តាកែវ ៖ ជុំវិញករណីផ្ទុះការតវ៉ាពីប្រជាពលរដ្ឋនៅស្រុកអង្គរបូរី កំពុងតែក្លាយទៅជារឿងក្តៅ ខណៈដែលរដ្ឋបាលស្រុកអង្គរបូរីបានចេញលិខិតបំភ្លឺ (លាងខ្លួនឯង) ហើយងាកមកចោទក្រុមអ្នកសារព័ត៌មានថា ផ្សាយព័ត៌មានរឿងផ្ទុះការតវ៉ារបស់បងប្អូនប្រជាពលរដ្ឋនៅឃុំព្រៃផ្គាំជាង៤០០គ្រួសារប្តឹងតវ៉ារឿងតម្លៃទឹកបូមដាក់ស្រែ ជាមួយនិងក្រុមហ៊ុនផ្គត់ផ្គង់ទឹកស្ថានីយ៍ឃុំព្រៃផ្គាំរបស់លោក ឈុន សារឹន ហៅប៉ោង កាលពីថ្ងៃទី២៦ ខែមករា ឆ្នាំ២០១៩កន្លងទៅនេះ ជាការផ្សាយព័ត៌មានបំភ្លៃនិងបំប៉ោងព័ត៌មានទៅវិញ ។ ក្នុងពេលដែលប្រជាពលរដ្ឋប្រុស ស្រីរាប់រយនាក់ទៅឈរនៅមាត់ជណ្តើរសាលាឃុំ ស្រែករកអាជ្ញាធរជួយដោះស្រាយ តែបែរជាអាជ្ញាធរឃុំ និងស្រុកឆ្លើយថាមិនដឹងរឿងទៅវិញ។
ទង្វើនេះហាក់បីដូចជាពាក្យរបស់ថ្នាក់ដឹកនាំធ្លាប់និយាយតគ្នាថាកុំធ្វើជាមន្ត្រីជើងដប់ ដែលអង្គុយនៅតែក្នុងប៉ារ៉ូចាំស្តាប់តែរបាយការទទួលយកផលប្រយោជន៍ មិនគិតគូរពីទុក្ខលំបាករបស់រាស្ត្រ ដែលអាចនិយាយបានថាជាមន្ត្រីអសកម្មភាព ខ្វះការទំនាក់ទំនងផ្ទាល់ជាមួយនិងប្រជាពលរដ្ឋ។
សូមបញ្ជាក់ផងដែរថា ការឡាយវីដេអូផ្ទាល់អំពីសកម្មភាព និងការសម្ភាសតវ៉ារបស់ពលរដ្ឋនៅពេលនោះក្នុងបណ្តាញសង្គមហ្វេសបុកនិយាយអំពីទុក្ខលំបាករបស់ពួកគាត់ឲ្យមហាជននិងអាជ្ញាធរគ្រប់លំដាប់ថ្នាក់បានដឹងរឿងពិតនោះ បែរជាមន្ត្រីជើងដប់រដ្ឋបាលស្រុកអង្គរបូរីថា ការផ្សាយព័ត៌មាននេះមិនពិតហើយជាព័ត៌មានបំប៉ោងទៅវិញ។ ការឆ្លើយតបនឹងការចេញលិខិតបំភ្លឺនេះ ហាក់បីដូចជាអាជ្ញាធរមិនបានដឹងទល់តែសោះ ថាក្រុមហ៊ុនផ្គត់ផ្គង់ទឹកនៅឃុំព្រៃផ្គាំ យកលុយថ្លៃបូមទឹកដាក់ស្រែលើស ពីកិច្ចសន្យា ហើយសំងំ មិនជួយរកដំណោះស្រាយអោយពលរដ្ឋទៅវិញ លុះដល់ពេលផ្ទុះរឿង ធំទើបចេញមុខរកដំណោះស្រាយ ។
តាមការពិនិត្យសូមឲ្យអាជ្ញាធរស្រុកអង្គរបូរី គួរណាស់តែចុះមកផ្ទាល់ដើម្បីរកដំណោះស្រាយជូនពលរដ្ឋមិនមែនស្តាប់តែរបាយការហើយចោទប្រកាន់មកអ្នកសារព័ត៌មាននោះទេចៀសវាងការធ្លាក់ចុះនៃការងារគ្រប់គ្រងរដ្ឋបាលរបស់លោក ។
គួរបញ្ជាក់ផងដែរថា នៅព្រឹកថ្ងៃទី ២៧ ខែមករា ឆ្នាំ២០១៩នេះដែរ គឺក្រុមហ៊ុនផ្គត់ផ្គង់ទឹក និងអជ្ញាធរ បានដោះស្រាយ ជាមួយនិងការសំណូមពរពីប្រជាពលរដ្ឋរួចហើយ ដោយកំណត់អោយយកតម្លៃនៃការបូមទឹកដាក់ស្រែក្នុង ១ហិកតា ១៧ម៉ឺនរៀល នៅក្នុងការធ្វើស្រូវដំណាក់កាលទី២ ដូចក្នុងកិច្ចសន្យាដូចដើមវិញ ៕ ដោយ ៖ តាកែវ