ភ្នំពេញ ៖ ករណីឡានចុះពីលើស្ពានបណ្ដាលឱ្យកម្មករលីសែងឈើម្នាក់ស្លាប់ភ្លាមៗនៅកន្លែងហេតុ និងរងរបួសធ្ងន់ស្រាល ៤នាក់ ដោយសារទេឡានធំដឹកទំនិញបើកបុកចូលក្នុងដេប៉ូលក់ឈើមួយកន្លែងស្ថិតនៅរង្វង់មូលស្ពានព្រែកសំរោង ក្នុងភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ កាលពីម៉ោង២ និង៣០នាទី ទៀបភ្លឺថ្ងៃទី១៥ ខែធ្នូ ឆ្នាំ២០១៧ ។
ជនរងគ្រោះ ឈ្មោះ ហ៊ន ហ៊ាន អាយុ ៤៨ឆ្នាំ ជាកម្មករលីសែងឈើ នៅកន្លែងកើតហេតុ ។
ក្រុមកម្មករដេប៉ូឈើ បាននិយាយថា នៅម៉ោងកើតហេតុ ជនរងគ្រោះងើបពីកន្លែងដេក ដើរចេញពីរោងទៅរកកន្លែងនោម ប៉ុន្តែខណៈកំពុងដើរចេញនោះ ស្រាប់តែមានរថយន្តមួយគ្រឿងនេះ ចុះពីស្ពាន ហើយជ្រុលបុកចូលរោងស្នាក់នៅ ហើយក្រឡាប់រថយន្តសង្កត់ផ្ទុបនឹងគំនរឈើបណ្តាលអោយជនរងគ្រោះស្លាប់តែម្តង ។
ចំណែកអ្នកភូមិ និងសមត្ថកិច្ចក៏បានឃាត់ខ្លួនព្រូឡាន បាន៣នាក់ផងដែរ ។ ព្រូឡាននិយាយថា មូលហេតុបណ្តាលអោយមានគ្រោះថ្នាក់នេះ គឺមកពីរថយន្តហ្រាំងមិនស៊ី ។
ក្រោយកើតហេតុ សមត្ថកិច្ចមូលដ្ឋានចុះពិនិត្យ និងយករថយន្តបង្ក ព្រមទាំងព្រូឡានបញ្ជូនទៅការិយាល័យចរាចរណ៍រាជធានី ដើម្បីចាត់ការតាមផ្លូវច្បាប់៕ ដោយ ៖ បញ្ញាស័ក្តិ