វីដេអូរយៈពេល១នាទី ពីកាមេរ៉ាឃ្លាំមើលនៅក្នុងហាងលក់ទំនិញមួយកន្លែង នៅក្នុង Sida ខេត្ត Nakhon Ratchasima ប្រទេសថៃ កាលពីថ្ងៃទី២៩ ខែមករា ឆ្នាំ២០១៩ បានបង្ហាញឲ្យបុរសឈុតខ្មៅ និងបិទមុខម្នាក់ បានចូលវាយប្រហារទៅលើបុគ្គលិកស្រីៗ២នាក់ ជាមួយកាំបិតវែងដ៏មុតស្រួច ។
នៅពេលឃើញជនមិនស្គាល់មុខនេះ បានដើរចូល និងមានការភ័យខ្លាចខ្លាំង បុគ្គលិកស្រីរាងធាត់ម្នាក់ បានចាប់លើកស្ត្រីអ្នករួមការងារម្នាក់ធ្វើជា «ខែល» ដើម្បីការពារខ្លួននាង ដែលជាហេតុធ្វើឲ្យជនរូបនោះចាក់នាងឲ្យរងរបួសធ្ងន់ធ្ងរតែម្តង ។
ក្រោយពីចាក់ប្រហារឲ្យមានរបួសរួច ជនដ៏កំណាចរូបនេះបានចាកចេញទៅវិញយ៉ាងលឿន ដោយពុំឃើញមាននាំយករបស់ទ្រព្យអ្វីនោះទេ ។
ស្ត្រីរងគ្រោះត្រូវបានចាក់ឲ្យរងរបួសធ្ងន់ធ្ងរនៅត្រង់ពោះ និងត្រូវពេទ្យដេរអស់ ៦ ថ្នេរ ។ បច្ចុប្បន្ន សមត្ថកិច្ចកំពុងតាមប្រមាញ់ជនរូបនេះ ដែលគេនៅតែពុំទាន់ដឹងច្បាស់ពីមូលហេតុ នាំឲ្យរូបគេចូលមកវាយប្រហារមកលើបុគ្គលិកហាងយ៉ាងសាហាវបែបនេះ ៕ រក្សា
