ភ្នំពេញ ៖ របាយការណ៍ស្តីពីស្ថានភាពសិទិ្ធមនុស្សនៅកម្ពុជា ត្រូវបានដាក់ចូលទៅក្រុមប្រឹក្សាសិទិ្ធមនុស្សនៃអង្គការសហប្រជាជាតិនាថ្ងៃនេះ ដើម្បីធ្វើការត្រួតពិនិត្យ ដែលនេះជាផ្នែកមួយនៃនីតិវិធីនៃការត្រួតពិនិត្យ ជាសាកល និងជាទៀងទាត់ (UPR)។ នេះបើតាមការផ្សាយរបស់អង្គការ លីកាដូនៅថ្ងៃទី៣០ខែមករាឆ្នាំ២០១៩។
អង្គការ លីកាដូ បានចូលរួមចំណែក នៅក្នុងរបាយការណ៍រួមចំនួនពីរ ដែលរៀបរៀងឡើងដោយអង្គការសហព័ន្ធសិទ្ធិមនុស្សអន្តរជាតិ (FIDH) និង វេទិកាអាស៊ានសម្រាប់សិទិ្ធមនុស្ស និងការអភិវឌ្ឍន៍ (FORUM-ASIA)ដោយបានបង្ហាញនូវការបង្ក្រាបរបស់អាជ្ញាធររដ្ឋមកលើអ្នកការពារសិទិ្ធមនុស្ស សារព័ត៌មាន និងក្រុមសង្គមស៊ីវិល ហើយនិងផលវិបាកនៃការរំលោភសិទិ្ធដីធ្លី។
របាយការណ៍រួម ដែលត្រូវបានរៀបរៀងឡើងដោយ អង្គការសហព័ន្ធសិទ្ធិមនុស្សអន្តរជាតិ (FIDH) និង អង្គការសម្ព័ន្ធខ្មែរជំរឿន និងការពារសិទិ្ធមនុស្ស លីកាដូ និងត្រូវបានផ្ញើទៅកាន់កិច្ចប្រជុំលើកទី៣២ នៃក្រុមការងារស្តីពីការត្រួតពិនិត្យជាសាកល និងជាទៀងទាត់ (UPR) គឺនិយាយអំពីលំហនៃការអនុវត្តសិទិ្ធរបស់ក្រុមសង្គមស៊ីវិល និងអ្នកការពារសិទិ្ធមនុស្ស។
របាយការណ៍រួមមួយទៀត ដែលត្រូវបានរៀបរៀងឡើងដោយ អង្គការសហព័ន្ធសិទ្ធិមនុស្សអន្តរជាតិ (FIDH) អង្គការសម្ព័ន្ធខ្មែរជំរឿន និងការពារសិទិ្ធមនុស្ស លីកាដូ និង វេទិកាអាស៊ានសម្រាប់សិទិ្ធមនុស្ស និងការអភិវឌ្ឍន៍ (FORUM-ASIA) និយាយអំពីការរំលោភយកដីធ្លី និងការរំលោភសិទិ្ធដែលពាក់ព័ន្ធនឹងដីធ្លី។ ដោយ៖កូឡាប
