ស្ត្រីអ្នកដំណើរម្នាក់ដែលមានការជ្រួលច្របល់យ៉ាងខ្លាំង ដោយសារខកការចុះចត (ជិះហួសចំណត) ត្រូវបានប្រទះឃើញឈរពាំងពីមុខឡានក្រុង បានបង្កឲ្យស្ទះការធ្វើដំណើរអស់រយៈពេល ២០ នាទី ។ ហេតុការណ៍នេះបានកើតឡើងកាលពីយប់ថ្ងៃសៅរ៍ នៅក្នុងតំបន់ Tai Seng ក្បែរផ្លូវ Upper Paya Lebar ប្រទេសសិង្ហបុរី ។
បុរសម្នាក់ឈ្មោះ Pravin Kuma អាយុ ៤០ ឆ្នាំ ជាអ្នកគ្រប់គ្រងប្រតិបត្តិការ នៅក្នុងឧស្សាហកម្មម្ហូបអាហារ និងភេសជ្ជៈ បានកាត់ត្រាពីទិដ្ឋភាពនេះ ហើយបង្ហោះវីដេអូចូលបណ្តាញសង្គម ។
គាត់បានប្រាប់កាសែត The New Paper ថា ហេតុការណ៍នេះបានកើតឡើងនៅវេលម៉ោង ១១ និង ៣០ នាទីយប់ ហើយមានមនុស្សប្រហែល ៣០ នាក់ នៅលើរថយន្ត២ជាន់ នៅពេលនោះ ។
គាត់និយាយថា៖ «ខ្ញុំកំពុងស្ថិតនៅលើផ្លូវធ្វើដំណើរទៅកាន់ផ្ទះ ចេញពី Marine Parade និងកំពុងស្ថិតនៅជាន់ខាងលើ នៅពេលនោះ ខ្ញុំបានលឺសម្លេងដ៏រំជើបរំជួលមួយ» ។
«ខ្ញុំបានចុះ និងបានឃើញស្ត្រីម្នាក់ កំពុងឈរពាំងនៅពីមុខឡានក្រុង ហើយអ្នកបើកបរបានប្រាប់ខ្ញុំជាភាសា Tamil ថា ស្ត្រីនោះបានខកការឈប់នៅចំណតមួយ ហើយកំពុងឡាំប៉ា…» ។
គាត់បានបន្ថែមថា ស្ត្រីនោះគ្រាន់តែនិយាយជាភាសាចិនកុកងឺ (Mandarin) ប៉ុណ្ណោះ ហេតុនេះ អ្នកបើកបរពិតជាមានការពិបាកក្នុងការទំនាក់ទំនងជាមួយនាងយ៉ាងខ្លាំង ។
វីដេអូបានបង្ហាញឲ្យឃើញស្ត្រីនោះ បានស្រែកខ្លាំងៗជាច្រើនដង ទៅកាន់អ្នកដំណើរដទៃ និងប្រធានក្រុមរថយន្តក្រុង ។
នាងអាចត្រូវបានលឺនិយាយថា នាងមានបំណងឈប់នៅ Paya Lebar ប៉ុន្តែ អ្នកបើកបរមិនបានផ្តល់ព័ត៌មាននាងទេ នៅពេលរថយន្តបានមកដល់ចំណត ។
ថ្វីបើអ្នកដំណើរដទៃ និងអ្នកប្រតិបត្តិការរថយន្តក្រុង បានប្រាប់នាងឲ្យឆ្លងផ្លូវឡើងជិះរថយន្តផ្សេង វិលត្រឡប់ទៅកាន់ Paya Lebar ក៏ដោយ ក៏នាងនៅតែបន្តស្រែកឡាំប៉ាដដែល ។
លោក Pravin បានបន្តថា៖ «នាងមិនចង់ស្តាប់ និងហាក់ដូចជាគ្មានការអត់ធ្មត់ឡើយ ។ អ្នកបើកបរកំពុងព្យាយាមអស់ពីសមត្ថភាព ដើម្បីពន្យល់នាង ហើយគាត់ហាក់មានការព្រួយបារម្ភយ៉ាងខ្លាំង ចំពោះការទាមទាររបស់នាង ឲ្យរថយន្តជូននាងត្រឡប់ទៅកាន់គោលដៅរបស់នាងវិញ» ។
គាត់បន្ថែមថា ហេតុការណ៍នេះបានអូសបន្លាយអស់រយៈពេលប្រហែល ២០ នាទី ហើយស្ត្រីនេះបានអនុញ្ញាតឲ្យរថយន្តក្រុងនោះចាកចេញទៅ បន្ទាប់ពីមានប្តីប្រពន្ធមួយនៅឯចំណតបានបញ្ចុះបញ្ចូលនាងកុំឲ្យធ្វើដូច្នេះ ៕ រក្សា
