កណ្តាល ៖ ស្នងការដ្ឋាននគរបាលខេត្តកណ្តាល បានឲ្យដឹងថា ករណីហិង្សាដោយចេតនាមានស្ថានទម្ងន់ទោស រវាងជនរងគ្រោះ និងជនសង្ស័យ ធ្លាប់មានទំនាស់ពាក្យសម្ដីគ្នា ពេលផឹកស៊ី ហើយកកើតជាគំនុំនឹងគ្នា ជនដៃដល់ បានស្ទាក់កាប់ជនរងគ្រោះ បណ្តាលឲ្យរងរបួសធ្ងន់ ដែលករណីនេះ កើតហេតុ ថ្ងៃទី៣០ ខែមករា ឆ្នាំ ២០១៩ វេលាម៉ោង ១៨និង៣០នាទីចំណុច ដីចម្ការជនរងគ្រោះ ស្ថិតក្នុងភូមិព្រែកលោក ឃុំព្រែកស្ដី ស្រុកកោះធំ ខេត្តកណ្តាល ។
ជនរងគ្រោះ ១ នាក់ ឈ្មោះ អ៊ រ៉េត ភេទ ប្រុស អាយុ៥៨ឆ្នាំ ជនជាតិ ខ្មែរ មុខរបរ កសិករ មានទីលំនៅៗ ភូមិព្រែកប៉ុក ឃុំព្រែកស្ដី ស្រុកកោះធំ ខេត្តកណ្តាល ។ ជនសង្ស័យ១នាក់ ឈ្មោះ លិន សុភ័ក្ត្រ ភេទប្រុស អាយុ៤៦ ឆ្នាំជនជាតិខ្មែរ មុខរបរ កម្មករ មានទីលំនៅភូមិព្រែកលោក ឃុំព្រែកស្ដី ស្រុកកោះធំ ខេត្តកណ្តាល (ឃាត់ខ្លួន)។ វត្ថុតាងចាប់យក កាំបិតផ្គាក់ចំនួន ១ ផ្លែដែក ដងធ្វើពីឫស្សី។
នៅមុនពេលកើតហេតុ ជនរងគ្រោះ និងជនសង្ស័យ ធ្លាប់មានទំនាស់ពាក្យសម្ដីគ្នា ពេលផឹកស៊ី ១លើកមកហើយ។ លុះនៅថ្ងៃទី២៧ ខែមករា ឆ្នាំ២០១៩ ពេលល្ងាច ជនសង្ស័យ ក៏បានកាប់បំផ្លាញដំណាំរបស់ជនរងគ្រោះ ដូចជា ស្វាយ ល្ហុង អស់ជាច្រើនដើម ។
រហូតមកដល់ថ្ងៃទី៣០ ខែមករា ឆ្នាំ២០១៩ វេលាម៉ោង១៨និង៣០នាទី ពេលនោះជនរងគ្រោះ បានជិះម៉ូតូតែម្នាក់ឯង ទៅដាក់ចំណីត្រីក្នុងស្រះ ឯដីចម្ការខ្លួន នៅពេលនោះក៏បានជួបនឹងជនសង្ស័យ លិន សុភ័ក្ត្រ រួចជនរងគ្រោះបានសួរទៅ លិន សូភ័ក្ត្រ ថា បានកាប់ដំណាំរបស់ខ្លួនអស់ប៉ុន្មាន រួចជនរងគ្រោះ បានទាក់ពាក្យសម្ដីគ្នា ជាមួយជនសង្ស័យ ។ ភ្លាមនោះជនសង្ស័យ បានយកកាំបិតផ្គាក់ ដែលនៅជាប់ខ្លួន កាប់ទៅលើជនរងគ្រោះ ឈ្មោះ អ៊ រ៉ែត ជាច្រើនកាំបិត បណ្ដាលឲ្យរងរបួសជាទម្ងន់ រួចជនរងគ្រោះ បានព្យាយាមរត់គេចខ្លួន ឲ្យគេជួយ ។ ក្រោយមកកម្លាំងនគរបាលប៉ុស្តិ៍ព្រែកស្ដី បានទទួលព័ត៌មាននេះ បានចុះទៅដល់កន្លែងកើតហេតុភ្លាមៗ រួចបានតាមស្វែងរកជនសង្ស័យ ហើយបានឃាត់ខ្លួនជនសង្ស័យ រួមនិងវត្ថុតាង បញ្ជូនមកកាន់អធិការដ្ឋាននគរបាលស្រុកកោះធំ ។
បច្ចុប្បន្ន ជនសង្ស័យ លិន សុភ័ក្ត្រ និងវត្ថុតាង ដូចបានចាប់យកខាងលើ ត្រូវបានឃាត់នៅអធិការដ្ឋាន ដើម្បីបន្ត ចាត់ការតាមនីតិវិធី៕ ដោយ ៖ កូឡាប