ភ្នំពេញ៖ ភាគីកម្ពុជានិងអាមេរិក បានសន្យានឹងជំរុញ ឲ្យមានការផ្លាស់ប្តូរបេសកកម្មពាណិជ្ជម្មទៅវិញទៅមក ដើម្បីផលិតទំនិញសម្រាប់នាំចេញពីកម្ពុជា ទៅទីផ្សារអាមេរិក ដោយប្រើប្រាស់ប្រព័ន្ធអនុគ្រោះពាណិជ្ជកម្ម ដែលសហរដ្ឋអាមេរិកផ្តល់ឲ្យកម្ពុជា។
កាលពីព្រឹកថ្ងៃទី១៥ ខែធ្នូ ឆ្នាំ២០១៧ នៅទីស្តីការក្រសួង លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានអនុញ្ញាតឲ្យប្រតិភូពាណិជ្ជករសហរដ្ឋអាមេរិក ដែលដឹកនាំដោយ លោក គឹម ឆាហួត អគ្គកុងស៊ុលកម្ពុជា ប្រចាំទីក្រុងឡុងប៊ិច រដ្ឋកាលីហ្វ័រញ៉ា ចូលជួបសម្តែងការគួរសម និងដើម្បីភ្ជាប់ទំនាក់ទំនង និងជំរុញល្បឿនពាណិជ្ជកម្មទ្វេភាគី រវាងសហរដ្ឋអាមេរិក និងកម្ពុជា តាមរយៈការជំរុញការនាំចេញ-នាំចូលទំនិញដោយប្រើប្រាស់កំពង់ផែ Los Angeles ជាច្រកសេដ្ឋកិច្ច។
លោក ប៉ាន សូរស័ក្តិ បានថ្លែងថា នៅក្នុងជំនួបពិភាក្សាគ្នានេះ ភាគីទាំងពីរបានសន្យានឹងជំរុញឲ្យមានការផ្លាស់ប្តូរបេសកកម្មពាណិជ្ជម្មទៅវិញទៅមក ជាពិសេសការផ្លាស់ប្តូរទំនិញ និងសេវាកម្ម ព្រមទាំងការចូលរួមក្នុងព្រឹត្តិការណ៍ជំរុញពាណិជ្ជកម្ម ទាំងនៅកម្ពុជា និងនៅសហរដ្ឋអាមេរិក។
លោករដ្ឋមន្ត្រី បានលើកឡើងថា បន្ថែមលើនេះ ភាគីទាំងពីរបានប្តេជ្ញាពង្រឹងកិច្ចសហការរវាងសហគ្រាសធុនតូច និងមធ្យម តាមរយ:កៀងគរពាណិជ្ជករអាមេរិក ចាប់ដៃគូជាមួយពាណិជ្ជករកម្ពុជា ដើម្បីផលិតទំនិញសម្រាប់នាំចេញទៅទីផ្សារអាមេរិកវិញ ដោយប្រើប្រាស់ប្រព័ន្ធអនុគ្រោះពាណិជ្ជកម្ម ដែលសហរដ្ឋអាមេរិកផ្តល់ឲ្យកម្ពុជា៕ ដោយ៖បញ្ញាស័ក្តិ
