ភ្នំពេញ ៖ អភិបាលរាជធានីភ្នំពេញលោក ឃួង ស្រេង បានជំរុញឲ្យអភិបាលខណ្ឌទាំង១២ និងមន្ទីរជំនាញ មន្ទីរសាធារណការនិងដឹកជញ្ជូនរាជធានីភ្នំពេញ ពិនិត្យមើលលទ្ធផលផ្លូវជង្ហុកសម្បុកមាន់ និងធ្វើការជួសជុលជាបន្ទាន់ ដើម្បីសម្រួលចរាចរណ៍ ដល់បងប្អូនប្រជាពលរដ្ឋ និងដើម្បីទប់ស្កាត់ការខូចខាតធ្ងន់ធ្ងរ និងកាត់បន្ថយការចំណាយថវិកាជាតិ។ ក្នុងនោះ ខណ្ឌចំនួន៤កណ្តាលរាជធានីភ្នំពេញ មាន ខណ្ឌ៧មករា ចំការមន ដូនពេញ និងខណ្ឌទួលគោក គឺជួសជុល បាន៩២ភាគរយហើយ រហូតមកដល់ចុងខែមករានេះ។
កាលពីព្រឹកថ្ងៃទី៣១ មករា ២០១៩ ក្នុងប្រជុំត្រួតពិនិត្យឡើងវិញ និងពិភាក្សាបញ្ហាពាក់ព័ន្ធ ការជួសជុលផ្លូវសម្បុកមាន់ នៅក្នុងរាជធានីភ្នំពេញ នៅសាលារាជធានីភ្នំពេញ ដោយមានការចូលរួមពីអាជ្ញាធរខណ្ឌទាំង១២ និងមន្ទីរជំនាញចំណុះឲ្យរដ្ឋបាលរាជធានីភ្នំពេញ។
លោក ឃួង ស្រេង បានថ្លែងបានណែនាំ អភិបាលខណ្ឌទាំង១២ ត្រូវចុះមើលផ្លូវជាប្រចាំ និងធ្វើការជួសជុលផ្លូវ បន្ទាប់ពីផ្លូវបានខូចខាត ក្រោយរដូវវស្សាកន្លងផុតទៅនេះ ពោលគឺបើផ្លូវណាដែលខណ្ឌមិនមានលទ្ធភាពជួសជុល ខណ្ឌត្រូវធ្វើរបាយការណ៍ ឡើងមករដ្ឋបាលរាជធានីភ្នំពេញ ដើម្បីធ្វើការដោះស្រាយជាបន្ទាន់។ ដោយឡែកមន្ត្រីជំនាញមន្ទីរសាធារណការ និងដឹកជញ្ជូន រាជធានីភ្នំពេញ ត្រូវចូលរួមត្រូតពិនិត្យជាប្រចាំ។
លោកអភិបាល បានបញ្ជាក់ថា គោលបំណងនៃការចុះពិនិត្យ និងជួសជុលផ្លូវខូច ជង្ហុកសម្បុកមាន់នេះ ដើម្បីបង្កភាពងាយស្រួល ជូនប្រជាពលរដ្ឋធ្វើដំណើរ និងចូលរួមកាត់បន្ថយ ការចំណាយការចំណាយថវិកាជាតិ និងជាការទប់ស្កាត់កុំឲ្យមានការខូចខាត ដល់គ្រឹះខាងក្រោមផ្លូវ។
លោក ឃួង ស្រេង ក៏តម្រូវឲ្យខណ្ឌ ត្រូវជូនដំណឹងដល់ម្ចាស់រថយន្តដឹកដី ដឹកខ្សាច់ ត្រូវតែចូលរួមជួសជុលផ្លូវ ដោយសារតែរថយន្តដឹកធ្ងន់នេះហើយ ដែលបណ្តាលឲ្យមានការខូចខាតផ្លូវជាទម្ងន់នោះ។
ពាក់ព័ន្ធនឹងការជួសជុលផ្លូវខាងលើនេះ លោក សាំ ពិសិដ្ឋ ប្រធានមន្ទីរសាធារណៈការ និងដឹកជញ្ជូនរាជធានីភ្នំពេញ បានឲ្យដឹងថា ការជួសជុលផ្លូវខូច ជង្ហុកសម្បុកមាន់ ខណ្ឌ៤ក្នុងក្រុង មានខណ្ឌ៧មករា ចំការមន ដូនពេញ និងខណ្ឌទួលគោក គឺជួសជុលបាន៩២ភាគរយហើយ រហូតមកដល់ចុងខែមករានេះ ចំណែកខណ្ឌ៨ផ្សេងទៀត គឺជួសជុលបានតែ៣០ភាគរយទេ ដោយសារផ្លូវភាគច្រើន ជាផ្លូវបេតុង ដែលត្រូវចំណាយពេល និងថវិកាទំហំធំ។
លោកប្រធានមន្ទីរ បានលើកឡើងថា រហូតដល់ចុងខែមករានេះ នៅសល់ផ្លូវចំនួន១៤០ខ្សែទៀត មិនទាន់បានជួសជុល ប៉ុន្តែទោះបីជាយ៉ាងណាក្តី យើងនឹងធ្វើឲ្យបានរួចរាល់ ក្នុងរយៈពេល៤សប្តាហ៍ បន្ទាប់ពីចូលឆ្នាំចិន វៀតណាមរួច៕ ដោយ ៖ កូឡាប