ខេត្តស្វាយរៀង ៖ លោក កឹង ឃន ជាប្រធានសមាគមអ្នកជិះកង់ដើម្បីសុខភាព និងការអភិវឌ្ឍ ប្រចាំខេត្តស្វាយរៀងកាលពីព្រឹកថ្ងៃ ១៤រោច ខែបុស្ស ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃ០៣-០២-២០១៩ បានផ្តួចផ្តើមគំនិតអោយសមាជិកក្រុមជិះកង់ នៃសមាគមអ្នកជិះកង់ដើម្បីសុខភាព និងការអភិវឌ្ឍ ប្រចាំខេត្តស្វាយរៀងបានធ្វើដំណើរដោយបានជិះកង់ចេញពីរង្វង់មូលក្បាលស្ពានមិត្តភាពកម្ពុជា-ជប៉ុន (ស្ពានជ្រោយចង្វា) តាមផ្លូវជាតិលេខ ៦អា ឆ្នោះទៅកាន់វិមាននយោបាយឈ្នះឈ្នះ (ប្រវែងទៅដល់ ២២ គីឡូម៉ែត្រ និងត្រឡប់មកវិញ ២២ គីឡូមែត្រ) ដើម្បីទស្សនាវិមានឈ្នះឈ្នះ ដែលជាសំណង់ដែលបានបង្ហាញ អំពីប្រវត្តិសាស្ត្រនៃការតស៊ូរំដោះជាតិ ក្រោមការដឹកនាំប្រកបដោយគតិបណ្ឌិត របស់សម្តេចអគ្គមហាសេនាបតី តេជោ ហ៊ុន សែន នាយករដ្ឋុមន្ត្រីនៃព្រះរាជាណាចក្រកម្ពុជា។
លោក កឹង ឃន ប្រធានសមាគម ក្រុមអ្នកជិះកង់ដើម្បីសុខភាព និងការអភិវឌ្ឍ ប្រចាំខេត្តស្វាយរៀងធ្លាប់បានប្រាប់ក្រុមអ្នកសារព័ត៍មានឱ្យដឹងថា ៖ នាពេលបច្ចុប្បន្ននេះសមាគម ក្រុមអ្នកជិះកង់ដើម្បីសុខភាព និងការអភិវឌ្ឍ ប្រចាំខេត្តស្វាយរៀង
មានសមាជិកជិត២០០នាក់ ដោយបាននាំគ្នាជិះកង់ហាត់ប្រាណដើម្បីសុខភាពជារៀងរាល់ព្រឹកមានរយៈពេល២ម៉ោង ដោយចាប់ផ្តើមពីម៉ោង៤ទៀបភ្លឺ រហូតដល់ម៉ោង៦ព្រឹក។
លោក ប្រធានសមាគម ក្រុមអ្នកជិះកង់ដើម្បីសុខភាព និងការអភិវឌ្ឍ ប្រចាំខេត្តស្វាយរៀងបានឱ្យដឹងទៀតថា ៖ ក្នុងរយៈ២ម៉ោងនេះជាមធ្យមជិះកង់បានចម្ងាយផ្លូវចាប់ពី ៤០គីឡូម៉ែត្រទៅជាង៥០គីឡូម៉ែត្រគឺជិះកង់ តាមផ្លូវមួយចំនួនក្នុងក្រុងស្វាយរៀងហើយនាពេលខ្លះក្រុមអ្នកជិះកង់ក៏បាននាំគ្នាជិះកង់ទៅតាមបណ្តាក្រុង-ស្រុកផ្សេងៗទៀតផងដែរតួយ៉ាងដូចជា ក្រុងបាវិត ស្រុករមាសហែក ស្រុកស្វាយជ្រំ ស្រុកកំពង់រោទិ៍ ស្រុករំដួល និងក៏ធ្លាប់ជិះកង់ទៅដល់ស្ពានអ្នកលឿងខេត្តព្រៃវែងដែលមានចម្ងាយផ្លូវ រហូតដល់ទៅជាង៦០គីឡូម៉ែត្រថែមទៀតផង ហើយសម្រាប់សំលៀកបំពាក់វិញ គឺ២ពណ៌ក្នុងសមាជិកម្នាក់ៗមានសំលៀកបំពាក់អាវ៣កំប្លេរ មានព័ត៌លឿង២កំប្លេរ សំរាប់ពាក់ពីថ្ងៃចន្ទដល់ថ្ងៃសៅរ៍ ដោយឡែកសំរាប់ថ្ងៃអាទិត្យវិញគឺអាវពណ៌ស្លាទុំ។
ដោយឡែកសមាជិកក្រុមអ្នកជិះកង់ដើម្បីសុខភាព និងការអភិវឌ្ឍ ប្រចាំខេត្តស្វាយរៀងបានឱ្យដឹងផងដែរថា ៖ នៅពេលដែលជិះកង់មកដល់វិមានឈ្នះឈ្នះបើនិយាយពីបរិយាកាសពេលទៅដល់វិមានឈ្នះឈ្នះ គឺ ទេសភាពស្អាត ការរៀបចំបានស្អាត មានសណ្តាប់ធ្នាប់ល្អ រឺឯទឹកចិត្តសមាជិកសមាគមនអ្នកជិះកង់ គឺរីករាយ សប្បាយចិត្ត អារម្មណ៍ស្រស់ថ្លា និងបានសំដែងការកោតស្ញប់ស្ញែងចំពោះស្នាដៃ និងវីរៈភាពនៃការតស៊ូដឹកនាំប្រទេសរបស់សម្តេចតេជោ។
សូមបញ្ជាក់ផងដែរថាៈសមាគម ក្រុមអ្នកជិះកង់ដើម្បីសុខភាព និងការអភិវឌ្ឍ ប្រចាំខេត្តស្វាយរៀង ត្រូវបានរដ្ឋបាលខេត្តស្វាយរៀងធ្វើការប្រកាសទទួលស្គាល់ជាផ្លូវការនៅថ្ងៃទី១ ខែមករា ឆ្នាំ២០១៩នេះ ក្រោយពេលដែលក្រុមអ្នកជិះកង់បាននាំគ្នាជិះកង់ហាត់ប្រាណជារៀងរាល់ព្រឹកអស់រយៈពេលប្រហែល២ឆ្នាំកន្លងមកហើយ ៕ ដោយ ៖ វ៉ៃកូ