ថ្វីត្បិតតែម្នាក់ឯងក្តី តែលោក Saklani បានដាំដើមឈើលើផ្ទៃដីជាង ១០០អា ប្រែក្លាយតំបន់វាលជាព្រៃបៃតង ។
គាត់កើតនៅថ្ងៃទី ២ ខែមិថុនា ឆ្នាំ ១៩២២ ហើយចាប់ផ្តើមមានគំនិតដាំដើមឈើតាំងពីអាយុ ៨ឆ្នាំ ។ ១ជីវិតរបស់គាត់ គាត់ដាំបានដើមឈើជាង៥លានដើម ។ សូម្បីតែវ័យ ៨៦ឆ្នាំហើយក្តី ពេលដែលភ្នែករបស់គាត់ស្ទើរតែពិការ តែគាត់នៅបន្តដាំដើមឈើបានរាប់ពាន់ដើម ក៏ដូចជាប្រយុទ្ធប្រឆាំងដាច់ខាតដើម្បីការពារបរិស្ថាន ។
ដំបូងឡើយទង្វើរបស់លោករងការប្រឆាំងពីសំណាក់ពលរដ្ឋនៅតំបន់នោះ ព្រោះគិតថាគាត់មានឧបាយកលដណ្តើមយកដីបន្តិចម្តងៗ។ ប៉ុន្តែយូរៗទៅពេលឃើញលោកធ្វើយ៉ាងប្តូរផ្តាច់ រួមជាមួយការតស៊ូប្រឆាំងទង្វើបំផ្លាញបរិស្ថាន ពួកគេក៏ប្តូរគំនិត ហើយមានជំនឿ ។
ឆ្នាំ ១៩៨៦ នាយករដ្ឋមន្ត្រីឥណ្ឌា Rajiv Gandhi បានប្រគល់គ្រឿងឥស្សរយស Indira Priyadarshini Award ដល់រូបលោក ។
ឥឡូវ “មនុស្សឈើ” “Uriksha Manav” គោរម្យងារបស់គាត់បានលាចាកលោកទៅនៅថ្ងៃទី ១៨ ខែមករា ឆ្នាំ២០១៩កន្លងមក ក្នុងជន្មាយុ ៩៦ឆ្នាំ ។
កាលណាទើបស្រុកខ្មែរយើងមាន… “មនុស្សឈើ” ដូចគេទៅហ្ន៎! ឬក៏មានតែ…ឧកញ៉ាឈើៗៗៗ!!! ចន្ទ្រា