ភ្នំពេញ ៖ សម្តេចតេជោ ហ៊ុន សែន បានថ្លែងថា ពិតជាមានមោទនភាព និងកោតសរសើរដោយស្មោះ ចំពោះកីឡាករកីឡាការិនី ដែលប្រកួតឈ្នះ នៅក្នុងការប្រកួតកីឡា SEA Games កាលពីពេលថ្មីៗនេះ ដែលទទួលបានមេដាយមាស សម្រាប់ប្រទេសជាតិ។
នៅព្រឹកថ្ងៃទី១៥ ខែធ្នូ ឆ្នាំ២០១៧ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជួបសំណេះសំណាលផ្តល់កិត្តិយសប្រគល់ប្រាក់រង្វាន់រាជរដ្ឋាភិបាល ជូនកីឡាករ កីឡាការិនី ដែលបានឈ្នះមេដាយមាសក្នុងការប្រកួត SEA Games លើកទី២៩ និងការប្រកួតជើងឯកគ្រប់កម្រិតអន្តរជាតិកន្លងទៅថ្មីៗនេះ។
សម្តេចតេជោ ហ៊ុន សែន នាយករដ្ឋមន្ត្រីសប្បាយរីករាយ និងអបអរសាទរចំពោះជ័យលាភីកីឡាករកីឡាការីនីចំនួន ២១១ នាក់ដែលទទួលបានមេដាយមាស មេដាយប្រាក់ និងមេដៃសំរឹទ្ធិ។ សម្តេចតេជោ បានកោតសរសើរ និងអគុណចំពោះការខិតខំប្រឹងប្រែងរបស់កីឡាករម្នាក់ៗ និងការខិតខំរបស់ក្រសួងអប់រំយុវជន និងកីឡា សហព័ន្ធកីឡា គ្រូបង្វឹកទាំងអស់ ដែលកន្លងមកបានចូលរួមយ៉ាងសកម្មក្នុងការជំរុញវិស័យកីឡាជាតិអោយកាន់តែរីកចម្រើន។
នៅក្នុងថ្ងៃនេះ គឺសម្តេចតេជោ និង សម្តេចកិត្តិព្រឹទ្ធបណ្ឌិតបានផ្តល់ថវិកាផ្ទាល់ខ្លួន ឧបត្ថម្ភលើកទឹកចិត្តដល់កីឡាករកីឡាការិនី ជ័យលាភី និងគ្រូបង្វឹកចំនួន ១០៩.០០០ដុល្លារបន្ថែម ទៅលើថវិការាជរដ្ឋាភិបាលដែលបានចំណាយប្រមាណ ១២ពាន់៥០០លានរៀល។ នេះគឺជាការលើកទឹកចិត្តយ៉ាងខ្លាំងដល់កីឡាករកីឡាការិនីអោយខិតខំប្រឹងប្រែងខ្លាំងឡើងថែមទៀត។ ទន្ទឹមនឹងនោះដែរ សម្តេចតេជោ បានណែនាំ និងលើកទឹកចិត្តក្មួយៗកីឡាករអោយមានភាពថ្លៃថ្នូរស្អាតស្អំ កុំធ្វើដើម្បីតែប្រាក់មួយមុខ។ ព្រោះនេះជាកិត្តិយសរបស់កីឡាករផ្ទាល់ខ្លួនផង និងជាកិត្តិយសរបស់ជាតិផង។
មុននឹងបញ្ចប់ សម្តេចតេជោ ហ៊ុន សែន នាយករដ្ឋមន្ត្រី បានបំពាក់គ្រឿងឥស្សរិយយស ដល់កីឡាករកីឡាការីនី ដែលទទួលបានមេដាយខាងលើ និងបានជូនពរកូនក្មួយៗកីឡាករកីឡាការិនីទាំងអស់ទទួលបានជោគជ័យថ្មីៗថែមទៀត ជាពិសេសនៅក្នុងការប្រកួតកីឡា SEA Games នៅកម្ពុជាក្នុងឆ្នាំ ២០២៣ ខាងមុខ។ ពិធីនេះបានបញ្ចប់ប្រកបដោយបរិយាកាសស្និទ្ឋស្នាល និងរីករាយក្រៃលែង។
ទន្ទឹមនឹងនេះដែរសម្តេចតេជោ បានស្នើសូមក្មួយៗកីឡាករកីឡាការិនីទាំងអស់យោគយល់ និងអធ្យាស្រ័យ ប្រសិនបើមានការយឺតយ៉ាវក្នុងការទទួលប្រាក់ឧបត្ថម្ភ។ សូមក្មួយៗតាំងចិត្តជាអ្នកកីឡាករស្អាតស្អំ ដោយមិនគិត ឬប្តូរយកតែប្រាក់មួយមុខសុខចិត្តទម្លាក់កិត្តិយសខ្លួន និងទម្លាក់ការគាំទ្រពីមជ្ឈដ្ឋានសាធារណៈ។
តម្លៃ និងកិត្តិយសរបស់ក្មួយៗគឺជាមោទនៈភាពជាតិ ជាពិសេសនៅពេលដែលគេប្រគល់ពានមេដាយ ហើយទង់ជាតិរបស់ប្រទេសយើង ត្រូវបានបង្ហោះឡើងអមដោយភ្លេងជាតិ។ នេះហើយគឺជាតម្លៃសំខាន់បំផុតដែលបង្ហាញពីការស្មើភាព និងស្មើសិទ្ធិនៅលើកឆាកអន្តរជាតិដោយមិនគិតថាជាប្រទេសធំ ឬ តូច ប្រទេសអ្នកមាន ឬប្រទេសអ្នកក្រឡើយ។
យើងនឹងបន្តនាំយកមេដាយមាសជាច្រើនថែមទៀតជូនប្រទេសជាតិយើង ជាពិសេសនៅក្នុងការប្រកួតកីឡា SEA Games នៅឆ្នាំ ២០២៣ ខាងមុខ ដែលកម្ពុជាយើងធ្វើជាម្ចាស់ផ្ទះ។
សម្តេចតេជោ បានមានប្រសាសន៍ថា “ដោយសារមានការបង្ហោះព័ត៌មានមិនពិតជាដដែលៗ ខ្ញុំសូមបញ្ជាក់សារជាថ្មីអោយបងប្អូនជនរួមជាតិបានជ្រាបថា ខ្ញុំគ្មានប្រាក់លាក់ទុកនៅបរទេសដូចការបំប៉ោងដ៏អាក្រក់បំផុតរបស់ជនខិលខូចមួយចំនួនទេ។ បើបរទេសណាចង់បង្កកប្រាក់មេដឹកនាំគណបក្សប្រជាជន ឬមន្ត្រីរាជរដ្ឋាភិបាល គឺខ្ញុំសូមលើកទឹកចិត្តបន្ថែមអោយធ្វើចុះ។
ទ្រព្យសម្បត្តិខ្ញុំ គឺអាចមើលឃើញនៅតាមវត្តអារាម សាលារៀន មជ្ឈមណ្ឌលកុមារកំព្រា បណ្ណាល័យ ស្រះទឹក អណ្តូងទឹក ស្ពាន ផ្លូវថ្នល់ កូនក្មួយចៅៗសិស្សានុសិស្ស និងកូនក្មួយកីឡាករកីឡាការិនី និងសម្រាប់សង្គ្រោះ និងព្យាបាលអ្នកជំងឺនៅក្នុងប្រទេសកម្ពុជាប៉ុណ្ណោះ”៕ ដោយ៖កូឡាប