ក្រចេះ ៖ មានករណីផ្ទុះអាវុធមួយបានកើតឡើង ដោយមន្ត្រីយោធាផឹកស៊ីជាមួយគ្នា កើតរឿងទាស់សម្ដីគ្នា ឈានដល់ការបាញ់ប្រហារ បណ្ដាលឲ្យមន្ត្រីយោធាម្នាក់រងរបួសធ្ងន់ បញ្ជូនទៅសង្គ្រោះបន្ទាន់ នៅមន្ទីរពេទ្យបង្អែកខេត្តក្រចេះកាលពីវេលាម៉ោង៤ និង១៥ នាទីរសៀលថ្ងៃទី៣១ ខែមករា ឆ្នាំ២០១៩ នៅចំនុចភូមិអូរគ្រៀង ឃុំអូរគ្រៀង ស្រុកសំបូរ ខេត្តក្រចេះ។
សមត្ថកិច្ចបានឲ្យដឹងថា ជនបង្កឈ្មោះ សៀង សុណាត ជាមន្ត្រីយោធាសឹករងស្រុកសំបូរ បានបាញ់១គ្រាប់ ត្រូវជនរងគ្រោះឈ្មោះសាន សាមន ភេទប្រុស ជាមន្ត្រីយោធា។
បច្ចុប្បន្នជនរងគ្រោះ ត្រូវសមត្ថកិច្ចនាំយកមកសង្គ្រោះបន្ទាន់ នៅមន្ទីរពេទ្យបង្អែកខេត្ត ។ រីឯជនបង្កក្រោយបាញ់រងគ្រោះរួច រត់គេចខ្លួនបាត់។ នៅពេលនេះ ជនបង្កជាមន្ត្រីយោធាស្រុកសំបូរ ពេលស្រវឹងក្លាហ៊ានបាញ់បោះ ត្រូវសមត្ថកិច្ចកំពុងស្រាវជ្រាវតាមចាប់ខ្លួនយកមកផ្តន្ទានទោសតាមច្បាប់ ៕ ដោយ ៖ បញ្ញាស័ក្តិ
