បុរស២នាក់ដែលដើរតួជា ស៊ុន អ៊ូខុង និងលោកបងប៉ាចជេ នៅក្នុងរឿងភាគប្រលោមលោកបុរាណដ៏ល្បីរបស់ចិន «ដំណើរឆ្ពោះទៅកាន់ភាគខាងលិច» ថ្មីៗនេះ ត្រូវបានចាប់ខ្លួន បន្ទាប់ពីចូលរួមពាក់ព័ន្ធជម្លោះមានវាយតប់គ្នានៅលើដងផ្លូវសាធារណៈ ជាមួយភ្ញៀវទេសចរ នៅក្នុងទីក្រុង Dali ប្រទេសចិន ។
ជម្លោះនេះបានកើតឡើងនៅកាលពីយប់ថ្ងៃសៅរ៍ សប្តាហ៍មុន នៅក្នុងទីប្រជុំជនទេសចរណ៍វ័យចំណាស់នៃទីក្រុង Dali ទីកន្លែងដែល «ស៊ុន អ៊ូខុង» និង «ប៉ាជេ» កំពុងនាំគ្នាចេញដើរតាមដងផ្លូវ ដើម្បីស្វែងរកភ្ញៀវទេសចរដែលចង់ចំណាយលុយ បានថតរូបជាមួយពួកគេ ។
យោងតាម Shanghaiist ភ្ញៀវទេសចរនៅក្នុងផ្នែកនៃទីក្រុង Dali ជាធម្មតា បានបង់ថ្លៃតិចតួច ទៅឲ្យអ្នកសម្តែងទាំងពីរ ដើម្បីបានថតរូបអនុស្សាវរីយ៍ជាមួយពួកគេ ។
ក្នុងវីដេអូដែលកំពុងរីករាលដាលនៅលើបណ្តាញសង្គម បានបង្ហាញឲ្យឃើញបុរស២នាក់ ក្នុងសម្លៀកបំពាក់ជាតួអង្គ ស៊ុន អ៊ូខុង និងប៉ាចជេ បានកំពុងព្រួតគ្នាវាយទៅលើបុរសម្នាក់ទៀត ។
បើតាមអាជ្ញាធរក្នុងតំបន់ បញ្ជាក់ប្រាប់កាលពីថ្ងៃចន្ទ តួអង្គទាំងពីរនេះ រួមទាំងភ្ញៀវទេសចរ២នាក់ ត្រូវបានចាប់ខ្លួនហើយ ។ ទោះយ៉ាងណា មូលហេតុដែលនាំឲ្យកើតមានអំពើហិង្សាដ៏គួរឲ្យភ្ញាក់ផ្អើលនេះ ពុំត្រូវបានបញ្ចេញនៅក្នុងរបាយការណ៍នោះទេ ។
បើយោងតាមប្រភពនៅលើបណ្តាញសង្គម នេះពុំមែនជាលើកទី១ទេ ដែលអ្នកដើរតួទាំងពីរនេះ បានកើតមានជម្លោះវាយតប់គ្នាជាមួយភ្ញៀវទេសចរ ។
គួររម្លឹកឲ្យដឹងផងដែរថា ស៊ុន អ៊ូខុង ពិតតួឯកក្នុងរឿង «ដំណើរទៅភាគខាងលិច» នៅក្នុងឆ្នាំ១៩៨៦ គឺសម្ដែងដោយលោក Dong Lu Xiaoling ហើយបច្ចុប្បន្ននេះ លោកមានអាយុ ៦០ ឆ្នាំហើយ ។ ចំណែកដៃគូដ៏ស័ក្ខិសមគាត់ គឺប៉ាចជេ ដែលសម្តែងដោយលោក Ma Lau ឆ្នាំនេះគាត់មានអាយុ ៧៣ ឆ្នាំហើយ ៕ រក្សា