ខេត្តព្រះសីហនុ ៖ រដ្ឋបាលក្រុងព្រះសីហនុ សហការជាមួយស្ថាប័នកងកម្លាំងប្រដាប់អាវុធមន្ទីរបរិស្ថាន និងមន្ទីរសាធារណ:ការ និងដឹកជញ្ជូនខេត្ត បានចុះរៀបចំសណ្តាប់ធ្នាប់ផ្លូវផែទូកទេសចរណ៍ ៥០២ មានទីតាំងនៅម្តុំឆ្នេរអូរឈើទាល ដោយបានចាប់យកសម្ភារៈមួយចំនួន ដែលអាជីវករ ឬប្រតិបត្តិករទេសចរ ដាក់តាំងលើចំណីផ្លូវសាធារណៈ នាំអោយប៉ះពាល់ដល់ការធ្វើដំណើរ ដោយយកសម្ភារៈទាំងនោះ យកមករក្សាទុកនៅសាលាក្រុង ហើយមិនប្រគល់ឲ្យម្ចាស់វិញទេ។
អភិបាលក្រុងព្រះសីហនុ លោក អ៊ី សុខឡេង បានអោយដឹងក្នុងបណ្តាញសង្គមហ្វ៊ែសប៊ុក Facebook) របស់លោកថា មុននឹងក្រុមការងារចុះចាប់យកសម្ភារៈទាំងនោះ គឺក្រុមអាជ្ញាធរក្រុងបានចុះវាស់វែង និងបានបាញ់ថ្នាំ កំណត់ចិញ្ចើមផ្លូវច្បាស់លាស់ និងបានចុះអប់រំ ណែនាំ ដល់ប្រតិបត្តិករទេសចរ ឬប្រជាពលរដ្ឋរស់នៅអមផ្លូវផែ ៥០២ ចំនួន ៥លើក រួចមកហើយ ប៉ុន្តែនៅមានប្រជាពលរដ្ឋ និងអាជីវករមួយចំនួនតូច មិនអនុវត្តតាម ទើបអាជ្ញាធរ ចាត់វិធានការ រដ្ឋបាលចុះចាប់យកសម្ភារៈទាំងនោះ។
ករណីនេះ លោកថា អាចនឹងមានវិធានការផ្លូវច្បាប់ជាបន្តនាថ្ងៃខាងមុខទៀត បើមានអាជីវករផ្សេងទៀត មិនចូលរួមសហការជាមួយរដ្ឋបាលក្រុងព្រះសីហនុ លើការងារថែរក្សាសណ្តាប់ធ្នាប់តាមផ្លូវសាធារណៈតាមផ្លូវផែទូកទេសចរណ៍ ៥០២ និងនៅតាមផ្លូវសាធារណៈមួយចំនួនទៀត ដែលក្រុមការងាររដ្ឋបាលក្រុងព្រះសីហនុ បានចុះអប់រំ និងណែនាំ នាពេលកន្លងមកនោះទេ៕ ដោយ៖ ដែន សីមា