ព្រៃវែង៖ នៅព្រឹកថ្ងៃសុក្រ ទី១ ខែកុម្ភៈ ឆ្នាំ២០១៩ លោកជា សុមេធី អភិបាលខេត្តព្រៃវេង និងលោក នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានជាអធិបតី ក្នុងពិធីប្រកាសផ្ទេរភារកិច្ច និងតែងតាំងមុខតំណែង លោកឧត្តមសេនីយ៍ត្រី ព្រំ សន្ធរ ជាស្នងការ នៃស្នងការដ្ឋាននគរបាលខេត្តព្រៃវែង ជំនួសលោកឧត្តមសេនីយ៍ទោ ស្រេង ជា ដែលត្រូវចូលនិវត្តន៍ ។
ឆ្លៀតក្នុងឱកាសនេះផងដែរ លោកជា សុមេធី ថ្លែងកោតសរសើរ ចំពោះការអនុវត្តន៍ការងារ របស់លោកឧត្តមសេនីយ៍ទោ ស្រេង ជា ស្នងការកន្លងមក តែងបានអនុវត្តនូវតួនាទីភារកិច្ច បានយ៉ាងខ្ជាប់ខ្ជួនចំពោះបងប្អូនប្រជាពលរដ្ឋ ក្នុងខេត្តព្រៃវែង ប្រកបដោយការទទួលខុសត្រូវខ្ពស់ ដោយប្រកាន់ខ្ជាប់នូវគោលការណ៍ និងក្រមសីលធម៌ វិជ្ជាជីវៈ ។ ដោយឡែកលោកអភិបាលខេត្ត ក៏អបអរសាទរ ចំពោះលោកឧត្តមសេនីយ៍ត្រី ព្រុំ សន្ធរ ដែលទទួលតំណែងថ្មី និងសូមផ្តាំផ្ញើធ្វើយ៉ាងណា ត្រូវបន្តខិតខំយកចិត្តទុកដាក់ អនុវត្តឱ្យបានខ្លាំងក្លាថែមទៀត ក្នុងសកម្មភាពចាត់តាំងអនុវត្ត គោលនយោបាយភូមិ ឃុំមានសុវត្ថិភាព ឲ្យរឹងមាំនៅគ្រប់មូលដ្ឋាន និងចាត់វិធានការ បង្ការ បង្ក្រាប មុខសញ្ញា និងបទល្មើសនានា ឲ្យបានទាន់ពេលវេលា និងប្រកបដោយប្រសិទ្ធភាពថែមទៀត និងសូមរក្សានូវសាមគ្គីភាព ឯកភាពផ្ទៃក្នុងឱ្យបានល្អប្រសើរបំផុត ៕ ដោយ ៖ កូឡាប
