ភ្នំពេញ៖ សិស្សានុសិស្សសាលាបឋមសិក្សាក្តីតាកុយ ក្នុងខណ្ឌច្បារអំពៅ រាជធានីភ្នំពេញ ទៅសាលារៀនជាមួយដបច្រកទឹកយកទៅពីផ្ទះប្រភេទថ្មីមានតួនាទីយ៉ាងសំខាន់សម្រាប់ការពារបរិស្ថាន កាត់បន្ថយការប្រើប្រាសដបទឹកផ្លាស្ទិក ជួយដល់សុខភាព និងចំណាយរបស់មាតាបិតាសិស្ស។
លោក តែ សុមនៈ នាយកសាលាបឋមសិក្សាក្តីតាកុយបានបញ្ជាក់ថាបច្ចុប្បន្នសិស្សសាលាសរុបជាង៥០០នាក់ ក្នុងនោះ៩០%ហើយ បានប្រើប្រាសដបច្រកទឹកពីផ្ទះរៀងៗខ្លួន ម្នាក់មួយៗ សម្រាប់បរិភោគនៅពេលមកសាលារៀន។
លោកនាយកសាលាបានបញ្ជាក់ថា កន្លងទៅធុងសំរាមនៅតាមសាលារៀនពេញរៀងរាល់ថ្ងៃ ដោយសំណល់ផ្លាស្ទិកជាពិសេសដបទឹកបរិសុទ្ធដែលសិស្សទិញមកហូបនៅតាមសាលារៀន។ ប៉ុន្តែកន្លងមក រយៈពេល១សប្តាហ៍ ធុងសំរាម មិនទាន់មានដបទឹកផ្លាស្ទិកទៀតទេ។ តាមរយៈការអប់រំស្តីពីបរិស្ថានពីផ្នែកអប់រំបរិស្ថាន សហការជាមួយ អ្នកស្ម័គ្រចិត្ត នៃអង្គការអង្គការសម្ព័ន្ធសាកលសន្តិភាព បានធ្វើឱ្យឥរិយាបទគ្រូបង្រៀន សិស្ស ក៏ដូចជាសហគមន៍ មានការយល់ដឹងពីផលប្រយោជន៍យកដបទឹកអាចប្រើប្រាសបានច្រើនដងច្រកទឹកពីផ្ទះទៅសាលារៀន។ លោក បណ្ឌិត នាយកអង្គការសម្ព័ន្ធសាកលសន្តិភាព បានឱ្យដឹងថា ការប្រើប្រាសដបទឹកដែលអាចប្រើប្រាសច្រើនដង ហើយសិស្សដាក់ទឹកពីផ្ទះមកហូបនៅតាមសាលារៀនកាត់បន្ថយការប្រើប្រាសដបទឹកផ្លាស្ទិក ជួយដល់សុខភាព និងចំណាយរបស់មាតាបិតាសិស្សផងដែរ។ ប្រជាពលរដ្ឋកាត់បន្ថយបានការចំណាយក្នុងការទិញដបទឹកនៅតាមទីកន្លែងលក់នានា ហើយជាពិសេសគាត់បានចូលរួមកាត់បន្ថយកាកសំណល់សំរាមផ្លាស្ទិក ដែលជាកង្វាល់របស់បរិស្ថាននាពេលបច្ចុប្បន្ន។ សូមបញ្ជាក់ថា ក្រសួងបរិស្ថាន លើកទឹកចិត្តដល់ប្រជាពលរដ្ឋកាត់បន្ថយការប្រើប្រាសផ្លាស្ទិក សំដៅធានានូវកិច្ចគាំពារសុខមាលភាពសាធារណៈ បរិស្ថាន និងសោភ័ណភាពមូលដ្ឋាន៕ ដោយ៖កូឡាប