កុមារចំនួន ១០នាក់ដែលត្រូវបានគេចាប់ជំរិតក្នុងប្រទេសតង់ហ្សានី ត្រូវបានអាជ្ញាធរប្រទះឃើញស្លាប់ទាំងអស់ ហើយគ្រឿងក្នុងរបស់ពួកគេត្រូវបានកាត់យកអស់។ នេះបើតាមការបញ្ជាក់របស់អាជ្ញាធរប្រាប់ CNN នៅថ្ងៃច័ន្ទម្សិលមិញនេះ។
អនុរដ្ឋមន្ត្រីសុខាភិបាលនៃប្រទេសនេះ ឈ្មោះ Faustine Ndugulile បានថ្លែងថា ក្មេងទាំង ១០នាក់នោះ បានបាត់ខ្លួនកាលពីខែធ្នូកន្លងទៅក្នុងស្រុក Njombe ភាគនិរតី ប្រទេស។
សាកសពរបស់ក្មេងៗទាំងនោះ ត្រូវបានរកឃើញកាលពីសប្តាហ៍មុន ក្រោយពេលប៉ូលីសបានបើកកិច្ចប្រតិបត្តិការស្វែងរកនៅក្នុងតំបន់នោះ។
លោកថ្លែងថា “រហូតមកដល់ពេលនេះ ពួកយើងបានរកឃើញសាកសពចំនួន ១០ ហើយភាគច្រើន គ្រឿងក្នុង និងធ្មេញរបស់ពួកគេត្រូវបានកាត់យកចេញអស់”។
លោកអនុរដ្ឋមន្ត្រីដដែលបញ្ជាក់ថា ករណីនោះអាចពាក្យព័ន្ធនឹងអំពើធ្មប់ ទើបធ្វើឲ្យមានទំនោរនៃការប្រព្រឹត្តិអំពើបែបនោះ ដែលគ្រូធ្មប់ បានឲ្យមនុស្សយកគ្រឿងទាំងនោះ ដោយមានជំនឿថា ការប្រើប្រាសមន្តអាគម ការដាក់ស្នេហ៍ និងការបូជា អាចបង្កើតទ្រព្យយ៉ាងច្រើនដល់ពួកគេ។
លោកបន្ថែមថា ក្រសួងសុខាភិបាលក៏កំពុងស៊ើបអង្កេតការសម្លាប់នោះដែរ ក្រោយពេល ឪពុកម្តាយជាច្រើនបានរាយការណ៍ពីការបាត់ខ្លួនរបស់កូនៗពួកគេ។
លោកបញ្ជាក់ដូច្នេះថា “ពួកយើងចង់វែកមុខអ្នកប្រព្រឹត្តិ ប៉ុន្តែពេលនេះពួកយើងត្រូវអប់រំពីអ្នកអនុវត្តមន្តអាគមទាំងអស់នៅក្នុងតំបន់ និងក្បែរតំបន់ឲ្យបានលឿន អោយពួកគេឈប់ធ្វើសកម្មភាពទាំងនោះ”។
លោកថ្លែងប្រាប់ CNN បន្ថែមថា ការសម្លាប់ទាំងនោះមិនពាក់ព័ន្ធទៅនឹងការបូជាយ៉ាញនោះទេ ទោះយ៉ាងណា ពួកយើងមានការអាណិតអាសូរណាស់ ដោយសារពួកគេជាក្មេងហើយពួកគេមិនសមនឹងស្លាប់បែបនោះសោះ៕ ប្រភព៖ CNN
