បាត់ដំបង ៖ អភិបាលខេត្តបាត់ដំបង បានថ្លែងប្រាប់កសិករថា សព្វថ្ងៃនេះ ប្រទេសកម្ពុជាបាននាំចូលបន្លែ ដែលគ្មានសុវត្ថិភាព ពីប្រទេសជិតខាង ជាពិសេសវៀតណាម និងថៃ ដែលធ្វើឲ្យបញ្ហានេះ ឆ្លុះបញ្ចាំងឲ្យឃើញថា កសិករកម្ពុជាយើង ខ្វះនូវទុន សម្ភារៈ និងបច្ចេកទេស ក្នុងការផលិត និងព័ត៌មានទីផ្សារ ។
ក្នុងពិព័រណ៍ផ្សាណាត់បន្លែសុវត្តិភាព និងផលិតផលសុវត្ថិភាពនៅថ្ងៃទី១៤ ខែធ្នូ ឆ្នាំ ២០១៧ លោក ងួន រតនៈ អភិបាលខេត្តបាត់ដំបង បានមានប្រសាសន៍ថា គោលបំណងនៃការរៀបចំពិព័រណ៍នេះ ឡើងគឺ ជួយសម្របសម្រួលទីផ្សារជូនកសិករ ជាអ្នកផលិត និងជួយសម្របសម្រួលដល់បងប្អូនជាអ្នកបរិភោគ មានទីកន្លែងសម្រាប់លក់ និងទិញបន្លែ ដែលធានាថាគ្មានសារធាតុគីមីពុល ។
លោក អភិបាលខេត្ត ក៏បានផ្តាំផ្ញើ និងលើកទឹកចិត្ត ដល់បងប្អូនកសិករដែលដាំបន្លែ ទាំងអស់ខិតខំប្រឹងប្រែង យកចិត្តទុកដាក់ ដាំបន្លែតាមបទដ្ឋានបច្ចេកទេស និងរក្សានូវសច្ចៈភាព មិនលួចប្រើប្រាស់នូវសារធាតុគីមីពុល ខុសលក្ខណៈបច្ចេកទេស ដែលធ្វើឲ្យប៉ះពាល់ដល់សុខាភាពអ្នកបរិភោគ និងឲ្យបងប្អូន ប្រជាពលរដ្ឋ មន្ត្រីរាជការ ជួយគាំទ្រនូវផលិតផលកសិករយើង ជាពិសសេសបន្លែសុវត្តិភាពគ្មានជាតិគីមីពុល៕ ដោយ ៖ បញ្ញាស័ក្តិ
