ខេត្តស្វាយរៀង ៖ លោក ម៉ែន វិបុល ប្រធានគណៈកម្មាធិការសាខាកាកបាទក្រហមកម្ពុជា ខេត្តស្វាយរៀងនៅថ្ងៃអង្គារ ៨កើត ខែមាឃធំ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១២ ខែ កុម្ភៈ ឆ្នាំ២០១៩នេះ ក្រោយពីទទួលបានព័ត៌មានពីអនុសាខាកាកបាទក្រហមកម្ពុជាស្រុក ស្វាយជ្រំស្តីពីករណីគ្រោះ អគ្គិភ័យឆេះផ្ទះប្រជាពលរដ្ឋនោះបានចាត់ឲ្យក្រុមការងារសាខាដឹកនាំដោយលោកស្រី ពៅ សុភាព ហេរញ្ញឹក គណៈកម្មាធិការសាខានាំយកអំណោយមនុស្សធម៌ទៅសួរសុខទុក្ខ និងចែកជូនគ្រួសារដែលរងគ្រោះចំនួន១គ្រួសារ។
ពលរដ្ឋដែលរងគ្រោះឈ្មោះ យឹម ស្រីរ័ត្ន អាយុ៣៨ឆ្នាំ ជាស្ត្រីមេម៉ាយ ត្រូវអគ្គិភ័យឆេះផ្ទះទំហំ៦គុណ៧ ម៉ែត្រ សង់ពីឈើប្រក់ស័ង្កសី ខូចខាតទាំងស្រុងរួមនឹងសម្ភារប្រើប្រាស់កាលពីថ្ងៃទី១១ ខែកុម្ភៈ ឆ្នាំ២០១៩ វេលាម៉ោង៣និង០០នាទីល្ងាច បណ្តាលមកពីឆ្លងចរន្តអគ្គិសនី នៅភូមិតាស្អាង ឃុំ កំពង់ចំឡង ស្រុក ស្វាយជ្រំ ខេត្តស្វាយរៀង។
ក្នុងឱកាសនោះលោកស្រី ពៅ សុភាព បាននាំមកនូវប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលផ្តាំផ្ញើសួរសុខទុក្ខ ក្តីអាណិតអាសូរ និងការសោកស្តាយ ចំពោះឧបទ្ទវហេតុដែលបានបំផ្លាញលំនៅដ្ឋាន និងទ្រព្យសម្បត្តិរបស់គ្រួសាររងគ្រោះនាពេលនេះ។
លោកស្រីហេរញ្ញឹកគណៈកម្មាធិការសាខា បានលើកឡើងពីការខិតខំប្រឹងប្រែងរបស់កាកបាទក្រហមកម្ពុជា ក្នុងការជួយដល់ប្រជាពលរដ្ឋនៅពេលជួបគ្រោះមហន្តរាយផ្សេងៗ ដោយមិនប្រកាន់និន្នាការនយោបាយ ពូជសាសន៍ ពណ៌សប្បុរ ពោលគឺទីណាមានការលំបាកទីនោះមានវត្តមានកាកបាទក្រហមកម្ពុជាចុះជួយជានិច្ច ជាក់ស្តែងអំណោយដែលយកមកផ្តល់ជូននាពេលនេះគឺបានមកពីការបរិច្ចាករបស់សប្បុរសជននានា ថ្វីត្បិតតែមិនសាកសមទៅនឹងអ្វីដែលបងប្អូនបាត់បង់ពិតមែន តែក៏អាចជួយដោះស្រាយបងប្អូនបានមួយរយៈពេលខ្លីផងដែរ ។
ជាមួយគ្នានេះលោកស្រី ក៏បានអំពាវនាវដល់ប្រជាពលរដ្ឋទាំងអស់ សូមមានការប្រុងប្រយ័ត្នចំពោះការប្រើប្រាស់ភ្លើង និងចរន្តអគ្គិសនី ដែលជាប្រភពនៃគ្រោះថ្នាក់ ជាពិសេសចំពោះបងប្អូនដែលប្រើប្រាស់ផ្ទាំងសូឡា ត្រូវមានការប្រុងប្រយ័ត្ន ឧស្សាហ៍ត្រួតពិនិត្យ ជៀសវាងមានគ្រោះអគ្គិភ័យកើតឡើងជាយថាហេតុ ហើយសូមកុំអស់សង្ឃឹម ត្រូវប្រឹងប្រែងប្រកបរបរចិញ្ចឹមជីវិត ដើម្បីស្តារសេដ្ឋកិច្ចគ្រួសាឡើងវិញ ព្រោះអំណោយដែលបានផ្តល់ជូនពេលនេះ អាចជួយសម្រាលការលំបាកបានមួយគ្រាតែប៉ុណ្ណោះ ។
អំណោយដែលបានចែកជូនមាន អង្ករ៥០គ.ក្រ មី១កេស ត្រីខ១០កំប៉ុង ទឹកស៊ីអ៊ីវ៦ដប មុង១ ភួយ១ ក្រម៉ា១ សារុង១ កៅស៊ូតង់១ ធុងទឹកជ័រ១ ឆ្នាំងបាយ-សម្ល២ កន្ទេលបត់១ និងថវិកា៤សែនរៀលផងដែរ៕ ដោយ ៖ វ៉ៃកូ
