ភ្នំពេញ៖ បុរសម្នាក់ត្រូវបាន សន្តិសុខយកខ្សែភ្លើងជាច្រើនចងរុំទ័ព្ធជុំវិញខ្លួន នៅក្នុងការដ្ឋានសំណង់ខុនដូ “ព្រីមស៍ ផ្លាហ្សា”ក្នុងខណ្ឌចំការមន។ ការចាប់ចងបុរសរូបនោះ ដោយសារតែបានលួចខ្សែភ្លើងពីក្រុមហ៊ុនសំណង់នោះ។
ជនសង្ស័យម្នាក់ឈ្មោះ ហោ សុភី អាយុ៣០ឆ្នាំ ត្រូវបានសន្តិសុខក្នុងការដ្ឋានសំណង់ខុនដូ”ព្រីនស៍ ផ្លាហ្សា” យកខ្សែភ្លើងជាច្រើនចាប់ចង ក្រោយជនសង្ស័យលួចខ្សែភ្លើងយកទៅលក់ បង្កការភ្ញាក់ផ្អើល កាលពីរសៀលថ្ងៃទី១៤ ខែធ្នូ តាមមហាវិថីព្រះនរោត្តម សង្កាត់ទន្លេបាសាក់ ខណ្ឌចំការមន ។
ពាក់ព័ន្ធករណីនេះអ្នកដែលចាប់ចងបុរសរូបក៏ទទួលរងនូវទោសទណ្ឌផងដែរ ទី១ ការប្រឈមបទល្មើសលួច ដែលប្រព្រឹត្តដោយជនសង្ស័យ និង ទី២ ការប្រឈមរបស់សន្តិសុខ ក្រោមការបង្គាប់បញ្ជារបស់ម្ចាស់ការដ្ឋានសំណង់ ជុំវិញការចាប់ចងជនសង្ស័យ ក្រោមរូបភាពនៃការធ្វើទារុណកម្ម ។
កន្លងមក គេតែងតែសង្កេតឃើញថា រាល់មានបទល្មើសកើតឡើងពិសេស បទឆក់ឬបទប្លន់ ជាដើម ប្រជាពលរដ្ឋតែងប្រព្រឹត្តហិង្សាលើជនសង្ស័យ ដែលពេលខ្លះអាចដល់ស្លាប់ថែមទៀងផង ។ បញ្ហានេះ អ្នកច្បាប់ និង មជ្ឈដ្ឋានមួយចំនួន សំណូមពរដល់សាធារណជន មេត្តាយល់ឲ្យច្បាស់ពីបញ្ហានេះ ដែលពេលខ្លះ អាចក្លាយខ្លួនជាជនល្មើសដោយមិនដឹងខ្លួន ។ រាល់បទល្មើសកើតឡើង គប្បីទុកឲ្យសមត្ថកិច្ច មន្ត្រីនគរបាលយុត្តិធម៌ និងតុលាការ ជាអ្នកមានចំណាត់ការផ្លូវច្បាប់វិញ ៕ ដោយ ៖ បញ្ញាស័ក្តិ