កណ្ដាល ៖ នារីម្នាក់ស្លាប់នៅកន្លែងកើតហេតុ និងម្នាក់ទៀតរងរបួសស្រាល ពេលពួកគេកំពុងឈប់ម៉ូតូរង់ចាំភ្លើងស្តុប ត្រូវរថយន្តបើកល្បឿនលឿន មកបុកម៉ូតូទាំង២គ្រឿងពីក្រោយ នៅវេលាម៉ោង៦ព្រឹក ថ្ងៃទី២៨ ខែមករា ឆ្នាំ២០១៩ ត្រង់ចំណុចស្តុបA9. ផ្លូវលេខ២១ កែងផ្លូវ១១៥ ស្ថិតក្នុងភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្ដាល ។
មន្ត្រីនគរបាលចរាចរណ៍ក្រុងតាខ្មៅ បានឲ្យដឹងថា រថយន្ដបង្កម៉ាកហ៊ីនយ៉ាន់ដាយ ធុនធំ ប្រភេទបែន ពណ៌ស ពាក់ស្លាកលេខព្រះសីហនុ 3A-3743 បើកបរដោយឈ្មោះ ច្រង់ ប៊ុនឆាយ ភេទប្រុស អាយុ៣៣ឆ្នាំ មានទីលំនៅភូមិផ្លូវបំបែក ឃុំទឹកវិល ស្រុកស្អាង ខេត្តកណ្ដាល ។ ចំណែកឯនារីរងគ្រោះស្លាប់បាត់បង់ជីវិតឈ្មោះ ហេង ស្រីលក្ខណ៍ ភេទស្រី អាយុ២៥ឆ្នាំ មានទីលំនៅភូមិកំពង់ពោធិ ឃុំក្រាំងយ៉ូវ ស្រុកស្អាង ខេត្តកណ្ដាល បើកបរម៉ូតូម៉ាកហុងដាគុបជ្រុង ពណ៌សំបកឪឡឹក រីឯជនរងគ្រោះម្នាក់ទៀតរងរបួសស្រាលឈ្មោះ សឿន ចាន់ថូ ភេទប្រុស អាយុ២៥ឆ្នាំ មានទីលំនៅភូមិពោធ៍ក្រោម ឃុំត្រើយស្លារ ស្រុកស្អាង ខេត្តកណ្ដាល បើកបរម៉ូតូម៉ាកស៊ុយហ្ស៊ូគីឡែត ពណ៌ស ពាក់ស្លាកលេខកណ្ដាល 1Q-6999 ។
នៅមុនពេលកើតហេតុ សាក្សីបានឃើញរថយន្ដបង្កម៉ាកហ៊ីយ៉ាន់ដាយ ធុនធំបើកបរដោយក្នុងទិសដៅពីត្បូងទៅជើង បើកបរដោយល្បឿនលឿន មកដល់ចំណុចភ្លើងស្ដុបព្រែកសំរោង រថយន្ដខាងលើ មិនគោរពភ្លើងសញ្ញា បោះពួយល្បឿនលឿន បានជ្រុលទៅបុកម៉ូតូជនរងគ្រោះ២គ្រឿង ដែលកំពុងឈប់រង់ចាំភ្លើងស្ដុបពីក្រោយ បណ្ដាលឲ្យនារីជាអ្នកបើកបរម៉ូតូហុងដាគុបជ្រុង ស្លាប់ភ្លាមៗនៅកន្លែងកើតហេតុ រីឯជនរងគ្រោះជាអ្នកបើកបរម៉ុតូហុងដាស្កុបពីរងរបួសស្រាល ។
កម្លាំងនគរបាលចរាចរណ៍ បានធ្វើការអន្ដរាគមន៍ ឃាត់រថយន្ដ និងអ្នកបើកបរយកមកអធិការដ្ឋាននគរបាលក្រុង ។ ចំណែកឯម៉ូតូទាំង២គ្រឿង ត្រូវបានកម្លាំងនគរបាលជំនាញចុះធ្វើការវាស់វែង យកទៅរក្សាទុកនៅអធិការដ្ឋាននគរបាលស្រុក ដើម្បីចាត់ការតាមនីតិវិធីច្បាប់ ៕ ដោយ ៖ បញ្ញាស័ក្តិ