ភ្នំពេញ ៖ ជាផ្នែកមួយនៃការយកចិត្តទុកដាក់ខ្ពស់របស់ខ្លួនចំពោះសកម្មភាពទំនួលខុសត្រូវសង្គម ធនាគារឯកទេស វីង (ខេមបូឌា) លីមីតធីត ដែលជាអ្នកផ្តល់សេវាកម្មធនាគារចល័តនាំមុខគេនៅប្រទេសកម្ពុជា បានសហការជាមួយ សមាគមរោងចក្រកាត់ដេរនៅកម្ពុជា (GMAC) ដើម្បីធ្វើការបរិច្ចាកទឹកប្រាក់ចំនួន ៣៥០០០ ដុល្លារអាមេរិក ដើម្បីចូលរួមចំណែកក្នុងការធ្វើឱ្យប្រសើរឡើងនូវប្រព័ន្ធអប់រំការបណ្តុះបណ្តាល និងការថែទាំសុខភាពរបស់កម្មកររោងចក្រកាត់ដេរនៅកម្ពុជា។ នេះបើតាមសេចក្តីប្រកាសព័ត៌មាន នៅ ថ្ងៃទី២៨ ខែមករា ឆ្នាំ ២០១៩។
កាលពីឆ្នាំ ២០១៨ ធនាគារឯកទេស វីង និង GMAC បានរួមសហការ និងប្តេជ្ញាចិត្តរួមគ្នា ផ្តួចផ្តើមសកម្មភាពទំនួលខុសត្រូវសង្គម (CSR) ក្នុងការបង្កើតមូលនិធិ ដែលផ្ដល់អត្ថប្រយោជន៍ដល់កម្មកររោងចក្រកាត់ដេររបស់ GMAC។ ជាពិសេសជាងនេះទៅទៀត មូលនិធិនេះត្រូវបានបម្រុងទុក សម្រាប់ការទិញសៀវភៅ, ការសាងសង់បណ្ណាល័យ និងគាំទ្រដល់វគ្គបណ្តុះបណ្តាលផ្សេងៗទៀត។ ធនាគារឯកទេស វីង និងសមាគមរោងចក្រកាត់ដេរនៅកម្ពុជា មានទំនាក់ទំនងយ៉ាងជិតស្និទ្ធ ជាមួយសហគមន៍ដែលពួកគេបានផ្ដល់សេវាជូន និងយល់ច្បាស់អំពីការនាំមកនូវផលប្រយោជន៍ចំពោះសហគមន៍ តាមរយៈការពាំនាំធនធានរបស់ពួកគេ សម្រាប់មូលហេតុសក្ដិសម មានដូចជាការអប់រំ និងការថែទាំសុខភាព។
លោក ម៉ានូ រ៉ាចាន់ អគ្គនាយកពាណិជ្ជកម្មធនាគារឯកទេសវីង បានប្រសាសន៍ថា វីង មានក្តីរំភើបខ្លាំងណាស់ ដែលបានធ្វើការជាមួយ GMAC ក្នុងនាមជាក្រុមហ៊ុនក្នុងស្រុកមួយ ដែលធ្វើការដើម្បីប្រជាជនកម្ពុជា ក្នុងការរួមចំណែកក្នុងសង្គម សម្រាប់ផលប្រយោជន៍របស់សមាជិក GMAC ទាំងអស់ ហើយសំខាន់បំផុតនោះ គឺកម្មកររោងចក្ររាប់ពាន់នាក់។
លោក រ៉ាចាន់មានប្រសាសន៍បន្តថា៖ «យើងសង្ឃឹមថា ការរួមវិភាគទាននេះ នឹងជួយកែលម្អនិងធ្វើឲ្យប្រសើរឡើង ចំពោះឧស្សាហកម្មកាត់ដេរកម្ពុជា ដែលត្រូវបានគេរំពឹងថា នឹងទាក់ទាញការវិនិយោគបន្ថែមទៀតមកក្នុងប្រទេស ហើយជាលទ្ធផល ផ្តល់ការងារថ្មីៗបន្ថែមទៀត ដល់ប្រជាពលរដ្ឋកម្ពុជា។»
លោកឧកញ៉ាវ៉ាន់ស៊ូអៀងប្រធានសមាគមរោងចក្រកាត់ដេរនៅកម្ពុជាបានមានប្រសាសន៍ថា មូលនិធិដែលបានចូលរួមនេះនឹងត្រូវបានប្រើប្រាស់ប្រកបដោយប្រសិទ្ធភាពនិងតម្លាភាពបំផុត ដោយវិទ្យាស្ថានបណ្តុះបណ្តាលវិជ្ជាជីវៈវាយនភ័ណ្ឌ (CGTI) ក្នុងកិច្ចខិតខំប្រឹងប្រែងអភិវឌ្ឍធនធានមនុស្សរបស់ខ្លួនដើម្បីគាំទ្រដល់ការរីកចម្រើននិងការអភិវឌ្ឍឧស្សាហកម្មកាត់ដេរក៏ដូចជាសេដ្ឋកិច្ចរបស់កម្ពុជាទាំងមូល។
លោកឧកញ៉ាវ៉ាន់ស៊ូអៀង មានប្រសាសន៍បន្តថា “CGTI មានបេសកកម្មដើម្បីអភិវឌ្ឍសិស្សម្នាក់ៗអំពីអាកប្បកិរិយា ជំនាញ និងចំណេះដឹងសម្រាប់ឧស្សាហកម្មវាយនភ័ណ្ឌនិងសំលៀកបំពាក់នៅកម្ពុជា។ ជាមួយគ្នានេះ យើងសូមថ្លែងអំណរគុណដល់ធនាគារឯកទេសវីង (ខេមបូឌា) លីមីធីតជាថ្មីម្តងទៀតដែលបានដើរតួនាទីជាទំនួលខុសត្រូវសង្គមរបស់ក្រុមហ៊ុនតាមរយៈការផ្តល់វិភាគទានយ៉ាងសប្បុរសដល់វិទ្យាស្ថានបណ្តុះបណ្តាលរបស់យើង»។
បន្ថែមពីលើការបរិច្ចាកប្រាក់ឧបត្ថម្ភ របស់ធនាគារឯកទេស វីង នៅថ្ងៃនេះ ក៏មានពិធីចុះហត្ថលេខា ក្នុងការពង្រីកនូវភាពជាដៃគូយូរអង្វែងរវាង វីង និង GMAC រហូតដល់ឆ្នាំ ២០១៩ ដែលភាពជាដៃគូនេះ បានចាប់ផ្តើមឡើងតាំងពីឆ្នាំ ២០១៦ ក្នុងផ្តល់នូវដំណោះស្រាយផ្នែកហិរញ្ញវត្ថុក្នុងតម្លៃសមរម្យ សម្រាប់កម្មកររោងចក្រ GMAC ជាពិសេសសេវាបើកប្រាក់បៀវត្ស តាមរយៈគណនីវីង របស់ពួកគេ។ ការបរិច្ចាកប្រាក់ 35.000 ដុល្លារអាមេរិក រួមជាមួយសកម្មភាព ទំនួលខុសត្រូវសង្គមរបស់ក្រុមហ៊ុន (CSR) ផ្សេងទៀត គឺជាការឆ្លុះបញ្ចាំងពីតម្លៃ និងការប្តេជ្ញាចិត្តរបស់ វីង ដើម្បីបម្រើសហគមន៍របស់ខ្លួន។
ធនាគារឯកទេសវីង (ខេមបូឌា) លីមីតធីត គឺជាអ្នកផ្តល់សេវាកម្មធនាគារតាមទូរស័ព្ទចល័តដំបូងគេនៅកម្ពុជា។ បង្កើតឡើងក្នុងឆ្នាំ២០០៩ ធនាគារឯកទេសវីង បានប្តេជ្ញាផ្តល់សេវាហិរញ្ញវត្ថុ តាមរយៈសេវាកម្មហិរិញ្ញវត្ថុ តាមទូរស័ព្ទចល័ត ទៅកាន់អ្នកមិនមានគណនីធនាគារនិងមិនស្ថិតក្នុងបណ្តាញធនាគារ ដោយផ្តល់ជូននូវសេវាកម្មដូចជា ការផ្ទេរប្រាក់ក្នុងស្រុក, ទូទាត់វិក័យប័ត្រនិងបញ្ចូលទឹកប្រាក់ទូរស័ព្ទ, ទូទាត់តាមអ៊ិនធឺណែត និង QR កូដ ក៏ដូចជាសេវាកម្មផ្ទេរប្រាក់អន្តរជាតិភ្លាមៗពីជាង ២០០ប្រទេស។
ធនាគារឯកទេសវីង នៅតែជាអ្នកនាំមុខគេនៅក្នុងទីផ្សារ នៃសេវាទូទាត់ប្រាក់តាមទូរស័ព្ទចល័ត និងអេឡិចត្រូនិច នៅក្នុងប្រទេសកម្ពុជា ដោយមានសេវាគ្របដណ្តប់ដល់ស្រុក ១០០% តាមរយៈភ្នាក់ងារ Wing Cash Xpress នៅទូទាំងប្រទេសជាង ៦០០០ កន្លែង។ វីង មានដៃគូអាជីវកម្ម ជាង ៣០០០០ កន្លែង រួមទាំងក្រុមហ៊ុនធំដូចជា Mastercard និង WorldRemit ។ លើសពីនេះទៀតសហគ្រាសធុនតូចនិងមធ្យម ក៏ដូចជាក្រុមហ៊ុនធំ ៗ អាចប្រើប្រាស់សេវាប្រាក់បៀវត្សរ៍ និងចំណាយរបស់ វីង ដើម្បីជួយអភិវឌ្ឍប្រព័ន្ធអេកូទូទាត់ របស់ខ្លួន។
អំពីសមាគមរោងចក្រកាត់ដេរនៅកម្ពុជា
សមាគមរោងចក្រកាត់ដេរនៅកម្ពុជា (GMAC) គឺជាអ្នកតំណាងឱ្យឧស្សាហកម្មសម្លៀកបំពាក់ និងស្បែកជើងនៅប្រទេសកម្ពុជា។ GMAC ត្រូវបានបង្កើតឡើងនៅឆ្នាំ ១៩៩៦ ដោយសារតែតម្រូវការកើនឡើង សម្រាប់ឧស្សាហកម្មកាត់ដេរ និងស្បែកជើង ដើម្បីរួមគ្នាជាមួយសម្លេងបង្រួបបង្រួមមួយ។ GMAC បានក្លាយជាសមាគម ដែលត្រូវបានទទួលស្គាល់នៅក្នុងប្រទេស ក្នុងការលើកកម្ពស់ និងការពារសិទ្ធិ និងផលប្រយោជន៍របស់ឧស្សាហកម្មកាត់ដេរ ដែលបានផ្តល់ការងារចំនួនកន្លះលាន ដោយផ្ទាល់ និងការងារចំនួនពីរលាន ដោយប្រយោលដល់ប្រជាជនកម្ពុជា។
GMAC ផ្តល់វេទិកាមួយសម្រាប់ការពិគ្រោះយោបល់ និងពិភាក្សាគ្នាក្នុងចំណោមសមាជិក ដែលមានផលប្រយោជន៍រួម និងស្វែងរកការអនុម័តនូវគោលការណ៍ និងការអនុវត្តគោលនយោបាយ និងបរិយាកាសផ្នែកច្បាប់។ តួនាទីដ៏សំខាន់បំផុតរបស់ GMAC គឺដើម្បីទទួលបានឥទ្ធិពលលើគោលនយោបាយ និងបរិយាកាសច្បាប់ ដោយធានាថា វាអំណោយផលដល់កំណើន និងការអភិវឌ្ឍឧស្សាហកម្មកាត់ដេរនៅកម្ពុជា។ លើសពីនេះទៀត GMAC ក៏ផ្តល់នូវសេវាកម្មបន្ថែមតម្លៃផ្សេងៗទៀត ដល់សមាជិកផងដែរ៕ ដោយ ៖ កូឡាប
