ខេត្តពោធិ៍សាត់ ៖ រថយន្តដឹកឈើមួយគ្រឿង ដែលពាក់ស្លាកលេខខម ក្រឡាប់នៅវេលាម៉ោង១១និង១៥នាទីយប់ ថ្ងៃទី២៨ ខែមករា ឆ្នាំ២០១៩ ស្ថិតនៅតាមបណ្តោយផ្លូវជាតិលេខ៥៥ ត្រង់ចំណុចដំណាក់ឈើក្រំ ស្ថិតក្នុងភូមិព្រែក ឃុំសំរោង ស្រុកភ្នំក្រវាញ ខេត្តពោធិ៍សាត់ ក្បែរស្នាក់ការផ្នែករដ្ឋបាលព្រៃឈើក្រវាញ ។
បទល្មើសនៃការដឹកជញ្ជូនឈើ ឆ្លងកាត់ស្នាក់ការផ្នែករដ្ឋបាលព្រៃឈើក្រវាញ នៅតែបន្តកើតមានជារៀងរាល់ថ្ងៃ ហើយបើរថយន្តនោះមិនក្រឡាប់ ទំនងជាគ្មាននរណាដឹងថា មានបទល្មើសនៃការដឹកជញ្ជូនឈើនោះដែរ ។
បើតាមសេចក្តីរាយការណ៍បានឲ្យដឹងថា រថយន្តម៉ាកហ៊ីយ៉ាន់ដាយ ពាក់ស្លាកលេខ ខេមរភូមិន្ទ ០២.៣.៦៦៦៦ បានក្រឡាប់ផ្ងារកង់ ចេញសុទ្ធតែឈើប្រណីត ។ នៅក្នុងករណីនេះ អ្នកបើកបរ និងកម្មករម្នាក់ បាននាំគ្នារត់គេចបាត់។
ករណីនៃការដឹកជញ្ជូនឈើចេញពីដែនជម្រកសត្វព្រៃភ្នំឱរ៉ាល់ ក្នុងខេត្តពោធិ៍សាត់ ក៏ដូចជាការដឹកជញ្ជូនឈើមួយចំនួនចេញពីស្រុកភ្នំក្រវាញ នៅតែបន្តកើតមានជារៀងរាល់ថ្ងៃ ក្នុងពេលយប់ ដើម្បីលាក់បាំងភ្នែកសមត្ថកិច្ចជំនាញ ហើយប្រសិនបើរថយន្តមួយគ្រឿងនេះមិនក្រឡាប់នោះទេ ក៏ប្រហែលជាគ្មាននរណាមួយ ដឹងថារថយន្តពាក់ស្លាកលេខខមនេះដឹកឈើខុសច្បាប់ដែរ៕ ដោយ ៖ បញ្ញាស័ក្តិ
