អគ្គលេខាធិការអង្គការសហប្រជាជាតិ លោក Antonio Guterres បានថ្កោលទោសការចាប់ខ្លួនអ្នកការសែតចំនួន ២នាក់នៅក្នុងប្រទេសមីយ៉ានម៉ា និងហៅការចាប់ខ្លួនរបស់ពួកគេថាជាសញ្ញានៃការសឹករិចរឹលនៃសេរីភាពសារព៌តមាន នៅក្នុងប្រទេសមួយនេះ។
អ្នកការសែតសារព៌តមាន Reuters ចំនួន ២នាក់ (ម្នាកឈ្មោះ Wa Lone និងម្នាក់ទៀតឈ្មោះ Kyaw Soe Oo) ត្រូវបានចាប់ខ្លួនកាលពីថ្ងៃអង្គារកន្លងទៅនេះ នៅពេលដែលពួកគេកំពុងតែធ្វើកិច្ចការរបស់ពួកគេ អំពីរឿងជនជាតិដើមភាគតិចរ៉ូហ៊ីងយ៉ា នៅក្នុងរដ្ឋរ៉ាឃីន។
លោក Antonio Guterres ថ្លែងនៅក្នុងសន្និសិតសារព៌តមានកាលពីថ្ងៃព្រហស្បតិ៍ម្សិលមិញនៅទីក្រុងតូក្យូថា “ហេតុផលដែលបណ្តាលឲ្យអ្នកការសែតទាំងនេះត្រូវចាប់ខ្លួន ប្រហែលមកពីពួកគេធ្វើសេចក្តីរាយការណ៏ពីអ្វីដែលពួកគេបានឃើញទាក់ទងទៅនឹងសោកនាដកម្មលើមនុស្សដ៏ច្រើន”។
ការបង្ក្រាបដ៏ឃោរឃៅរបស់កងកំលាំងរដ្ឋាភិបាលមីយ៉ាន់ម៉ាកន្លងទៅលើជនជាតិដើមភាគតិចរ៉ូហ៊ីយ៉ាង ក្នុងរដ្ឋរ៉ាឃីន បានបណ្តាលឲ្យជនជាតិដើមភាគតិចទាំងនោះចំនួន ជិត ៧.០០០នាក់ស្លាប់បាត់បង់ជីវិត និងជាង ៦០០.០០០សែននាក់បានរត់ភៀសខ្លួនទៅកាន់ប្រទេសជិតខាង បង់ក្លាដេស ចាប់តាំងពីអំពើហឹង្សាកើតឡើងពីខែសីហាមក។
បើតាមសេចក្តីរាយការណ៏របស់ Reuters នៅថ្ងៃព្រហស្បតិ៍ពេលល្ងាច រដ្ឋាភិបាលមីយ៉ានម៉ាមិនបានធ្វើការទាក់ទងជាផ្លូវការណាមួយជាមួយនឹងតំណាងរបស់អ្នកការសែតទាំងនោះទេ ហើយចំណែកទីកន្លែងឃុំខ្លួនរបស់ពួកគេក៏មិនទាន់បានដឹងនៅឡើយដែរ។ អ្នកការសែតទាំងពីរនាក់ជាជនជាតិមីយ៉ានម៉ា។
អគ្គលេខាធិការអង្គការសហប្រជាជាតិបានថ្លែងថា “ខ្ញុំគិតថា វាពិតជាមានសារៈសំខាន់ខ្លាំងណាស់ដែលសហគមន៏អន្តរជាតិត្រូវធ្វើអ្វីមួយដើម្បីឲ្យមានការដោះលែងពួកគេ។
ចំនែកសម្ព័ន្ធសារព៌តមានអាស៊ីអាគ្នេយ៏ ដែលតំណាងឲ្យក្រុមអ្នកការសែតចំនួន ១២ក្រុម ក៏បានថ្កោលទោសនឹងការចាប់ខ្លួនអ្នកការសែតទាំងនោះផងដែរ និងស្នើឲ្យមានការដោះលែងពួកគេ៕ សុភ័ក្ត្រ