រដ្ឋមន្ត្រីការបរទេសអាមេរិច រិច ធៀល័រសាន់ (Rex Tillerson) បាននិយាយឲ្យដឹងថា ប្រទេសកូរ៉េខាងជើងត្រូវតែត្រឡប់ទៅកាន់តុចរចាកាលពីមុន ដើម្បីចាប់ផ្តើមកិច្ចចរចាសារជាថ្មីរវាងប្រទេសទាំងពីរ។
លោក ថ្លែងដូច្នេះថា ទីក្រុងព្យុងយ៉ាងត្រូវតែផ្អាកការបាញ់សាកល្បងអាវុធរបស់ខ្លួន មុនពេលមានការចរចាគ្នា។
ការប្រកាសរបស់លោកនៅថ្ងៃសុក្រម្សិលមិញនេះ គឺខុសគ្នាទាំងស្រុងទៅនឹងការប្រកាសកាលពីដើមសប្តាហ៏នេះ ដែលលោកធ្លាប់និយាយថា អាមេរិចត្រៀមខ្លួនរួចរាល់ក្នុងការចរចារជាមួយនឹងកូរ៉េខាងជើងដោយគ្មានលក្ខខ័ណ្ឌ។ ប៉ុន្តែការថ្លែងនោះត្រូវបានជំទាស់ដោយសេតវិមាន។
ប្រទេសកូរ៉េខាងជើងបានធ្វើការបាញ់សាកល្បងមីស៊ីល និងនុយក្លេអ៊ែរជាច្រើនលើកច្រើនសារក្នុងរយៈពេលប៉ុន្មានខែចុងក្រោយនេះ ដោយធ្វើឲ្យមានការថ្កោលទោសយ៉ាងខ្លាំងពីអន្តរជាតិ និងមានទណ្ឌកម្មធ្លាក់មកជាហូរហែរប្រឆាំងនឹងរដ្ឋកុម្មុនិស្តនេះ។
កាលពីដើមសប្តាហ៏នេះ លោក Rex Tillerson ថ្លែងថា “តោះពួកយើងជួបគ្នា និងពិភាក្សាគ្នាពីអ្វីដែលអ្នកចង់បាន” ប៉ុន្តែការថ្លែងរបស់លោក ត្រូវបានឆ្លើយបដិសេធ ហើយសេតវិមានបានប្រកាសថា កូរ៉េខាងជើងត្រូវតែបោះបង់អាវុធនុយក្លេអ៊ែរជាមុនសិន មុនពេលមានការចរចារកើតឡើង។
នៅថ្ងៃសុក្រម្សិលមិញនេះដែរ រដ្ឋមន្ត្រីការបរទេសអាមេរិចដដែលបានជំរុញឲ្យប្រទេសរុស្សី និងចិនដាក់សម្ពាធបន្ថែមលើព្យុងយ៉ាងដោយចាប់វិធានការ និងផ្តល់ការយល់ព្រមជាមួយនឹងសេចក្តីសម្រេចរបស់ក្រុមប្រឹក្សាសន្តិអង្គការសហប្រជាជាតិ។
លោកថ្លែងប្រាប់កិច្ចប្រជុំក្រុមប្រឹក្សាសន្តិសុខថា ជំរើសផ្នែកការទូតនៅតែបើកចំហរ ប៉ុន្តែអាមេរិចមិននឹងឱលំទោនចំពោះការដាក់លក្ខខ័ណ្ឌរបស់កូរ៉េខាងជើងទេ៕ សុភ័ក្ត្រ
