ខេត្តស្វាយរៀង ៖ នៅរៀងរាល់ល្ងាចគេសង្កេតឃើញបងប្អូនប្រជាពលរដ្ឋជាពិសេសអ្នកដែលមានកូនរឺក្មួយតូចៗតែងតែនាំក្មេងៗទាំងនោះមកលេងកំសាន្តនៅសួនកុមារដែលជាទីកន្លែងមួយត្រូវបានថ្នាក់ដឹកនាំខេត្ត និងបណ្តាក្រុមហ៊ុន សប្បុរសជននានា យកចិត្តទុកដាក់ធ្វើការកែលំអទាំងផ្នែកបរិស្ថាននិងសំភារៈផ្សេងៗជាច្រើនប្រភេទសំរាប់ហាត់ប្រាណផងនិងសំរាប់ឱ្យក្មេងៗលេងកំសាន្តផងទៅតាមចំណង់ចំណូលចិត្តរបស់មហាជនទូទៅ។
បងប្អូនប្រជាពលរដ្ឋដែលបានមកកំសាន្តនៅទីនោះបាននិយាយថាៈ កាលពីមុនទីនេះមានសភាពស្ងាត់ជ្រងំហើយក៏ពុំសូវមានទេសភាពរឺក៏សំភារៈសំរាប់ធ្វើការហាត់ប្រាណនិងឧបករណ៏សំរាប់ឱ្យក្មេងៗបានលេងកំសាន្តនោះដែរដែលវាខុសប្លែកទាំងស្រុងនាពេលបច្ចុប្បន្នតែម្តង។
ប្រភពដដែលបានបន្តថាៈ គាត់នាំកូនមកលេងទីនេះជារៀងរាល់ល្ងាចតែម្តងលើកលែងតែពេលដែលមានភ្លៀងតែប៉ុណ្ណោះដែលមិនបានមកពីព្រោះថាកូនៗរបស់គាត់នៅពេលមានចិត្តសប្បាយរីករាយខ្លាំងណាស់ដោយសារតែវាបានលេងនូវឧបករណ៏ប្លែកៗដែលទើបត្រូវបានបំពាក់បន្ថែមនិងធ្វើការជួសជុលកែលំអមានសភាពស្រសបំព្រងមិនចាញ់កន្លែងផ្សេងៗប៉ុន្មាននោះទេ។ ម្យ៉ាងទៀតសួនកុមារមានទីតាំងនៅចំកណ្តាលក្រុងស្វាយរៀងតែម្តងងាយស្រួលក្នុងការធ្វើដំណើរនៅជិតផ្ទះកន្លែងក៏ស្អាតថែមទាំងមិនចាំបាច់ចំណាយថវិកាសំរាប់ចូលលេងកំសាន្តថែមទៀតផង។
ចំណែកបងប្អូនប្រជាពលរដ្ឋដែលចូលចិត្តហាត់ប្រាណពេលព្រឹកព្រលឹមវិញក៏បានឱ្យថាៈសួនកុមារនាពេលបច្ចុប្បន្នគឺសម្បូរសម្ភារៈផ្សេងៗជាច្រើនប្រភេទសម្រាប់ហាត់ប្រាណមានដូចជា កន្លែង បង្វិលកង លើកទម្ងន់ របៀបធាក់កង់ជាដើមអាចឱ្យពួកគាត់ហាត់ប្រាណដើម្បីសុខភាពដោយពុំចាំបាច់ចំណាយប្រាក់សូម្បីតែមួយរយរៀលក្តីគឺ free តែម្តង។
ដោយឡែកប្អូនៗសិស្សានុសិស្សមួយចំនួនក៏បានឱ្យដឹងផងដែរថាៈនៅទីនេះ(សួនកុមារ)គឺមានដើមរុក្ខជាតិលំអប្លែកៗជាច្រើនប្រភេទជាទីទាក់អាម្មណ៏ផងហើយមានម្លប់ត្រឈឹង ត្រឈៃ បើនៅពេលថ្ងៃវិញគឺមានសភាពស្ងាត់ល្អងាយស្រួលសំរាប់អ្នកដែលមកស្វ័យសិក្សាក៏បានពុំមានសម្លេងរំខាននោះទេ ។
សូមបញ្ជាក់ផងដែរថាៈសួនកុមារខេត្តស្វាយរៀងគឺមានទីតាំស្ថិតនៅភូមិមេភ្លើងសង្កាត់ស្វាយរៀងក្រុងស្វាយរៀងខាងក្រោយអគាររដ្ឋបាលសាលាខេត្តស្វាយរៀងចម្ងាយត្រឹមតែជាង៥០ ម៉ែត្រតែប៉ុណ្ណោះ ៕ ដោយ ៖ វ៉ៃគោ
