តុលាការកំពូលក្នុងប្រទេសវេណេហ្ស៊ុយអេឡា បានហាមប្រាមមេដឹកនាំបក្សប្រឆាំង លោក Juan Guaodo មិនអោយចាកចេញពីប្រទេស និងបង្កគណនេយ្យធនាគាររបស់លោកទាំងអស់។
វិធានការរបស់តុលាការកើតឡើងក្រោយពេលមានការតវ៉ាប្រឆាំងយ៉ាងខ្លាំងទៅនឹងប្រធានាធិបតី
Nicolas Maduru។ មេបក្សប្រឆាំងវេណេហ្ស៊ុយអេឡា បានប្រកាសខ្លួនជាប្រធានាធិបតីបណ្តោះអាសន្ន។
រូបលោក ត្រូវបានប្រកាសគាំទ្រដោយសហរដ្ឋអាមេរិច ប៉េរូ កាណាដា និងបណ្តាប្រទេសផ្សេងៗជាច្រើនទៀត។ ចំនែកប្រធានាធិបតី Nicolas Maduru វិញក៏មានសម្ព័ន្ធមិត្តគាំទ្រផងដែរ ដូចជាចិន និងរុស្សី។
បណ្តាលប្រទេសនៅអាមេរិចខាងត្បូង និងខាងជើង បានប្រកាសប្រឆាំងពីការធ្វើអន្តរាគមន៍ផ្នែកយោធានៅក្នុងប្រទេសវេណេហ្ស៊ុយអេឡា។
រដ្ឋមន្ត្រីការបរទេសប៉េរូ លោក Nestor Popolizio បានថ្លែងថា អង្គការ Lima ដែលមានប្រទេស ១៤ ដែលត្រូវបានបង្កើតឡើងក្នុងឆ្នាំ ២០១៧ ដើម្បីស្វែងរកដំណោះស្រាយសន្តិភាពក្នុងប្រទេសវេណេហ្ស៊ុយអេឡា ប្រកាសប្រឆាំងការធ្វើអន្តរាគមន៍ផ្នែកយោធាក្នុងប្រទេសនេះ។
ចំណែកមន្ត្រីអាមេរិចវិញបានអះអាងថា ជំរើសទាំងអស់ក្នុងការដោះស្រាយវិបត្តិគឺមាននៅលើតុអស់ហើយ។
សេដ្ឋកិច្ចវេណេហ្ស៊ុយអេឡាបានជួបវិបត្តិដាំក្បាលចុះយ៉ាងខ្លាំងក្នុងកំឡុងការកាន់តំណែងរបស់លោក Nicolas Maduru។ អតិផរណា និងការខ្វះខាតផ្សេងៗបណ្តាលឲ្យប្រជាជននៃប្រទេសនេះជាង ៣លាននាក់បានរត់ចោលស្រុក។
បច្ចុប្បន្ន បាតុកម្មបានកើតឡើងទូទាំងប្រទេស ចាប់តាំងពីលោក Nicolas Maduru បានស្បថចូលកាន់តំណែងកាលពីដើមខែនេះ សម្រាប់អាណត្តិទី ២របស់លោក។ គាត់បានជាប់ឆ្នោតកាលពឆ្នាំមុន ដ៏ចម្រូងចម្រាស់ ដែលមេបក្សប្រឆាំងត្រូវបានគេហាមឃាត់ មិនអោយចូលការបោះឆ្នោត ៕ សុភ័ក្ត្រ
ប្រភព៖ BBC