ខេត្តព្រៃវែង ៖ រថយន្តសាំយ៉ុងដឹកភ្ញៀវទេសចរ១គ្រឿង បើកវ៉ាជែងក្នុងស្ថានភាពគ្រោះថ្នាក់ បានធ្វើអោយ បានជ្រុលចង្កូតធ្លាក់ចេញពីផ្លូវ ទៅដល់ជើងទេខាងក្រោមផ្លូវ បណ្តាលអោយស្ត្រីចំនួន៣នាក់បានរងរបួសធ្ងន់និងស្រាល កាលពីវេលាម៉ោង១០ព្រឹក ថ្ងៃទី៣កុម្ភៈ នៅលើកំណាត់ផ្លូវជាតិលេខ៨អា ស្ថិតក្នុងភូមិវាល ឃុំកញ្ចំ ស្រុកពារាំង ខេត្តព្រៃវែង។
រថយន្តដែលបើកធ្លាក់ផ្លូវដោយខ្លួនឯងនេះ ម៉ាកសាំយ៉ុង ពណ៌ស ពាក់ស្លាកលេខភ្នំពេញ ២AE ៣៧១៥ ជារថយន្តដឹកភ្ញៀវទេសចរណ៌ និងបើកបរដោយបុរសម្នាក់ឈ្មោះ ម៉ៅ វិសុទ្ធ អាយុ៣៨ឆ្នាំ មានទីលំនៅក្នុងភូមិប៉េសេ សង្កាត់ទឹកថ្លា ខណ្ឌសែនសុខ រាជធានីភ្នំពេញ។ ចំណែកស្ត្រីរងគ្រោះទាំង៣នាក់ គឺជាជនជាតិសាំហ្គាពួរ ប៉ុន្តែមិនត្រូវបានគេប្រាប់អត្ថសញ្ញាណនោះទេ។
មុនពេលកើតហេតុ រថយន្ត បើកបរក្នុងល្បឿនលឿន ក្នុងទិសដៅពីកើតទៅលិចឆ្ពោះទៅរាជធានីភ្នំពេញ ពេលមកដល់កន្លែងកើតហេតុ មានរថយន្តធំមួយនៅពីមុខ ហើយរថយន្តសាំយ៉ុងបានព្យាយាមវ៉ាជែងឲ្យផុត ប៉ុន្តែគាប់ជួនពេលនោះមានរថយន្តផ្សេងទៀត បើកមកដល់ក្នុងទិសដៅបញ្ច្រាស គ្នា ធ្វើអោយរថយន្តសាំយ៉ុង កាច់ចង្កូតគេចទៅស្តាំដៃវិញ ជ្រុលចង្កូតផុតផ្លូវធ្លាក់ចុះទៅក្រោម ក្រឡាប់បះជើងមួយចំហៀងខ្លួន និងធ្វើអោយអ្នកជិះ រងរបួស៕ ដោយ ៖ បញ្ញាស័ក្តិ