្តកោះកុង បានមានករណីគ្រោះថ្នាក់ចរាចរណ៍កើតឡើងជាច្រើនករណី បានកើតមាននៅតាមផ្លូវជាតិលេខ៤៨ ដែលបានបណ្តាលឲ្យមានប្រជាពលរដ្ឋរងរបួស និងស្លាប់មនុស្សជាច្រើននាក់។
មន្ត្រីព័ត៌មានខេត្តកោះកុង បានឲ្យដឹងបន្តថា ជាបន្តបន្ទាប់មកនេះ ឃើញមានគ្រោះថ្នាក់ចរាចរណ៍កើតមាននៅតាមផ្លូវជាតិលេខ៤៨ ចាប់ពីផ្លូវបែកផ្លូវជាតិលេខ៤ ស្ថិតក្នុងស្រុកស្រែអំបិល ឆ្ពោះទៅកាន់ខេត្តកោះកុង គឺតែងកើតមានគ្រោះថ្នាក់ចរាចរណ៍កើតឡើងជាច្រើនករណី គួរឲ្យព្រួយបារម្ភពីមួយថ្ងៃទៅមួយថ្ងៃ និងបណ្តាលឲ្យមានមនុស្សរងរបួស ស្លាប់ និងខូចខាតទ្រព្យសម្បត្តិជាច្រើនករណី ។
ទាក់ទិនបញ្ហានេះ លោក សំ ធឿន អនុប្រធានមន្ទីរធម្មការ និងសាសនាខេត្តកោះកុង បានឲ្យដឹងថា ពិធីនេះបានរៀបចំធ្វើឡើង កាលពីថ្ងៃថ្ងៃសៅរ៍ និងថ្ងៃអាទិត្យ ទី២៦-២៧ ខែមករា ជាថ្ងៃចុងសប្តាហ៍ ដោយមានមន្ត្រីរាជការ ព្រះសង្ឃ អាជ្ញាមូលដ្ឋាន និងប្រជាពលរដ្ឋយ៉ាងច្រើនកុះករបានចូលរួមធ្វើពិធីតាមបែបព្រះពុទ្ធសាសនា និងបានបួងសួងសុំសេចក្តីសុខសប្បាយពីម្ចាស់ទឹកម្ចាស់ដីថែរក្សាភូមិឋាន និងព្រៃព្រឹក្សានៅតាមមូលដ្ឋាននីមួយៗ ។
មន្ត្រីមន្ទីរធម្មការដដែលបានបន្តថា សកម្មភាពមន្ត្រីជំនាញខាងលើ គឺបន្ទាប់ពីធ្វើពិធីនិមន្តព្រះសង្ឃសូត្រមន្តប្រោសព្រំ តាមលក្ខណៈព្រះពុទ្ធសាសនា នៅចំណុចអូរអណ្តាត ស្ថិតក្នុងឃុំអណ្តូងទឹក ស្រុកបុទុមសាគរចប់សប់គ្រប់អស់ហើយ។ ក៏មានបែងចែកក្រុមការងារធ្វើពីធីបួងសួងនេះជាពីរក្រុម ដោយបាននិមន្តព្រះសង្ឃ និងអ្នកចូលរួមដើរក្បួនធម្មយាត្រាជាពីរក្រុម ដោយមួយក្រុម ត្រូវធ្វើដំណើរឆ្ពោះមកកាន់ទីរួមខេត្តកោះកុង និងមួយក្រុមទៀត ធ្វើដំណើរឆ្ពោះទៅកាន់ទីរួមស្រុកស្រែអំបិល ជាមួយបានធ្វើពិធីសូត្រមន្តប្រោសព្រំ នៅតាមចំណុច ឬគោលដៅ ដែលតែងកើតមានគ្រោះថ្នាក់ចរាចរណ៍ញឹកញាប់នាពេលកន្លងមក៕ ដោយ៖ ដែន សីមា