កំពង់ស្ពឺ ៖ នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានថ្លែងថា នៅក្នុងអង្គភាពមួយ មិនគួរមានឪពុក និងកូន ឬក៏សាច់ញាតិធ្វើការនៅកន្លែងជាមួយគ្នានោះទេ ។
នាយឧត្តមសេនីយ៍ វង្ស ពិសេន ថ្លែងបែបនេះ ក្នុងឱកាសអញ្ជើញប្រកាសតែងតាំង នាយកសាលានាយទាហានសកម្ម ត្មាតពង ដោយឧត្តមសេនីយ៍ឯក ប៊ុត សុភាព ជំនួសឧត្តមសេនីយ៍ឯក ច័ន្ទ សុភក្ត្រា ដែលទទួលភារកិច្ចថ្មី គឺនាយកទីចាត់ការហ្វឹកហ្វឺនអគ្គបញ្ជាការ នាព្រឹកថ្ងៃទី០១ ខែកុម្ភៈ ឆ្នាំ២០១៩នេះ នៅខេត្តកំពង់ស្ពឺ។
នាយឧត្តមសេនីយ៍ វង្ស ពិសេន បានលើកឡើងថា បើសិនជាមានឪពុក និងកូន ឬក៏សាច់ញាតិ ធ្វើការនៅក្នុងអង្គភាពតែមួយ ទោះជាធ្វើល្អយ៉ាងណាក៏ដោយ ក៏គេមិនសូវកោតសរសើរនោះទេ ប៉ុន្ដែផ្ទុយទៅវិញ មានតែគេចោទថា «ប្ដីវា ប្រពន្ធវា ឪវា កូនវាហ្នឹង។
ក្នុងនាមជាមេដឹកនាំ ក្នុងអង្គភាព ខ្ញុំពិតជាខ្លាចខ្លាំងណាស់ ចំពោះរឿងបញ្ហានេះ ព្រោះវាមានតិចណាស់ ដែលគេកោតសរសើរ ចំពោះការខិតខំប្រឹងប្រែងរបស់ពួកគេ ប៉ុន្ដែបើសិនណាជាកូនចៅរបស់គេ ធ្វើអាក្រក់វិញ ប្រាកដណាស់ ច្បាស់ជាគេរិះគន់ជាមិនខាន។
នាយឧត្តមសេនីយ៍ វង្ស ពិសេន បានបន្ថែមថា «នៅក្នុងអង្គភាព ខ្ញុំថា បើល្អបំផុត យើងនៅក្នុងអង្គភាពរបស់យើងនេះ ដែលមានកូនរបស់ខ្លួនឯង ចៅរបស់ខ្លួនឯង បងប្អូនរបស់ខ្លួនឯង ត្រូវធ្វើយ៉ាងម៉េច គ្រប់គ្រងឲ្យបាន ក្លាយទៅជាមនុស្សល្អ ដើម្បីជៀសវាងពីការរិះគន់ ។ បើសិនជាមានកូនចៅ ឬក៏សាច់ញាតិនោះ គួរតែយកឲ្យទៅធ្វើការនៅកន្លែងផ្សេងឲ្យខុសពីកន្លែងរបស់ខ្លួន ដើម្បីឲ្យគេចេញខិតខំ ប្រឹងប្រែងដោយខ្លួនឯង និងមិនចេះអាង»៕ ដោយ ៖ បញ្ញាស័ក្តិ
