ឡានដឹកជំនួយមនុស្សធម៌របស់អាមេរិចជាច្រើនគ្រឿងត្រូវជាប់នៅព្រំដែនប្រទេសកូឡុំប៊ី ដោយសារតែមានការរារាំងពីទាហានដែលគាំទ្រប្រធានាធិបតីវេណេហ្ស៊ុយអេឡា Nicolas Maduro។
ជំនួសមនុស្សធម៌ទាំងនោះគឺសម្រាប់ជួយប្រជាជនវេណេហ្សយអេឡា ប៉ុន្តែត្រូវប្រធានាធិបតី Nicolas Maduro មិនអនុញ្ញាតឲ្យចូលក្នុងប្រទេសរបស់ខ្លួន។ បច្ចុប្បន្នឡានទាំងអស់កំពុងចតនៅក្បែរស្ពាន Tienditas។
ចំណែកមេដឹកនាំបក្សប្រឆាំងវេណេហ្ស៊ុយអេឡា លោក Juan Guaidó បានធ្វើការព្រមានថា ប្រជាជនវេណេហ្ស៊ុយអេឡាជាច្រើនអាចរងគ្រោះរហូតដល់ស្លាប់ប្រសិនជាគ្មានជំនួសរបស់អន្តរជាតិ។
លោក Juan Guaidó កាលពីពេលថ្មីៗនេះបានប្រកាសខ្លួនជាប្រធានាធិបតីបណ្តោះអាសន្ន និងទទួលបានការគាំទ្រពីប្រទេសមហាអំណាចជាង ៤០។
លោក Juan Guaidó ដែលជាប្រធានរដ្ឋសភាប្រទេសវេណេហ្ស៊ុយអេឡា បាននិយាយថា រដ្ឋធម្មនុញ្ញអនុញ្ញាតឲ្យគាត់កាន់អំណាចបណ្តោះអាសន្ននៅពេលតំណែងប្រធានាធិបតីត្រូវគេមើលឃើញថាមិនស្របច្បាប់។
ចំណែកប្រធានាធិបតី Nicolas Maduro វិញនៅតែទទួលបានការគាំទ្រពីសម្ព័ន្ធមិត្តរបស់ខ្លួន មានរុស្សី និងចិន។
លោក Nicolas Maduro បដិសេធមិនឲ្យទទួលយកការផ្តល់ជំនួសពីបរទេស ជាហេតុធ្វើឲ្យគាត់មិនអនុញ្ញាតឲ្យឡានជំនួយអាមេរិចចូលមកក្នុងប្រទេស ដោយលោកបញ្ជាក់ថា វាអាចជាការបើកផ្លូវដល់ការអន្តរាគមន៍ផ្នែកយោធារបស់អាមេរិច ក្នុងការទម្លាក់រូបលោកពីតំណែង។
នៅពេលជាមួយគ្នានេះដែរ រដ្ឋមន្ត្រីការបរទេសអាមេរិច Mike Pompeo បានទាមទារឲ្យប្រទេសវេណេហ្ស៊ុយអេឡាបើកស្ពានដល់ឡានជំនួយ ដោយបញ្ជាក់ថា របប Maduro ត្រូវតែអនុញ្ញាតឲ្យជំនួយបានទៅដល់ប្រជាជនដែលកំពុងស្រេកឃ្លាន។
មេដឹកនាំសំខាន់ៗរបស់វេណេហ្ស៊ុយអេឡាជាច្រើនផងដែរ បានអំពាវនាវទៅដល់យោធាអនុញ្ញាតឲ្យឡានដឹកជំនួយចូលក្នុងប្រទេស៕ សុភ័ក្ត្រ
ប្រភព៖ BBC