ខេត្តស្វាយរៀង ៖ គិតត្រឹមថ្ងៃទី៣១ខែមករាឆ្នាំ២០១៩នេះគឺសល់ត្រឹមតែ៤ថ្ងៃទៀតទេដល់ថ្ងៃបុណ្យចូលឆ្នាំថ្មីប្រពៃណី ជាតិចិន -វៀតណាម ដោយឡែកនៅតាមបណ្តាទីផ្សារ ទីប្រជុំជននានាក្នុងក្រុង.ស្រុកក្នុងខេត្តស្វាយរៀងគេសង្កេតឃើញមានការដាក់លក់គោមក្រដាសសែននិងបណ្តាពាក្យស្លោកដែលយកបិតតាំងលំំអតាមគេហដ្ឋាននិងនំគ្រឿងឧភោគបរិភោគចម្រុះជាច្រើនមុខដើម្បីអបអរសាទរនៃពិធីបុណ្យចូលឆ្នាំថ្មីប្រពៃណីចិនវៀតណាមនេះផងដែរ។
បើយើងក្រឡេកមកមើលនៅក្រុងបាវិតវិញ នៅតាមហាងលក់ដូរ ភោគជនីយដ្ឋាន ក្រុមហ៊ុន សហគ្រាស រោងចក្រ កាសុីណូ និង តាមបណ្តាស្រុកមួយចំនួនជាប់និងព្រំដែនកម្ពុជាវៀតណាមនោះក៏មានការរៀបចំតុបតែងដាក់ភ្លើងលំអដើម្បីទទួលទេវតាឆ្នាំថ្មីនៃពិធីបុណ្យចូលឆ្នាំថ្មីប្រពៃណីជាតិចិនវៀតណាមនេះផងដែរ។
សូមបញ្ជាក់ផងដែរថា ថ្ងៃចូលឆ្នាំថ្មីប្រពៃណីជាតិចិនវៀតណាមសម្រាប់ឆ្នាំនេះត្រូវថ្ងៃទី៤-៥-៦-៧ ខែ កុម្ភៈ ឆ្នាំ២០១៩ខាងមុខនេះ។ជាមួយគ្នានេះផងដែរនាពេលកន្លងមកលោក ម៉ែន វិបុល អភិបាលខេត្តស្វាយរៀងក៏ធ្លាប់បានធ្វើការអំពាវនាវដល់ប្រជាពលរដ្ឋទាំងអស់អោយមានការប្រុងប្រយ័ត្នខ្ពស់ចំពោះគ្រោះអគ្គីភ័យដែលអាចកើតមានឡើងជាយថាហេតុជាពិសេស ភ្លើងធូប ភ្លើងទាន ភ្លើងចង្ក្រាន ភ្លើងអគ្គីសនី និង ការដុតក្រដាសសែនព្រេន ជាដើមនិងត្រូវចូលរួមគោរពច្បាប់ចរាចរណ៍ផ្លូវគោកដែលច្បាប់បានដាក់ចេញ រាល់ពេលធ្វើដំណើរត្រូវពាក់មួកសុវត្ថិភាព បើកបររថយន្តត្រូវដាក់ខ្សែក្រវ៉ាត់ និងរាល់ពេលបើកបរកុំពិសារគ្រឿងស្រវឹងហើយត្រូវជៀសវាងអោយឆ្ងាយពីគ្រឿងញៀន៕ ដោយ ៖ វ៉ៃគោ
