ខេត្តព្រៃវែង ៖ លោកនាយឧត្តមសេនីយ៍ សន្តិបណ្ឌិត នេត សាវឿន អំពាវនាវដល់នគរបាល ទាំងអស់ ត្រូវមានការប្រុងប្រយ័ត្ន រាល់ព័ត៌មានបំពុល ខណៈបច្ចុប្បន្នប្រទេសកម្ពុជា មានការប្រឈមជាក់ស្តែង ចំពោះព័ត៌មានបំពុល បរិយាកាស ដោយសារ តែបច្ចេកវិជ្ជា ទំនើប និងដោយសេរី។
ថ្លែងក្នុងពិធីប្រកាសតែងតាំងស្នងការនគរបាលខេត្តព្រៃវែង កាលពីថ្ងៃទី១ខែកុម្ភៈ លោកនាយឧត្តមសេនីយ៍ សន្តិបណ្ឌិតនេត សាវឿន បានមានប្រសាសន៍ ទៅកាន់កងកម្លាំងនគរបាលខេត្តទាំងមូល ដោយសង្កត់ធ្ងន់បន្ថែមទៅលើការអនុវត្តតួនាទី ភារកិច្ច ដែលបានកំណត់ គឺកងកម្លាំងនគរបាលគ្រប់ថ្នាក់ ត្រូវពង្រឹងតួនាទី ធ្វើជាសេនាធិការ ជូនគណៈបញ្ជាការ ឯកភាពគ្រប់ថ្នាក់។ ចាត់វិធានការពង្រឹងស្ថានភាពសន្តិសុខ សណ្តាប់ ធ្នាប់សាធារណៈ ក្នុងខេត្ត ចាត់វិធានការណ៍បង្ក្រាបបទល្មើសគ្រប់ប្រភេទ និងត្រូវបង្កើនការចិត្តទុកដាក់ខ្ពស់ចំពោះ សេវាបម្រើប្រជាពលរដ្ឋ ។ ត្រូវពង្រឹងយន្តការដឹកនាំគ្រប់ថ្នាក់ ប្រើប្រាស់ធនធានមនុស្ស តាមជំនាញ ឲ្យចំគោលដៅ និងដោយការទទួលខុសត្រូវខ្ពស់ ។ ត្រូវធានាការគ្រប់គ្រងកម្លាំងប្រចាំការ នៅតាមទីស្នាក់ការគ្រប់ថ្នាក់ បើកទ្វារពេញ២៤ម៉ោង ។ យកចិត្តទុកដាក់ក្នុងការពង្រឹងការហ្វឹកហាត់ កម្លាំងអន្តរាគមន៍ ។ ត្រៀមការធ្វើ ប្រតិកម្មរហ័ស។ កម្លាំងនគរបាលទាំងអស់ត្រូវមានការប្រុងប្រយ័ត្នឲ្យបានខ្ពស់រាល់ព័ត៌មាន ខណៈបច្ចុប្បន្នប្រទេសកម្ពុជា មានការប្រឈមជាក់ស្តែងចំពោះព័ត៌មានបំពុលបរិយាកាស ដោយសារតែបច្ចេកវិទ្យាទំនើបនិងដោយសេរីនោះ។
នាយឧត្តមសេនីយ៍ បានលើកឡើងថា នាពេលបច្ចុប្បន្ន នេះប្រទេសកម្ពុជាមានប្រព័ន្ធផ្សព្វផ្សាយជាច្រើនប្រភេទ ដោយព័ត៌មាន ខ្លះបាន ផ្សាយដោយបំពុលបរិយាកាស ដើម្បីវាយប្រហារការដឹកនាំរបស់រាជរដ្ឋាភិបាល ព័ត៌មានខ្លះក្លែងក្លាយដើម្បីផលប្រយោជន៍ ផ្ទាល់ខ្លួន និងព័ត៌មានខ្លះមានលក្ខណៈ កណ្តាល។ ដូច្នេះក្នុងនាមយើងជាអាជ្ញាធរ ត្រូវធ្វើការពិចារណាឲ្យបានល្អិតល្អន់ ក្រោយពេល ទទួលបានព័ត៌មានទាំងនោះហើយ។
លោកនាយឧត្តមនាយឧត្តមសេនីយ៍ អគ្គស្នងការនគរបាលជាតិ បានសង្កត់ ធ្ងន់ថា “យើងកំពុងតែ ប្រឈម ជាក់ស្តែងនៅកម្ពុជាយើង ក្នុងការបំពុលព័ត៌មាន។ វាជារឿងធំណាស់ សម្រាប់ព័ត៌មាននេះ ដោយសារតែបច្ចេកវិជ្ជាទំនើប ដោយបច្ចុប្បន្ន សង្គ្រាមចេញពីហ្វេសបុក ចេញពីអនឡាញ ចេញពីយូធ្យូប។ល។ ហើយមួយវិញទៀត គឺចេញពីបណ្តាញប៉ុស្តិ៍វិទ្យុ មានដូចជា វិទ្យុសច្ចៈធម៌ មានវិទ្យុ ដែលអយុត្តិធម៌ មានលក្ខណៈលម្អៀងបែបនយោបាយ និងមានប៉ុស្តិ៍វិទ្យុ ដែលនៅកណ្តាលជាដើម”។
លោកអគ្គស្នងការ បានបន្តទៀតថាៈ ដោយសារតែមានប្រព័ន្ធផ្សព្វផ្សាយ នេះច្រើនហើយ ផ្សាយចេញមានលក្ខណៈខុសៗគ្នានោះ ខ្ញុំបានធ្វើការអំពាវនាវ ដល់នគរបាលទាំងអស់ ត្រូវអប់រំបងប្អូនប្រជាពលរដ្ឋ ឲ្យបានច្បាស់លាស់ទាក់ទងនិងព័ត៌មាននេះ ដើម្បីជៀសវាងការភាន់ច្រឡំ និងបណ្តាលឲ្យមានចលាចល ក្នុងសង្គមនិងប្រទេសជាដើម។
ជាមួយគ្នានោះដែរ លោកនាយឧត្តមសេនីយ៍ សន្តិបណ្ដិត នេត សវឿន ក៏បាន អំពាវនាវដល់ នគរបាលគ្រប់កម្រិតទាំងអស់ ត្រូវត្រៀមខ្លួនអនុវត្តន៍ បទបញ្ជា របស់ តុលាការទាក់ទងនឹងទណ្ឌិត សម រង្ស៊ីផងដែរ ខណៈសំណុំរឿង ចំនួនបីរបស់ទណ្ឌិត ក្រៅច្បាប់មួយនេះ ត្រូវបានតុលាការប្រគល់ឲ្យចាត់វិធានការ៕ ដោយ ៖ កូឡាប