ភ្នំពេញ ៖ ព្រះករុណា ព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា បានចេញព្រះរាជក្រឹត្យត្រាស់បង្គាប់តែងតាំង លោក នុត សុខុម ជាអនុប្រធានគណៈកម្មាធិការជាតិរៀបចំការបោះឆ្នោត (គ.ជ.ប) ជំនួសលោក គួយ ប៊ុនរឿន តែងតាំងលោក ឌឹម សុណ្ណារុំ និងលោក ហ៊ែល សារ៉ាត់ ជាសមាជិក គ.ជ.ប ជំនួសលោក រ៉ុង ឈុន និងលោកស្រី តែ ម៉ានីរ៉ុង។
ជាមួយគ្នានេះដែរ នាថ្ងៃទី១៥ ខែធ្នូ ឆ្នាំ២០១៧ គ.ជ.ប បានរៀបចំកម្មវិធីទទួលស្វាគមន៍ អនុប្រធាន និងសមាជិក គ.ជ.ប ថ្មី ក្រោមអធិបតីភាព លោក ស៊ិក ប៊ុនហុក ប្រធាន គ.ជ.បផងដែរ។
លោក នុត សុខុម កូតា គណបក្សហ្វ៊ុនស៊ិនប៉ិច មានប្រសាសន៍ថា ពួកគាត់ដែលចូលកាន់តំណែងផ្លូវការនេះ គឺមានមោទនភាពក្រៃលែងដែលអង្គសភាបោះឆ្នោតផ្តល់ការទុកចិត្តកាលពីថ្ងៃទី៧ ធ្នូ និងបានស្បថនៅក្នុងព្រះរាជវាំងកាលពីថ្ងៃទី១២ ធ្នូ ហើយថា ការចូលកាន់តំណែងរបស់សមាជិកថ្មីដើម្បីបន្តនិរន្តភាពនៃ គ.ជ.ប ក្នុងការបម្រើសង្គមជាតិ និងប្រជាជន។
លោក ស៊ិក ប៊ុកហុក បានថ្លែងក្នុងពិធីចូលកាន់តំណែងរបស់សមាជិកថ្មីថា លោកសូមស្វាគមន៍ចំនួនសមាជិកថ្មីទាំង៣រូប ដែលត្រូវបានសភាតែងតាំងជាអនុប្រធាន និងសមាជិកថ្មីទាំងបីរូបនេះ ជំនួសអ្នកសុំលាលែងការពីថ្ងៃទី២០ វិច្ឆិកា ២០១៧៕ ដោយ៖កូឡាប
