អ្នកដំណើរនៅលើរថយន្តក្រុងមួយ និងក៏ដូចជាអ្នកដំណើរផ្សេងៗទ ដែលកំពុងចោមរោមមើលនៅលើដី បាននាំគ្នាស្លុតរន្ធត់យ៉ាងខ្លាំង នៅពេលអ្នកជិះម៉ូតូម្នាក់ បានផ្ទុះកំហឹងយ៉ាងខ្លាំងឈានដល់ប្រើអំពើហិង្សាវាយតប់គ្នាយ៉ាងសាហាវចាប់ពុំឈ្នះឡើយ ។ ហេតុការណ៍នេះ បានកើតឡើងកាលនៅក្នុងទីក្រុងបាងកក ប្រទេសថៃ កាលពីថ្ងៃសៅរ៍ ទី២៦ ខែមករា ឆ្នាំ២០១៩ ។
យោងតាមប្រភពព័ត៌មាន បានឲ្យដឹងថា អ្នកជិះម៉ូតូម្នាក់ពាក់អាវយឺតពណ៌ខ្មៅ បានផ្ទុះកំហឹងមុន បន្ទាប់ពីគាត់បានអះអាងថា រថយន្តក្រុងនោះបានបើកបំពានផ្លូវរបស់គាត់ ។ គាត់បន្ទាប់មក បានឈប់ម៉ូតូពាំងផ្លូវរថយន្តក្រុងនេះមិនឲ្យធ្វើដំណើរកើត ។
នៅពេលរថយន្តឈប់ ស្រាប់តែអ្នកជិះម៉ូតូនេះ បានដើរចូលមកច្រកទ្វារ និងជជែករឿងនេះពីរបីមាត់ ក៏ស្ទុះឡើងរថយន្ត និងហៅតៃកុងចុះដីវ៉ៃគ្នាមួយស្មើ ។ មានអី តៃកុងចិត្តសឿងដែរ ក៏លោតចុះភ្លែត វ៉ៃគ្នាផ្អើលអ្នកដំណើរតែម្តង ។ ទោះយ៉ាងណា ពួកគេទាំងពីរ ចុងក្រោយ ត្រូវបានអ្នកដំណើរជាច្រើនចូលទៅបំបែកចេញពីគ្នាផងដែរ ៕ រក្សា
