អគ្គលេខាធិការអង្គការសហប្រជាជាតិ លោក Antonio Guterres កាលពីថ្ងៃសុក្រម្សិលមិញនេះ បានសំដែងក្តីកង្វល់របស់លោកចំពោះភាពប្រថុយប្រថាននៃការប្រឈមមុខដាក់គ្នាផ្នែកយោធា នៅឧបទ្វីបកូរ៉េ និងបានព្រមានប្រឆាំងរាល់វិធានការយោធា។
លោកថ្លែងប្រាប់ កិច្ចប្រជុំក្រុមប្រឹក្សាសន្តិសុខអង្គការសហប្រជាជាតិថា “រាល់វិធានការយោធានឹងមានការបំផ្លិចបំផ្លាញ និងផ្តល់ផលវិបាកដែលមិនអាចព្យាករណ៏ដឹង”។
“ស្ថានភាពនៅឧបអ្វីកូរ៉េគឺជាបញ្ហាសន្តិសុខ និងសន្តិភាពដ៏តានតឹង និងគ្រោះថ្នាក់បំផុតក្នុងពិភពលោកនាពេលបច្ចុប្បន្ននេះ។ ខ្ញុំមានការខ្វល់ខ្វាយយ៉ាងខ្លាំងពីភាពប្រថុយប្រថាននៃការប្រឈមមុខដាក់គ្នាផ្នែកយោធា ដែលបណ្តាលមកពីការកើនឡើងនៃភាពតានតឹង និងការគិតខុស”។
លោកបន្តទៀតថា “វាគឺជាពេលដែលត្រូវតែបង្កើតភ្លាមៗ និងពង្រឹងនូវបណ្តាញទំនាក់ទំនង រួមមានបណ្តាញទំនាក់ទំនងរវាងយោធា និងយោធានៃកូរ៉េទាំងពីរ។ បណ្តាញទាំងនេះអាចកាត់បន្ថយភាពតានតឹង និងការយល់ច្រឡំលើគ្នានៅក្នុងតំបន់”។
លោកថ្លែងទៀតថា ការភ្ជាប់ទំនាក់ទំនងផ្នែកការទូតគឺជាផ្លូវតែមួយគតទៅកាន់សន្តិភាព និងការលុបបំបាត់អាវុធនុយក្លេអ៊ែរ។
“ពួកយើងត្រូវតែធ្វើអ្វីគ្រប់យ៉ាងដែលពួកយើងអាចធ្វើបានដើម្បីឈានដល់គោលដៅទាំងនោះ”។
លោកក៏បានស្នើឲ្យមេដឹកនាំកូរ៉េខាងជើងអនុវត្តតាមសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ និងអនុញ្ញាតិឲ្យមានលំហរសំរាប់ការចាប់ផ្តើបកិច្ចចរចរបំបាត់នុយក្លេអ៊ែរ និងធ្វើឲ្យមានសន្តិភាពនៅឧបទ្វីបកូរ៉េ។
នៅពេលជាមួយគ្នានេះដែរ អ្នកការទូតកូរ៉េខាងជើងបានថ្លែងនៅក្នុងកិច្ចប្រជុំកាលពីថ្ងៃសុក្រម្សិលមិញថា អាវុធនុយក្លេអ៊ែររបស់កូរ៉េខាងជើងគឺជាការទុកសំរាប់ការពារខ្លួន។
ឯកអគ្គរដ្ឋទូតកូរ៉េខាងជើងប្រចាំអង្គការសហប្រជាជាតិឈ្មោះ Ja Song Nam ថ្លែងថា “បើចងបន្ទោសនរណាម្នាក់ មានតែអាមេរិចមួយគត់ដែលជាអ្នកទទួលខុសត្រូវ”៕ សុភ័ក្ត្រ
