ខេត្តព្រះសីហនុ ៖ មន្ត្រីនាំពាក្យរដ្ឋបាលខេត្តព្រះសីហនុ បានឲ្យដឹងថា ខេត្តនេះ បានទទួលគ្រឿងចក្រសម្រាប់សម្អាតឆ្នេរសមុទ្រចំនួន ២គ្រឿង ផ្តល់ជូនពីក្រសួងទេសចរណ៍ និង១គ្រឿងទៀត បានប្រគល់ជូនរដ្ឋបាលខេត្តកំពត និងខេត្តកែប សម្រាប់កិច្ចការសម្អាតឆ្នេរសមុទ្រ។
ពិធីប្រគល់គ្រឿងចក្រនេះ ធ្វើឡើងកាលពីរសៀលថ្ងៃព្រហស្បតិ៍ទី៣១ ខែមករា ឆ្នាំ២០១៩ នាបរិវេណសាលាខេត្តព្រះសីហនុ ក្រោមអធិបតីភាព ឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងមានវត្តមាន ឯកឧត្តម យន្ត មីន អភិបាលនៃគណៈអភិបាលខេត្តព្រះសីហនុ ព្រមទាំងតំណាងមន្ទីរពាក់ព័ន្ធជុំវិញខេត្តមួយចំនួនទៀត។
ក្នុងពិធីប្រគល់គ្រឿងចក្រនោះដែរ លោក នី ផល្លី អគ្គលេខាធិការរងគណៈ កម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា បានឲ្យដឹងថា បច្ចុប្បន្ននេះខេត្តព្រះសីហនុ មានឆ្នេរសមុទ្រចំនួន៧ ក្នុងនោះឆ្នេរចំនួន៤ កំពុងបើកបំរើសេវាកម្មជូនប្រជាពលរដ្ឋ និងភ្ញៀវទេសចរ ដែលចាំបាច់ត្រូវឲ្យឆ្នេរស្អាត មានសោភ័ណភាព និងមានអនាម័យ ព្រោះកន្លងមកឆ្នេរមួយចំនួនបានរងផលប៉ះពាល់បរិស្ថានជាបន្តបន្ទាប់។
ព្រមជាមួយគ្នានេះ ថ្នាក់ដឹកនាំគណៈកម្មាធិការអភិវឌ្ឍន៍គ្រប់គ្រងតំបន់ឆ្នេរ ថ្លែងអំណរគុណដល់សប្បុរសជន និងវិស័យឯកជននានា ដែលបានចូលរួមសហការទិញគ្រឿងចក្រសម្អាតឆ្នេរបានចំនួន ៣គ្រឿង និងបានប្រគល់ជូនរដ្ឋបាលខេត្តព្រះសីហនុ ២គ្រឿង និងប្រគល់ជូនខេត្តកែប-កំពតចំនួន ១គ្រឿង ដោយខាងមន្ទីរទេសចរណ៍តាមខេត្តនីមួយៗ ធ្វើជាសេនាធិការគ្រប់គ្រងថែរក្សាការពារ សម្អាតឆ្នេរសមុទ្រ នៅតាមខេត្តនីមួយៗ។
នាឱកាសនោះដែរ ឯកឧត្តម ថោង ខុន រដ្ឋ មន្ត្រីក្រសួងទេសចរណ៍ មានជំនឿថា ក្រោយខេត្តទាំអ៣ មានគ្រឿងចក្រសម្រាប់សំអាតឆ្នេរសមុទ្រ លោករំពឹងថា អនាម័យ និងបរិស្ថាននៅតាមឆ្នេរសមុទ្រខេត្តទាំង៣ ខេត្តព្រះសីហនុ កំពត និងខេត្តកែប និងមានសោភ័ណភាពកាន់តែប្រសើរថែមមួយកំរិតទៀត។ ជាងនេះទឿត ថ្នាក់ដឹកនាំនៅតាមខេត្តនីមួយៗ ត្រូវចលនាឲ្យមានការចូលរួមពីប្រជាពលរដ្ឋ សិស្សានុសិស្ស និងវិស័យឯងជន ពិសេសអាជីវករលក់ដូរនៅតាមតំបន់ឆ្នេរ និងតាមសហគមន៍នានាឲ្យចូលរួមសហការក្នុងការងារសម្អាតបរិស្ថានអនាម័យនៅតាមតំបន់ឆ្នេរសមុទ្រ ឲ្យបានទាំងអស់គ្នា ដើម្បីទាក់ទាញកំណើនភ្ញៀវទេសចរឲ្យចូលមកទស្សនាខេត្តជាប់ឆ្នេរសមុទ្រនីមួយៗឲ្យបានច្រើនថែមទៀត។
បន្ថែមលើនេះ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានបញ្ជាក់ថា ខេត្តព្រះសីហនុ ជាខេត្តគោលដៅទេសចរណ៍ សេដ្ឋកិច្ច និងទទួលបានភ្ញៀវក្នុងស្រុកជាង ៧០ម៉ឺននាក់ ក្នុងឆ្នាំ២០១៨ ហើយថានឹងជម្រុញឲ្យខេត្តនេះ ទទួលបានភ្ញៀវជាង ២លាននាក់នាបណ្តាឆ្នាំខាងមុខ។ ព្រលានយន្តហោះអន្តរជាតិខេត្តព្រះសីហនុ មានជើងហោះហើរកើនឡើង ហើយច្រកកំពង់ផែសមុទ្រ ក៏នាំមកនូវភ្ញៀវទេសចរយ៉ាងច្រើនចូលមកកម្សាន្តខេត្តព្រះសីហនុ។
ជាងនេះទៀត ឯកឧត្តម ថោង ខុន បានឲ្យដឹងថា រាជរដ្ឋាភិបាលកម្ពុជា នឹងស្ថាបនាផ្លូវល្បឿនលឿនចេញពីរាជធានីភ្នំពេញ ឆ្ពោះមកកាន់ខេត្តព្រះសីហនុក្នុងពេលឆាប់ៗនេះ។ ឯកឧត្តមរដ្ឋមន្ត្រីបញ្ជាក់ថា មូលដ្ឋានខេត្តព្រះសីហនុ មានផ្លូវគមនាគមន៍ដូចជា៖ ផ្លូវទឹក ផ្លូវអាកាស ផ្លូវដែក ផ្លូវគោក និងមានការអភិវឌ្ឍរីកចម្រើ។ ហើយថា បច្ចុប្បន្ននេះ ខេត្តព្រះសីហនុ មានការអភិវឌ្ឍយ៉ាងគំហុកចាំបាច់ត្រូវរួមគ្នាការពារតំបន់ឆ្នេរសមុទ្រ ការពារទឹកកខ្វក់ហូរចូលសមុទ្រ និងការគ្រប់គ្រងតំបន់ឆ្នេរសម្រាប់កូនចៅជំនាន់ក្រោយ ជាពិសេសការងារសន្តិសុខ សណ្តាប់ធ្នាប់សាធារណៈ ក្នុងក្រុងខេត្តព្រះសីហនុ ត្រូវឲ្យមានរៀបរៀបរយ មានអនាម័យ សោភ័ណភាព និងមានសុខសុវត្ថិភាព។
ឯកឧត្តម ថោង ខុន ឲ្យដឹងដូច្នេះ រួចបញ្ជាក់ថា នៅថ្ងៃខាងមុខ រដ្ឋបាលខេត្តព្រះសីហនុ ត្រូវបណ្តុះបណ្តាលជំនាញបដិសណ្ឋារកិច្ច ដើម្បីបំរើសេវាកម្មទេសចរណ៍ ដើម្បីឈានទៅជួយលើកកម្ពស់ជីវភាពប្រជាពលរដ្ឋ ឲ្យបានប្រសើរថែមទៀត ព្រោះថាបច្ចុបន្នខេត្តនេះ មានការអភិវឌ្ឍយ៉ាងគំហ៊ុក ដូច្នេះចង់មិនចង់ នឹងមានផលប៉ះពាល់ដល់បរិស្ថាន និងសន្តិសុខជាដើម ដែលទាមទារឲ្យផ្នែកពាក់ព័ន្ធ ត្រូវរួមគ្នាសហការគ្នាកាត់បន្ថយផលប៉ះពាល់ទាំងនោះឲ្យមកចំនួនទាបបំផុត៕ ដោយ ៖ ដែនសីមា
