ត្បូងឃ្មុំ ៖ អធិការដ្ឋាននគរបាលស្រុកមេមត់ បានឲ្យដឹងថា កម្លាំងនគរបាលប្រឆាំងបទល្មើសគ្រឿងញៀន នៃអធិការដ្ឋាននគរបាលស្រុកមេមត់ បើកកិច្ចប្រតិបត្តិការចាប់ខ្លួនជនសង្ស័យម្នាក់ បានមកដាក់ទោសទៅតាមផ្លូវច្បាប់ ដោយសហការ ជាមួយនគរបាលប៉ុស្តិ៍រដ្ឋបាលដារ និងទទួលបានព័ត៌មាន ពីកម្លាំងនៅមូលដ្ឋាន បន្ទាប់ពីមុខសញ្ញានេះ បានប្រកាសតាមចាប់ខ្លួនចំនួន ២ លើក នៅលើបណ្ដាញសង្គម Facebook កាលពីថ្ងៃទី ១ មករា ២០១៩ និងថ្ងៃទី ២ កុម្ភៈ ២០១៩ ។
ជាក់ស្តែង បន្ទាប់ពីទទួលបានព័ត៌មានភ្លាម នៅថ្ងៃទី ១០ ខែ កុម្ភៈ ឆ្នាំ ២០១៩ វេលាម៉ោង ១២ និង ៥០ នាទី កម្លាំងយើង បានចុះទៅដល់ចំណុចមួយ តាមរយៈព័ត៌មានដែលរាយការណ៍មកនោះ គឺបានឃើញមុខសញ្ញាចំនួន ២ នាក់ នៅកំពុងបុកប៊ីយ៉ែផ្ទះមួយកន្លែង ៖ ១.ឈ្មោះ នី រ៉សាត ហៅ ពៅ ភេទប្រុស អាយុ ៣០ ឆ្នាំ ជាតិខ្មែរ-ឥស្លាម , ២.ឈ្មោះ ហ៊ឹម កំរ៉ី ហៅ សាន់ រៃ ភេទប្រុស អាយុ ២៧ ឆ្នាំ ជាតិខ្មែរ-ឥស្លាម រស់នៅភូមិសាឡង់២ ឃុំដារ ស្រុកមេមត់ ខេត្តត្បូងឃ្មុំជាមួយគ្នា ។ គ្រាន់តែពួកគេឃើញសមត្ថកិច្ចយើង ក៏ព្យាយាមគេចចេញពីផ្ទះនោះ ប៉ុន្តែត្រូវកម្លាំងយើង ស្ទាក់ចាប់បានភ្លាមៗ រួចបញ្ជូនមកអធិការដ្ឋាននគរបាលស្រុកមេមត់ ដោយឆែកឆេរទៅលើខ្លួនឈ្មោះ ហ៊ឹម កំរ៉ី ហៅ សាន់ រៃ ភេទប្រុស បានរកឃើញម្សៅក្រាមពណ៌សថ្លាសង្ស័យថា ថ្នាំញៀនចំនួន ១៥ កញ្ចប់ លាក់ទុកក្នុងកញ្ចប់បារី ។
ក្រោយពីកម្លាំងយើងបញ្ជូនខ្លួនមុខសញ្ញា ដែលចាប់បាននោះ មកដល់អធិការដ្ឋាននគរបាលស្រុក នគរបាលជំនាញយើង បានរកឃើញនូវដីកាចំនួន ៣ ច្បាប់ ដែលបានចោទលើឈ្មោះ នី រ៉សាត ហៅ ពៅ ភេទប្រុស នោះជាមុខសញ្ញាមានក្នុងដីកាបង្គាប់ឲ្យចាប់ខ្លួន រហូតចំនួន ៣ ដីកា ៖ -ដីកាលេខ ១៣៦ ចុះថ្ងៃទី ១៩ ខែ ធ្នូ ឆ្នាំ ២០១៦ របស់លោកស្រី នូ ច័ន្ទសុគន្ធា ចៅក្រមស៊ើបសួរសាលាដំបូងខេត្តត្បូងឃ្មុំ ចោទពីបទ ជួញដូរដោយខុសច្បាប់នូវសារធាតុញៀន ប្រព្រឹត្តនៅភូមិកំពាន់ ឃុំកំពាន់ ស្រុកមេមត់ ខេត្តត្បូងឃ្មុំ កាលពីថ្ងៃទី ១១ ខែ កញ្ញា ឆ្នាំ ២០១៦ ។ -ដីកាលេខ ០៥ ចុះថ្ងៃទី ០៤ ខែ មករា ឆ្នាំ ២០១៧ របស់លោក ឈិត វិនា ចៅក្រមស៊ើបសួរសាលាដំបូងខេត្តត្បូងឃ្មុំ បានបើកការស៊ើបសួរ និងដាក់ឲ្យពិនិត្យពីបទ ជួញដូរដោយខុសច្បាប់នូវសារធាតុញៀន ប្រព្រឹត្តនៅភូមិសំរោងជើង ឃុំដារ ស្រុកមេមត់ ខេត្តត្បូងឃ្មុំ កាលពីថ្ងៃទី ១៧ ខែ តុលា ឆ្នាំ ២០១៦ ។ -ដីកាលេខ ១៥៤ ចុះថ្ងៃទី ០៦ ខែ វិច្ឆិកា ឆ្នាំ ២០១៨ របស់លោក សុខ លី ចៅក្រមស៊ើបសួរសាលាដំបូងខេត្តត្បូងឃ្មុំ បានចោទពីបទ ទទួលផលចោរកម្ម ប្រព្រឹត្តនៅភូមិសាឡង់២ ឃុំដារ ស្រុកមេមត់ ខេត្តត្បូងឃ្មុំ កាលពីថ្ងៃទី ១២ ខែ សីហា ឆ្នាំ ២០១៦ ។
ចំពោះមុខសញ្ញាឈ្មោះ ហ៊ឹម កំរ៉ី ហៅ សាន់ រៃ ភេទប្រុស នោះជាមុខសញ្ញាមានក្នុងដីកាបង្គាប់ឲ្យចាប់ខ្លួន លេខ ៣៨៩ ចុះថ្ងៃទី ០៦ ខែ ធ្នូ ឆ្នាំ ២០១៨ របស់លោកស្រី ហៃ ណៃហេង ចៅក្រមស៊ើបសួរសាលាដំបូងខេត្តត្បូងឃ្មុំ ត្រូវចោទពីបទជួញដូរ ដោយខុសច្បាប់នូវសារធាតុញៀន ប្រព្រឹត្តនៅភូមិចំការគ ឃុំដារ ស្រុកមេមត់ ខេត្តត្បូងឃ្មុំ កាលពីថ្ងៃទី៤ ខែ ធ្នូ ឆ្នាំ ២០១៨ ។
បច្ចុប្បន្នមុខសញ្ញាទាំងពីរ ត្រូវបានកម្លាំងជំនាញប្រឆាំងបទល្មើសគ្រឿងញៀន នៃអធិការដ្ឋាននគរបាលស្រុកមេមត់ កសាងសំណុំរឿង រួមទាំងវត្ថុតាងម្សៅក្រាមសថ្លា សង្ស័យជាគ្រឿងញៀនចំនួន ១៥ កញ្ចប់ បញ្ជូនទៅឲ្យតុលាការខេត្តត្បូងឃ្មុំ ផ្តន្ទាទោសតាមនីតិវិធីច្បាប់ ដាក់ពន្ធនាគារ យោងតាមដីកាបង្គាប់ឲ្យចាប់ វត្ថុតាង ដែលសមត្ថកិច្ចយើង ដកហូតចំពោះមុខ និងចម្លើយសារភាពរបស់ជនល្មើស ៕ ដោយ ៖ កូឡាប