កណ្ដាល ៖ យុវជនម្នាក់បើកម៉ូតូបុកបុរសកំពុងដើរបណ្ដាលឲ្យរងរបួសធ្ងន់ និងបានដាច់ខ្យល់ស្លាប់ ពេលបញ្ជូនដល់មន្ទីរពេទ្យ នៅវេលាម៉ោង១៦និង៥០នាទី ថ្ងៃទី៣ ខែកុម្ភៈ ឆ្នាំ២០១៩ ស្ថិតក្នុងភូមិព្រែកតាទាវ ឃុំព្រែកអំបិល ស្រុកស្អាង ខេត្តកណ្តាល។
មន្ត្រីនគរបាលចរាចរណ៍ស្រុកស្អាង បានឲ្យដឹងថា ជនរងគ្រោះស្លាប់មានឈ្មោះ អ៊ុត រុំ ភេទប្រុស អាយុ៥៤ឆ្នាំ មុខរបរ កសិករ មានទីលំនៅភូមិព្រែកតាទាវ ឃុំព្រែកអំបិល ស្រុកស្អាង ខេត្តកណ្ដាល (ជាអ្នកថ្មើរជើង) ។ ចំណែកភាគីខាងម៉ូតូបើកបរដោយឈ្មោះ ហៃ ដារិទ្ធ ភេទប្រុស អាយុ១៩ឆ្នាំ មុខរបរ កម្មករ មានទីលំនៅភូមិស្រក់ ឃុំស្រក់ ស្រុកកំពង់សៀម ខេត្តកំពង់ចាម បើកបរម៉ូតូម៉ាកហុងដាឌ្រីម ធុនសេ១២៥ ស៊េរីឆ្នាំ២០១៣ ពណ៍ខ្មៅ បឹទស្កុតពណ៍ទឹកប្រាក់ ពាក់ស្លាកលេខ កំពង់ចាម 1N-2950 ដោយមានអ្នករួមដំណើរមនុស្សស្រី២នាក់នៅក្រោយផងដែរ។
ប្រភពដដែលបន្តថា នៅមុនពេលកើតហេតុ សាក្សីបានឃើញជនរងគ្រោះខាងលើ បានចុះពីលើរថយន្តឈ្នួល រួចដើរឆ្លងផ្លូវពីលិចទៅកើត ខណៈកំពុងដើរឆ្លង ក៏មានម៉ូតូមួយគ្រឿង បើកបរដោយយុវជនខាងលើ រួមទាំមានអ្នករួមដំណើរ២នាក់ពីក្រោយ ធ្វើដំណើរតាមបណ្ដោយផ្លូវ ក្នុងទិសដៅពីត្បូងទៅជើង ក៏ឈប់មិនទាន់បានបុកបុរសរងគ្រោះខាងលើពេញមួយទំហឹង បណ្ដាលឲ្យបុរសរងគ្រោះដួលបោកក្បាលទៅនឹងផ្លូវរងរបួសធ្ងន់ ។ ចំណែកអ្នកបើកបរម៉ូតូនិងអ្នករួមដំណើរទទួលរងរបួសស្រាល ។
ក្រោយពីមានហេតុការណ៍កើតឡើង ជនរងគ្រោះរបួសធ្ងន់ត្រូវ បានរថយន្តសាមុយដឹកបញ្ជូន ទៅសង្គ្រោះនៅមន្ទីរពេទ្យប្រតិបត្តិស្រុកកោះធំ តែដោយសភាពធ្ងន់ធ្ងរពេក ជនរងគ្រោះក៏បានបញ្ជូនបន្តទៅកាន់មន្ទីរពេទ្យរាជធានីភ្នំពេញ ដើម្បីសង្គ្រោះបន្ទាន់ តែជាអកុសល ជនរងគ្រោះបានដាច់ខ្យល់ស្លាប់ ខណៈដល់មន្ទីរពេទ្យ ។
ចំណែកអ្នកបើកបរម៉ូត និងម៉ូតូត្រូវបាននគរបាលចរាចរណ៍ស្រុក ធ្វើការឃាត់ខ្លួន និងវាស់វែង រួចកសាងឯកសារ យកមកអធិការដ្ឋាននគរបាលស្រុក ដើម្បីចាត់ការតាមនីតិវិធីច្បាប់ ៕ ដោយ៖បញ្ញាស័ក្តិ
