វីដេមួយកំពុងតែទទួលបានការចាប់អារម្មណ៍ជាខ្លាំង និងត្រូវបានចែករំលែកតៗគ្នាជាច្រើន នៅលើបណ្តាញសង្គមចិន បានបង្ហាញឲ្យឃើញនារីជាបុគ្គលិកបម្រើការងារនៅកន្លែង «ជញ្ជីងថ្លឹងឡាន» មួយកន្លែង លួចសម្ងំយំតែឯង នៅតែទប់ញញឹមហាក់ដូចគ្មានរឿងអ្វីកើតឡើង ដែលមើលទៅពិតជាគួរឲ្យអាណិតខ្លាំងណាស់ ។
បើយោងតាមប្រភពព័ត៌មានបានឲ្យដឹងថា ដំបូងឡើយ បុគ្គលិកស្រីម្នាក់មកពីខេត្ត Guizhou បានទៅជួយរុញរថយន្តខូច១គ្រឿងចាកចេញពីកន្លែងជញ្ជីង ដែលបង្កឲ្យមានការកកស្ទះការធ្វើដំណើរ ។ អ្នកដំណើរដែលកំពុងឈប់រថយន្តបន្តកន្ទុយគ្នាក្នុងជួររង់ចាំ បានមានការមិនពេញចិត្ត រហូតនាំគ្នាស្ទុះទៅជេរស្តីឲ្យនាងកប់ៗមាត់តែម្តង ដោយពុំបានគិតពីហេតុផលនេះទេ ។
អ្នកប្រើប្រាស់បណ្តាញសង្គមម្នាក់បានសរសេរថា៖ «ខ្ញុំយំតាមហើយ ខណៈបានមើលវីដេអូនេះ ។ ខ្ញុំក៏ធ្លាប់មានបទពិសោធន៍ដូចគ្នានេះដែរ ។ ជីវិតមិនងាយស្រួលទេ» ។ អ្នកខ្លះទៀតថា៖ «ខ្ញុំពិតជាអាណិតនាងខ្លាំងណាស់ នៅពេលឃើញនាងយំបែបនេះ ។ ជីវិតគឺលំបាកណាស់ ។ សូមបង្ហាញសេចក្តីសប្បុរស និងការយោគយល់គ្នាទៅវិញទៅមកផង» ៕ រក្សា
