ភ្នំពេញ៖ លោកអង្គ វង្ស វឌ្ឍនា រដ្ឋមន្ត្រីក្រសួងយុត្តិធម៌ បានចេញប្រកាសស្តីពី បែបបទសម្រាប់អនុវត្តការងារ របស់មន្ត្រីអាជ្ញាសាលា នៃក្រសួងយុត្តិធម៌ កាលពីថ្ងៃទី៣០ ខែមករា ឆ្នាំ២០១៩។
សេចក្តីសម្រេច របស់ក្រសួងយុត្តិធម៌ គឺមន្ត្រីអាជ្ញាសាលា ត្រូវទទួលបន្ទុកអនុវត្តន៍កិច្ចការ អាជ្ញាសាលានៅក្នុងដែនសមត្ថកិច្ច នៃសាលាដំបូង ដែលខ្លួនប្រចាំការ។ សាលាដំបូង និងអយ្យការអមសាលាដំបូង រាជធានី ខេត្ត ត្រូវប្រគល់កិច្ចការទាំងឡាយណាដែលជាសមត្ថកិច្ចរបស់អាជ្ញាសាលា ជូនទៅមន្ត្រីអាជ្ញាសាលា ដែលកំពុងប្រចាំការនៅទីនោះ ដើម្បីអនុវត្តន៍ការងារតាមច្បាប់ជាធរមាន លើកលែងតែ សាលាដំបូង និងអយ្យការសាលាដំបូងរាជធានី ខេត្ត ដែលមិនទាន់មានមន្ត្រីអាជ្ញាសាលាប្រចាំការ ត្រូវបន្តអនុវត្តន៍តាមប្រកាសលេខ ៣០ កយប្រក ០៧ ចុះថ្ងៃទី១៩ ខែមកក្កដា ឆ្នាំ២០០៧ របស់ក្រសួងយុត្តិធម៌ ស្តីពីមន្ត្រីទទួលបន្ទុកកិច្ចការអាជ្ញាសាលា។
បើតាមប្រកាស លោករដ្ឋមន្ត្រី បានបញ្ជាក់ថា “មន្ត្រីអាជ្ញាសាលាដែលប្រចាំការនៅសាលាដំបូងរាជធានី ខេត្ត ត្រូវស្នើសុំគោលការណ៍ណែនាំជាមុន ពីក្រសួងយុត្តិធម៌ រាល់ការអនុវត្តដោយបង្ខំទាំងឡាយណាដែលអាចនឹងមានការប្រឆាំង ជាហេតុបង្កឲ្យមានភាពចលាចល វឹកវរ ឬអសន្តិសុខដល់សង្គម និងប៉ះពាល់ដល់សណ្តាប់ធ្នាប់សាធារណៈធ្ងន់ធ្ងរ ដែលមិនអាចគ្រប់គ្រងបាន”។
សូមបញ្ជាក់ថា អាជ្ញាសាលាជាស្ថាប័នអនុវត្តសាលក្រម ឬសាលដីការបស់តុលាការ និងសេចក្តីសម្រេចផ្សេងៗ របស់តុលាការ បើយោងតាមច្បាប់ក្រមនីតិវិធីរដ្ឋប្បវេណី អាជ្ញាសាលាបង្កើតនៅឆ្នាំ២០០៦ តែមន្ត្រីអាជ្ញាសាលា មិនទាន់បង្កើតបាននៅឡើយ ហេតុនេះហើយបានកិច្ចការអាជ្ញាសាលា ត្រូវបានក្រសួងយុត្តិធម៌ ចេញប្រកាសលេខ៣០ ឆ្នាំ២០០៧ ប្រគល់កិច្ចការរបស់អាជ្ញាសាលា ឲ្យទៅស្ថាប័នអយ្យការ ពោលគឺព្រះរាជអាជ្ញា ឬព្រះរាជអាជ្ញារង ជាអ្នកធ្វើបណ្តោះអាសន្នសិន។ ទើបតែនៅថ្ងៃទី៣០ ខែមករា ឆ្នាំ២០១៩ ក្រសួងយុត្តិធម៌ បានចេញសេក្តីប្រកាសលេខ០៦២ ឲ្យសាលាដំបូង និងអយ្យការអមសាលាដំបូង ប្រគល់រាល់កិច្ចការ ដែលជាសមត្ថកិច្ច របស់អាជ្ញាសាលាឲ្យអាជ្ញាសាលាវិញ មានន័យថា រាល់កិច្ចការរបស់អាជ្ញាសាលា ដែលព្រះរាជអាជ្ញា ឬព្រះរាជអាជ្ញារង ធ្វើបណ្តោះអាសន្ន គឺត្រូវប្រគល់ឲ្យអាជ្ញាសាលា ជាអ្នកធ្វើវិញទាំងអស់ ចាប់ពីថ្ងៃទី៣០ ខែមករា ឆ្នាំ២០១៩នេះទៅលើកលែងតែនៅតាមបណ្តាខេត្តទាំងឡាយណា ដែលគ្មានមន្ត្រីអាជ្ញាសាលាប្រចាំការនៅទីនោះ។ បច្ចុប្បន្ននេះ ស្ថាប័នអាជ្ញាសាលា កំពុងតែប្រចាំការ នៅសាលាដំបូងរាជធានីភ្នំពេញ ខេត្តកណ្តាល សៀមរាប បាត់ដំបង បន្ទាយមានជ័យ និងខេត្តព្រះសីហនុ។ គួរបញ្ជាក់ផងដែរថា អាជ្ញាសាលាជាស្ថាប័នអនុវត្តសាលក្រម ឬសាលដីការបស់តុលាការ និងសេចក្តីសម្រេចផ្សេងៗ របស់តុលាការ ដូចជាការប្រគល់ចលនវត្ថុ និងអចលនវត្តុ ការរឹបអូសចលនវត្ថុ ការលក់ចលនវត្ថុ និងអចលនវត្ថុ ការអនុវត្តការរក្សារការពារ ការស្រាវជ្រាវស្ថានភាពបច្ចុប្បន្ន អចលនវត្ថុជាដើម ក្រៅពីនេះកិច្ចការផ្សេងៗទៀត របស់អាជ្ញាសាលា គឺការអនុវត្តលិខិតយថាភូត ដែលធ្វើឡើងដោយសារការី៕ ដោយ ៖ កូឡាប