ប៉ៃលិន ៖ បើតាមវេបសាយអគ្គស្នងការនគរបាលជាតិបានឲ្យដឹងថា នៅ ព្រឹក ថ្ងៃទី ៣១ ខែមករា ឆ្នាំ២០១៩ នៅស្នងការដ្ឋាន នគរបាលខេត្តប៉ៃលិន មានរៀបចំពិធីប្រកាសផ្ទេរភារកិច្ចតែងតាំងមុខតំណែង និងបំពាក់ឋានន្តរស័ក្តិស្នងការនៃស្នងការដ្ឋាន នគរបាលខេត្តប៉ៃលិន ក្រោមអធិបតីភាពលោកនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិតំណាង ខ្ពង់ខ្ពស់ សម្តេច ក្រ ឡា ហោម ស ខេង ឧបនាយករដ្ឋមន្ត្រី រដ្ឋមន្ត្រី ក្រសួងមហាផ្ទៃ ។
ស្នងការថ្មី នៃស្នងការដ្ឋាននគរបាល ខេត្តប៉ៃលិន គឺលោកឧត្តមសេនីយ៍ទោ សេង សុគន្ធ ត្រូវជំនួសលោកឧត្តមសេនីយ៍ទោ ជា ចាន់ឌិន ដែលត្រូវដាក់ឲ្យចូលនិវត្តន៍កាលពីអំឡុងខែកញ្ញា ឆ្នាំ២០១៨ កន្លងទៅ ។
សូមជម្រាបថា លោកឧត្តមសេនីយ៍ សេង សុគន្ធ មុនត្រូវឲ្យចូលកាន់តំណែងជាស្នងការនគរបាលខេត្តប៉ៃលិន គឺជាស្នងការរងនគរបាលរាជធានី ភ្នំពេញ ហើយត្រូវព្រះមហាក្សត្រខ្មែរទ្រង់ចេញព្រះរាជក្រឹត្យត្រាស់បង្គាប់តម្លើងឋានន្ដរស័ក្ដិថ្នាក់ឧត្តមសេនីយ៍ ទោ(ផ្កាយ២) កាលពីថ្ងៃទី១៦ ខែមករា ឆ្នាំ២០១៩ ថ្មីៗនេះ ។
ថ្លែងក្នុងពិធីនោះ លោកឧត្តមសេនីយ៍ទោ ជា ចាន់ឌិន បានសូមទោសដល់កងកម្លាំងនគរបាលទាំងអស់ក្រោមការដឹកនាំរបស់លោក ដែលមានពាក្យសម្តីលើសលួសណាមួយប៉ះពាល់ទាំងចេតនានិងអចេតនា ព្រោះជាបទបញ្ជាដែលតម្រូវឲ្យអនុវត្តន៍ ហើយការអនុវត្ត តែមានការតឹងតែងនិងធូរខ្លះ ។ លោកក៏សូមអោយកងកម្លាំងទាំងអស់បន្តសហការល្អ និងស្តាប់បទបញ្ជាថ្នាក់លើបន្ថែមទៀត ដើម្បី បម្រើប្រទេសជាតិ និ ប្រជាពលរដ្ឋឲ្យបានល្អ ។
លោកឧត្តមសេនីយ៍ទោ សេង សុគន្ធ ជាស្នងការប៉ៃលិនថ្មីបានឡើងថ្លែងបេ្តជ្ញាអនុវត្តតាមបទបញ្ជា និងផែនការ ថ្នាក់ដឹកនាំ លោកនាយឧត្តមសេនីយ៍សន្តិបណ្ឌិតនេត សាវឿន អគ្គស្នងការនគរបាលជាតិសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី ក្រសួងមហាផ្ទៃឲ្យបានម៉ឺងម៉ាត់ និងមានប្រសិទ្ធភាពខ្ពស់លើការងារក្នុងមូលដ្ឋាននិងអនុវត្តតាមគណៈបញ្ជាការឯកភាពខេត្ត ដើម្បីសំដៅរក្សាអោយបានសន្តិសុខស្តាប់ធ្នាប់សុវត្ថិភាពជួនជាតិ និងពលរដ្ឋ ៕ ដោយ ៖ បញ្ញាស័ក្តិ
