ខេត្តសៀមរាប ៖ ប្រពន្ធសុំលែងលះប្ដី ដោយសារម្ដាយខាងប្រុស មិនពេញចិត្តទៅនឹងប្រពន្ធ ទើបមានទំនាស់ក្នុងគ្រួសារចេះតែកើតឡើង ដោយប្រពន្ធបាន យកកាំបិតបុ័ងតោ កាប់លើប្តីដែលជាមន្ត្រីយោធា បណ្តាលឱ្យស្លាប់ភ្លាមៗ កាលពីថ្ងៃទី៣ ខែកុម្ភៈ ឆ្នាំ២០១៩ នៅភូមិស្រះខ្វាវ ឃុំត្បែង ស្រុកបន្ទាយស្រី ខេត្តសៀមរាប។
ជនរងគ្រោះឈ្មោះឆេង អាយុ២៤ឆ្នាំ មុខរបរជាយោធា នៅវរសេនាតូចបញ្ជូនសារកងពលធំអន្តរាគមន៍លេខ២ ។ ចំណែកជនសង្ស័យឈ្មោះបេង សុខលាភ អាយុ១៩ឆ្នាំ ត្រូវបានចាប់ខ្លួន ព្រោះនាងឃាតករមិនបានគេចខ្លួន។
មន្ត្រីមូលដ្ឋានបានបន្តថា មូលហេតុផ្ដើមចេញពីប្រពន្ធសុំលែងលះ តែប្ដីមិនព្រម។ នៅពេលប្រពន្ធបម្រុងនឹងចាកចេញពីផ្ទះ ប្ដីបាននិយាយថា បើទៅបងសុំបន្សល់ទុកស្នាកស្នាមសិន។ បន្ទាប់មកក៏មានអំពើហិង្សកើតឡើង ។ ការដែលប្រពន្ធសុំលែងលះប្ដីបែបនេះ ដោយសារម្ដាយខាងប្រុស មិនពេញចិត្តទៅនឹងប្រពន្ធខ្លួន ទើបមានទំនាស់ក្នុងគ្រួសារចេះតែកើតឡើង៕ ដោយ ៖ បញ្ញាស័ក្តិ