ភ្នំពេញ ៖ ទីតាំងបើកល្បែងស៊ីសងភ្នាល់បាល់ ដែលលេងនៅតាមបណ្តាក្លិបបាល់ទាត់ល្បីៗនានា នៅលើពិភពលោក ដែលជ្រកក្រោមស្លាកអ៊ីនធើណិត២៤ម៉ោង ត្រូវបានកម្លាំងនគរបាលខណ្ឌឫស្សីកែង សហការជាមួយកម្លាំងគណៈបញ្ជាការខណ្ឌ តាមដានរហូតឈានដល់ការបង្ក្រាបជាក់ស្តែង នៅថ្ងៃទី២៩ ខែមករា ឆ្នាំ២០១៩ វេលាម៉ោង១១នឹង៣០នាទី នៅចំណុចផ្ទះលេខ១៩២២ ផ្លូវជាតិលេខ៥ ក្រុម១ ភូមិផ្សារតូចសង្កាត់ទួលសង្កែទី១។
លោកវរសេនីយ៍ទោ គល់ យី អធិការនគរបាលខណ្ឌឫស្សីកែវ បានឱ្យដឹងថា ក្នុងប្រតិបត្តិការនេះ កម្លាំងសមត្ថកិច្ចបានឃាត់មនុស្ស២នាក់ រួមមានទី១-ឈ្មោះ អូន សុធន់ ភេទប្រុស អាយុ២៧ឆ្នាំ មុខរបរមេការចាត់ចែងស៊ីសង ស្នាក់នៅផ្ទះទីតាំងខាងលើភ្នាក់ងារ និងទី២-ឈ្មោះហ៊ឹម សុហ៊ុន ភេទប្រុស អាយុ២៦ឆ្នាំ មុខរបរបើកបរ ស្នាក់នៅផ្លូវរថភ្លើងសង្កាត់ទឹកល្អក់១ ខណ្ឌទួលគោក ជាអ្នកលេងភ្នាល់បាល់។ សម្ភារៈដកហូត រួមមាន កុំព្យូទ័រចំនួន១០គ្រឿង សៀវភៅកត់ភាគរយរបស់ភ្ញៀវ១ក្បាល សៀវភៅកត់ចំណាយចំណូលប្រចាំខែ ប្រាក់រៀលចំនួនប្រាំម៉ឺន ប្រាក់ដុលារ១៥$។កម្លាំងជំនាញអធិការដ្ឋាន កំពុងកសាងសំណុំរឿងបញ្ជូនតាមនីតិវិធី ។
សូមជម្រាបជូនថា សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី ក្រសួងមហាផ្ទៃ និងលោក ឃួង ស្រេង អភិបាលនៃគណៈអភិបាលរាជធានីភ្នំពេញ និងលោកស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ សុទ្ធតែធ្លាប់បានចេញបទបញ្ជា ឲ្យមន្ត្រីថ្នាក់ក្រោមបង្គ្រាប ទីតាំងល្បែងស៊ីសងគ្រប់ប្រភេទ ពិសេសអ៊ីនធើណិត២៤ម៉ោង បង្កប់ល្បែងស៊ីសងចាក់ភ្នាល់អនឡាញ ក្នុងរាជធានីភ្នំពេញតែម្តង ព្រោះវាជាមូលហេតុនាំឲ្យមានសកម្មភាពចោរលួច ឆក់ និងចោរប្លន់។
មហាជននឹងរង់ចាំមើលថា តើអាជ្ញាធរ ចុះទៅបង្ក្រាប ហាងអ៊ីនធើណិតនៅទីតាំងផ្សេងៗទៀតដែរឬទេ? ព្រោះក្នុងខណ្ឌឫស្សីកែវទាំងមូល មានទីតាំងភ្នាល់បាល់អនឡាញ ច្រើនណាស់ ឬក៏បានទទួលសំណែន ដូចវេទិកាតុកាហ្វេខ្សឹបខ្សែវមែន៕ ដោយ ៖ បញ្ញាស័ក្តិ